އުތުރުގެ ތިން އަތޮޅެއްގެ ފެރީ ނިޒާމަށް ބޭނުންވާ ފެރީ ކުއްޔަށް ހޯދަން އިއުލާންކޮށްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ފެރީ ނިޒާމުގައި ޒޯން 1 ގެ ހއ، ހދ އަދި ޒޯން 2 ގެ ނ އަތޮޅަށް ބޭނުންވާ ފެރީ ކުއްޔަށް ދޭނެ ފަރާތެއް ހޯދުމަށް އެ ކުންފުނިން އިއުލާންކޮށްފިއެވެ.

އެމްޓީސީސީން ކޮށްފައިވާ އިއުލާނުގައިވާ ގޮތުން، ހއ، ހދ އަދި ޒޯން 2 ގެ ނ އަތޮޅަށް ބޭނުންވާ ފެރީ ކުއްޔަށް ދޭނެ ފަރާތެއް ހޯދުމަށް ބޭނުންވާތީ، އެ މަސައްކަތް ކުރަން ޝައުގުވެރިވާ ފަރާތްތަކުން މި މަހުގެ 13 ވަނަ ދުވަހު މައުލޫމާތު ސާފުކުރުމަށްފަހު، މި މަހު 20 ގެ ކުރިން ބިޑް ހުށަޙެޅުމަށްވަނީ ހުޅުވާލާފައެވެ.

އެމްޓީސީސީއަކީ ރާއްޖޭގެ އެކި ހިސާބުތަކަށް ފެރީގެ ހިދްމަތުގެ އިތުރުން، ރާއްޖޭގެ ބިން ބޮޑެތި މާލެ ސިޓީއާއި އައްޑޫ ސިޓީފަދަ ތަންތަނުގައި އެއްގަމު ދަތުރުފަތުރުގެ ނިޒާމުގައި ބޭނުންކުރާ ބަހުގެ ހިދްމަތްވެސް ފޯރުކޮށްދޭ ކުންފުންޏެކެވެ. ރާއްޖޭގެ ރަށްރަށުގެ ބިން ހިއްކުމުން ފެށިގެން ބަނދަރު ހެދުމާއި އުމްރާނީ ތަރައްގީގެ ގިނަ މަސައްކަތްތަކެއް އެމްޓީސީސީން މިހާރުވެސް ރާއްޖޭގެ އެކި ރަށްރަށުގައި ހިންގަމުންދެއެވެ.

މުޅި ރާއްޖެ ދަތުރުފަތުރުގެ ނިޒާމަކުން ގުޅާލުމާއި، ލަފާފުރުމުގެ ދަތިތައް ހައްލުކުރުމަކީ މި ސަރުކާރުން އިސްކަންދޭ މުހިއްމު ސިޔާސަތުތަކެވެ. އެގޮތުން އަންނަ އަހަރުގެ ޕީއެސްއައިޕީ ބަޖެޓުގެ ތެރެއިންވެސް މިކަންކަމަށް 2.78 ބިލިއަން ރުފިޔާ ހަރަދުކުރުމަށްވަނީ ކަނޑައަޅާފައެވެ. އަދި ދަތުރުފަތުރަށް ހާއްސަކޮށް، 70 މިލިއަން ރުފިޔާ ހަރަދުކުރުމަށްވަނީ ނިންމާފައެވެ.