މާލެ ސަރަހައްދުން ކޮވިޑަށް ހުށަހެޅުނީ 38000 މީހުން
6 ޑިސެމްބަރު 2020 | އާދީއްތަ 18:29މާލޭގެ އާބާދީއަކީ 200،8000 ކަމުގައިވާ ނަމަ ގާތްގަނޑަކަށް ކޮވިޑަށް ހުށަހެޅިފައިވަނީ 38،000 މީހުން
ޓެސްޓް ހެދުމަށް ކުޑަކުއްޖެއްގެ އަތުން ލޭ ނަގަނީ
މާލެ ސަރަހައްދުގައި ކޮވިޑަށް ހުށަހެޅުނީ 38000 މީހުން ކަމަށް ސީރޯ ޕްރިވިލެންސް ސްޓަޑީން ދައްކައިފިއެވެ.
ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގައި އާދީއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ދިވެހިރާއްޖޭގެ ގައުމީ ޔުނިވަރސިޓީގެ ޑިރެކްޓަރ އޮފް ރިސަރޗް ޑރ. ރަހީމާ އަބްދުއް ރަހީމް ވިދާޅުވީ ސިރޯ ޕްރިވިލެންސްގެ ތެރެއިން ޓެސްޓް ކުރި މީހުންގެ ތެރެއިން 13.4 އިންސައްތަ މީހުންގެ ހަށިގަނޑުގައި އެންޓިބޮޑީ ހުރިކަމަށް ދައްކާކަމަށެވެ. މާނައަކީ މާލޭގެ އާބާދީއަކީ 200،800 ކަމުގައިވާ ނަމަ ކޮވިޑަށް ހުށަހެޅިފައިވަނީ ގާތްގަނޑަކަށް 38،000 މީހުންނެވެ.
އޭނާ ވިދާޅުވީ ކޮވިޑް ޖެހިފައިވާ މީހުންގެ ތެރެއިން ރާއްޖެ މީހުންނާއި ބިދޭސީންނާއި ވަކިކޮށްލާއިރު ބިދޭސީންގެ 36.4 އިންސައްތަ މީހުންގެ ހަށިގަނޑުގައި އެންޓިބޮޑީސް ހުރިކަމަށް ދައްކާ ކަމަށެވެ. އަދި އެންޓިބޮޑީސް ނެތްކަމަށް ދައްކާ އިންސައްތައަކީ 63.6 އެވެ. އަދި ދިވެހިންގެ ހަށިގަނޑުގައި އެންޓި ބޮޑީސް ހުރިކަމަށް ދައްކަނީ 8.5 އިންސައްތަ މީހުންގެ ކަމަށާއި، އެންޓިބޮޑީސް ނެތްކަމަށް ދައްކަނީ 91.5 އިންސައްތަ މީހުންގެ ކަމަށެވެ.
ސިރޯ ޕްރިވިލެންސް ސާވޭ ކުރިޔަށް ގެންދިޔައީ ހަތަރު އުމުރުފުރައަކަށް ބަހާލައިގެންނެވެ. އެއީ 17 އަހަރުން ދަށުގެ ކުދިންނާއި 18 އަހަރާއި 34 އަހަރާ ދެމެދުގެ މީހުންނާއި 35 އަހަރާއި 59 އަހަރާ ދެމެދުގެ މީހުން އަދި އުމުރުން 60 އަހަރުން މަތީގެ އުމުރުފުރާތަކެވެ.
