ހޯމަ ދުވަހު ކޮވިޑަށް ޕޮޒިޓިވްވީ 15 މީހުން ކަމަށް އެޗްޕީއޭއިން ހާމަކޮށްފިއެވެ.

ހެލްތް އިމަރޖެންސީ އޮޕަރޭޝަން ސެންޓަރުން އާންމުކޮށްފައިވާ މައުލޫމާތުތައް ދައްކާ ގޮތުން އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00 އާއި ހަމައަށް 1731 ސާމްޕަލް ނަގާ ޓެސްޓް ކޮށްފައިވާ އިރު އޭގެ ތެރެއިން ޕޮޒިޓިވްވީ 15 މީހުންނެވެ. އަދި މި 15 މީހުންގެ ތެރެއިން 14 މީހަކު ޕޮޒިޓިވްވީ މާލެ ސަރަހައްދުންނެވެ. މީގެ އިތުރުން ރިސޯޓަކުން އިތުރު މީހަކު ވަނީ ޕޮޒިޓިވްވެފައެވެ.

އިތުރު 15 ކޭސްއާއެކު ކޮވިޑް ޖެހުނު މީހުންގެ ޖުމްލަ އަދަދު ވަނީ 13213ށް އަރާފައެވެ. މީގެ ތެރެއިން 12437 މީހަކު ވަނީ ބަލިން ރަނގަޅުވެފައެވެ. މިއާއެކު ފަރުވާދެމުން ދަނީ 722 މީހަކަށެވެ. 722 މީހުންގެ ތެރެއިން 70 މީހަކަށް ދަނީ އެޑްމިޓްކޮށްގެން ފަރުވާދެމުންނެވެ.

އެޗްޕީއޭގެ ތަފާސް ހިސާބުތަކަށް ބަލާ އިރު، 722 އެކްޓިވް ކޭސްގެ ތެރެއިން މާލެ ސަރަހައްދުގައި ހިމެނެނީ 522 ކޭސްއެވެ. އަދި އަތޮޅު ތެރޭގައި 28 ކޭސް ހިމެނޭ އިރު، ރިސޯޓްތަކުގައި 41 ކޭސް، ޔޮޓް އަދި ސަފާރީގައި 3 ކޭސް ހިމެނެއެވެ. މީގެ އިތުރުން ތަރައްގީކުރަމުން އަންނަ ރަށްތަކުގައި 92 ކޭސް ހިމެނޭ އިރު ސިނާއީ މަސައްކަތްކުރާ ރަށްރަށުގައި 2 ކޭސް ހިމެނެއެވެ.

ރާއްޖޭގެ ރިކަވަރީ ރޭޓަށް ބަލާ އިރު، ގިނަ ދުވަސްތަކަކަށްފަހު އަނެއްކާ ވެސް ރިކަވަރީ ރޭޓް ވަނީ މައްޗަށް ޖެހިލާފައެވެ. އެގޮތުން މިހާރު ރިކަވަރީ ރޭޓް ހުރީ 94.13 އިންސައްތައިގައެވެ. 47 މީހަކު ނިޔާވެފައިވާ އިރު، މި އަދަދު ހުރީ 0.36 އިންސައްތައިގައެވެ. ހޮސްޕިޓަލުގައި ފަރުވާދެމުންދާ މީހުންގެ އިންސައްތައަކީ 9.71އެވެ.

ރާއްޖޭގައި ޕޮޒިޓިވްވި 13,213 މީހުންގެ ތެރޭގައި ގިނައީ ދިވެހިންނެވެ. އެގޮތުން 8320 ދިވެހިން ހިމެނޭ އިރު ދެން އެންމެ ގިނައީ ބަންގުލަދޭޝްގެ މީހުންނެވެ. ބަންގުލަދޭޝްގެ 3263 މީހުން ހިމެނޭ އިރު ދެން އެންމެ ގިނައީ 768 މީހުންނާއެކު އިންޑިއާ މީހުންނެވެ.

އުމުރު ފުރާތަކަށް ބަލާ އިރު އެންމެ ގިނައީ 21-30 އަހަރާއި ދެމެދުގެ މީހުންނެވެ. ރާއްޖެއިން ކޮވިޑް ފެނުނުތަކާ ހޯމަ ދުވަހަށް 275 ދުވަސް ވަނީ ވެފައެވެ.