އަންނަ އަހަރަށް ލަފާކޮށް ކަނޑައަޅާފައިވާ ބަޖެޓުގެ ތެރެއިން ހއ. ދިއްދޫއަށް ދިމާވެފައިވާ ރަށްގިރުމުގެ މައްސަލައަށް ހައްލު ލިބިގެންދާނެ ކަމަށް ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ ރައްޔިތުންގެ މަޖިލީހުގެ 'އާސްކް ސްޕީކަރ' ޕްރޮގާމްގައި ދިއްދޫގެ ރައްޔިތަކު އެރަށަށް ދިމާވެފައިވާ ރަށްގިރުމުގެ މައްސަލައަށް ހައްލެއް ލިބިގެން ދާނީ ކޮންއިރަކުންތޯ ކުރެއްވި ސުވާލަށް ޖަވާބު ދެއްވަމުންނެވެ.

ރައީސް ނަޝީދު ވިދާޅުވީ ރަށްގިރުމުގެ މައްސަލަތަކަކީ ނުހަނު ކަންބޮޑުވާ ކަމެއް ކަމަށެވެ.

މީގެ އިތުރުން ރައީސް ނަޝީދު ވިދާޅުވެފައި ވަނީ އެންމެ މުހިއްމު ކަމަކީ ހުރި ފަސްކޮޅު ގިރިގެންދިއަ ނުދީ ހިފެހެއްޓުމަށް މަސައްކަތް ކުރުން ކަމަށެެވެ. ވުމާއެކު ކޯސްޓަލް ޕްރޮޓެކްޝަން ތޮށިލުމާއި ރަށް ގިރުމުގެ މައްސަލައަށް ހައްލު ހޯދުން އެއީ ރާއްޖޭގައި ހާއްސަ ސަމާލުކަމެއް ދީގެން ކުރަން ޖެހޭ ކަމެއް ކަމަށް ނަޝީދު ފާހަގަ ކުރެއްވިއެވެ.

ނަޝީދު ވިދާޅުވީ 2021 ވަނަ އަހަރު ދިއްދޫއަށް ދިމާވެފައިވާ ރަށްގިރުމުގެ މައްސަލައަށް އަވަސް ހައްލެއް ލިބިގެންދާނެ ކަމަށެވެ. ސަބަބަކީ މިހާރު ރާއްޖެ އަންނަ ފަތުރުވެރިންގެ އަދަދު އިތުރުވެ، ފަތުރުވެރިކަމުގެ ސިނާއަތް ރަނގަޅުވަމުން އައުމާއެކު ދައުލަތުގެ އާމްދަނީ ރަނގަޅުވެގެން ދިއުން ކަމަށް ރައީސް ނަޝީދު ފާހަގަ ކުރެއްވިއެވެ.

ރައީސް ނަޝީދު އިތުރަށް ވިދާޅުވީ ސަރުކާރަށް ދިއްދޫގެ މުހިއްމުކަން ވަކި ކުޑައެއް ނުވާނެ ކަމަށެވެ. އަދި 2021 ވަނަ އަހަރުގެ ބަޖެޓުގައި ދިއްދޫއަށް ދިމާވެފައިވާ މައްސަލަ ހައްލު ކުރުމަށް ހިމަނާފައިވާކަމަށާއި ސަރުކާރުން އެރަށުގެ ރައްޔިތުންނަށް އަޅާލާނެ ކަމަށް ރައީސް ނަޝީދު ވިދާޅުވިއެވެ.