އެމްއެމްއޭގެ ޑިރެކްޓަރުންގެ ބޯޑުގެ މަސައްކަތްތައް ފުޅާކޮށް ޤާނޫނަށް އިސްލާހު ގެނެސްފި
8 ޑިސެމްބަރު 2020 | އަންގާރަ 10:29މި ބިލް ފާސްކޮށްފައިވަނީ 56 މެމްބަރުންގެ އިއްތިފާގުން
މޯލްޑިވްސް މަނިޓަރީ އޮތޯރިޓީ (އެމްއެމްއޭ)
މޯލްޑިވްސް މަނިޓަރީ އޮތޯރިޓީ އާއި އޮތޯރިޓީގެ މަސައްކަތްތައް ޚަރުދަނާ ކުރުމަށް ގިނަ އިސްލާހުތަކެއް ގެނައުމާއެކު މޯލްޑިވްސް މަނިޓަރީ އޮތޯރިޓީގެ ޤާނޫނަށް އިސްލާހު ގެނައުމުގެ ބިލް ފާސްކޮށްފިއެވެ.
ސަރުކާރުގެ ފަރާތުން، ކެޔޮދޫ ދާއިރާގެ މެންބަރު ޙުސައިން ޤާސިމް ހުށަހެޅުއްވި މި އިސްލާހުގެ ބިލް ދިރާސާކޮށްފައިވަނީ މާލިއްޔަތު ކޮމިޓީންނެވެ. މި ބިލް ފާސްކޮށްފައިވަނީ 56 މެމްބަރުންގެ އިއްތިފާގުންނެވެ.
މަޖިލީހުން މިހާރު ފާސްކުރި ބިލަށް ބަލާއިރު އޮތޯރިޓީގެ މައިގަނޑު މަގްސަދުތަކުގެ ތެރޭގައި ދެމެހެއްޓެނިވި އިގްތިޞާދީ ކުރިއެރުމަށް މަގުފަހިވާ ގޮތެއްގައި ޕްރައިސް ސްޓެބިލިޓީ ދެމެހެއްޓުމަށްވަނީ ހިމަނާފައެވެ. އަދި މި މަގްސަދު ހާސިލްކުރުމަށް އުނިކަމެއް ނާންނާނެހެން ފައިނޭންޝަލް ސްޓެބިލިޓީ ދެމެހެއްޓުމަކީވެސް މަގްސަދެއްކަމުގައިވަނީ ހިމަނާފައެވެ. އޭގެ އިތުރުން އޮތޯރިޓީގެ ގަވަރުނަރާއި ޑެޕިއުޓީ ގަވަރުނަރާއި ޑިރެކްޓަރުންގެ ބޯޑަށް އައްޔަނުކުރާ މެމްބަރުންނަކީ އުމުރުން 30 އަހަރު ފުރިފައިވާ މީހުންނަށް ވާންވާނެކަމަށް ބަޔާންކޮށްފައިވެއެވެ.
ޑިރެކްޓަރުންގެ ބޯޑުގެ މަސައްކަތްތަކުގެ ތެރޭގައި މަނިޓަރީ ސިޔާސަތުތައް އެކަށައަޅާ ފާސްކުރމާއި މަނިޓަރީ މަގްސަދުތަކާއި މައިގަނޑު އިންޓްރެސްޓް ރޭޓްތަކާއި ރާއްޖޭގައި ފައިސާ ލިބެން ހުންނާނެ ގޮތް ހެދުމާއި އެކަންކަމާ ގުޅޭގޮތުން އެއިރަކަށް އެކަށީގެންވާ ނިންމުންތައް ކަނޑައެޅުންވަނީ ހިމަނާފައެވެ. އަދި އެކްސްޗޭންޖް ރޭޓްގެ ނިޒާމާ ބެހޭގޮތުން ރައީސުލްޖުމްހޫރިއްޔާއަށް ލަފާދިނުމާއި އޮތޯރިޓީގެ މަސައްކަތްތަކާއި ގުޅޭ ސިޔާސަތުތައް ކަނޑައެޅުމާއި އޮތޯރިޓީގެ ހިންގުމާއި އިދާރީ ކަންކަމާއި ގުޅޭ އާންމު ސިޔާސަތުތައް ކަނޑައެޅުމަކީވެސް އޮތޯރިޓީގެ މަސައްކަތްތަކުގެ ގޮތުގައިވަނީ ހިމަނާފައެވެ.
މީގެއިތުރުން އޮތޯރިޓީން ބޮޑެތި އަދަދުތަކުގެ ދަރަބި ނެގުމާމެދު ގޮތެއް ނިންމުމާއި އެފަދަ ދަރަންޏެއް ނެގުމަށް ނިންމާނަމަ އެދަރަންޏެއް ނަގާނެ ޝަރުތުތަކާއި ހަމަތައް ކަނޑައެޅުމަކީވެސް އޮތޯރިޓީގެ މަސައްކަތްތަކުގެ ގޮތުގައި ވަނީ ހިމަނާފައެވެ.
ގަވަރުނަރުގެ މަސައްކަތްތަކާއި ބާރުތަކުގެ ތެރޭގައި މަނިޓަރީ ސިޔާސަތާއި އެކްސްޗޭންޖް ރޭޓާ ބެހޭ ސިޔާސަތާއި އޮތޯރިޓީގެ އެހެނިހެން ސިޔާސަތުތައް ގަވަރުނަރު ބޯޑަށް ހުށަހަޅަންވާނެކަމަށްވަނީ ބަޔާންކޮށްފައެވެ. އަދި އެކަންކަމާއި ގުޅޭގޮތުން ބޯޑުން ކަނޑައަޅާ ސިޔާސަތުތައް ގަވަރުނަރު ތަންފީޒުކުރަންވާނެކަމަށްވަނީ ބަޔާންކޮށްފައެވެ.
ފޮރިން އެކްސްޗޭންޖް ރޭޓާއި ބެހޭ ކަންކަމާއި ގުޅޭގޮތުން ބިލްގައި ބަޔާންކޮށްފައިވަނީ އެކްސްޗޭންޖް ރޭޓްގެ ނިޒާމް އޮތޯރިޓީގެ ލަފަޔާ އެއްގޮތްވާ ގޮތުގެމަތިން ކަނޑައަޅާނީ ރައީސުލްޖުމްހޫރިއްޔާކަމަށެވެ. އަދި އެކްސްޗޭންޖް ރޭޓްގެ ނިޒާމު ތަންފީޒުކުރުމަށްޓަކައި އެކްސްޗޭންޖް ރޭޓް އަދި އެކްސްޗޭންޖް ރޭޓާބެހޭ ސިޔާސަތުތައް ކަނޑައަޅާނީ ތަންފީޒުކުރާނީ އޮތޯރިޓީންކަމަށްވަނީ ބަޔާންކޮށްފައެވެ.
