އިންސާފު ލިބުން ލަސްވަމުންދާތީ އިދިކޮޅުން މަޖިލީހަށް ކުއްލި މައްސަލައެއް ހުށައަޅައިފި
މި މައްސަލަ ހުށައަޅުއްވާފައިވަނީ މަޑުއްވަރީ ދާއިރާގެ މެމްބަރު
މަޑުއްވަރީ ދާއިރާގެ މެންބަރު އާދަމް ޝަރީފް
އިންސާފު ލިބުން ލަސްވަމުން ދާކަމަށްބުނެ އިދިކޮޅު ފަރާއްތަކުން ރައްޔިތުންގެ މަޖިލީހަށް ކުއްލި މައްސަލައެއް ހުށައަޅައިފި އެވެ.
އިދިކޮޅުގެ ފަރާތުން މި މައްސަލަ ހުށައަޅުއްވާފައިވަނީ މަޑުއްވަރީ ދާއިރާގެ މެމްބަރު އާދަމް ޝަރީފްއެވެ. އެގޮތުން މެމްބަރުގެ ހުށައެޅުމުގައި ވިދާޅުވެފައިވަނީ ޢަދުލު އިންޞާފު ޤާއިމުކުރުމަކީ އިސްލާމް ދީނާއި ދިވެހިރާއްޖޭގެ ޖުމުހޫރިއްޔާގެ ޤާނޫނު އަސާސީން އިންތިހާއަށް ބާރުއަޅާ ކަމެއް ކަމަށެވެ. އަދި އިންޞާފު ޤާއިމުކޮށް، ޙައްޤުތައް ރައްކާތެރި ކޮށްދިނުމަކީ ދިވެހި ދައުލަތަށް ލާޒިމުކުރާ އަދި ދީމިޤްރާތީ ވެރިކަމެއްގެ އެންމެ މުހިންމު އުންސުރުކަމު ޤަބޫލުކުރައްވާ ކަމަށެވެ.
މީގެ އިތުރުން އިންޞާފު ލަސްވުމަކީ އިންޞާފު ނުލިބުން ކަމަށް ގިނަ މުފައްކިރުން ދެކޭކަމަށް މެމްބަރުގެ ހުށައެޅުމުގައިވެ އެވެ. އެގޮތުން ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އިންޞާފު ލިބުން ލަސްވުމާއި، އެކަމުގެ ސަބަބުން ރައީސް ޔާމީނަށް ނުޙައްޤު އަނިޔާތައް ލިބުމާއި އަދި އެމަނިކުފާނުގެ ޙައްޤުތައް ގެއްލެމުންދާކަމަށް ވަނީ ވިދާޅުވެފަ އެވެ.
އަދި ނުހަނު އަނިޔާވެރި ގޮތެއްގައި މަރާލާފައިވާ ރ. މީދޫ ފެންފިޔާޒުގެ މުޙައްމަދު އަނަސް އާއި ޑރ. އަފްރާޝީމް ޢަލީ އާއިޔާމީން ރަޝީދާއި ގެއްލުވާލާފައިވާ ރިޝްވާން ޢަބްދުﷲ ގެ މަރުގެ މައްސަލަ ފަދަ އެތައް މައްސަލައަކަށް އިންޞާފު ނުލިބި ލަސްވަމުން ދާކަމަށްވެސް ވަނީ ފާހަގަ ކުރައްވާފަ އެވެ. އަދި އިންޞާފު ލިބޭނެކަމުގެ ޔަޤީންކަމެއް ނެތި، އެތައް ޢާއިލާތަކެއް މާޔޫސްވެ، އުއްމީދުގެއްލި، އަދި އެ ޢާއިލާތަކުގެ ޙައްޤުތައް ގެއްލެމުންދާކަމަށް ވަނީ ވިދާޅުވެފަ އެވެ.
ވުމާއެކު އިންޞާފު ލިބުން ލަސްވަމުންދާ މިފަދަ މައްސަލަތަކަށް އަވަސް ޙައްލެއް ހޯދައިދީ، ތަޙުޤީޤު ކުރުމާއި ޝަރުޢީ ނިޒާމުގެ ތެރެއަށް ނުފޫޒު ފޯރުވުމެއް ނެތި، އިންޞާފު ލިބޭނެކަމުގެ އިތުބާރު ރައްޔިތުންނަށް ހޯދައިދީ، އިންޞާފު ޤާއިމް ކުރުން އަވަސް ކުރެވޭނެ ގޮތްތަކެއް ހޯދުމަށް ވަނީ އެދިފަ އެވެ. އަދި ދައުލަތުގެ ސަމާލުކަން ދިނުމަށް އެދި، ރައްޔިތުންގެ މަޖިލީހުގެ 179 ވަނަ މާއްދާގެ ދަށުން މިމައްސަލަ ރައްޔިތުންގެ މަޖިލީހަށް ހުށައަޅާކަމަށް މެމްބަރު ވަނީ ވިދާޅުވެފަ އެވެ.
