ބީއެމްއެލްގެ އެހީގައި ކަނޑިތީމުގައި ކޮމިއުނިޓީ ޕާކެއް ތަރައްގީކޮށްފި އެވެ.
ބީއެމްއެލް އިން ބުނީ މި ޕާކު ތަރައްގީކޮށް ހުޅުވާފައިވަނީ، އަމިއްލަ ފަރުދުންނާއި ހިލޭ ސާބަހަށް މަސައްކަތްކުރާ ޖަމިއްޔާ ޖަމާއަތްތަކުން ރަށްރަށުގައި ހިންގަން ބޭނުންވާ އެކިއެކި ޕްރޮޖެކްޓްތަކަށް މާލީ އެހީތެރިކަން ފޯރުކޮށްދިނުމަށް ހުޅުވާފައިވާ "އަހަރެންގެ ބޭންކް ކޮމިއުނިޓީ ފަންޑު" ގެ ދަށުންކަމަށެވެ. މީގެ އިތުރުން މި ޕާކު ހުޅުވުމުގެ މައިގަނޑު މަގްސަދަކީ ހުރިހާ އުމުރުފުރާއެއްގެ މީހުންނަށް އެކަށީގެންވާ ހިތްފަސޭހަ މާހައުލެއް ގާއިމް ކުރުމާއެކު، ދޭދޭ ފަރުދުންގެ ގުޅުން ބަދަހި ކުރުމަށާއި، ދަތުރު ދިޔުމާއި، ކަސްރަތު ކޮށްލެވޭނެ މާހައުލެއް ގާއިމް ކުރުމަށް ކަމަށެވެ.
ކަނޑިތީމުގައި ގާއިމް ކޮށްފައިވާ މި ޕާކުގައި ބާބަކިއު ހެދުމަށް ހާއްސަ ސަރަހައްދެއް ވާނެކަމަށް ބީއެމްއެލްއިން މައުލޫމާތުދެއެވެ. މަސްކެނޑުމަށް މޭޒާއި، ކުޑަކުދިންނަށް ހާއްސަކޮށް އުނދޯލި ތައްޔާރުކުރުމުގެ އިތުރުން އާއްމުންނަށް އިށީންދެވޭނެ ބެންޗުވެސް ވަނީ އެ ސަރަހައްދުގައި ގާއިމްކޮށްފައެވެ. އަދި ހުރިހާ އުމުރުފުރައެއްގެ މީހުންނަށް ބޭނުން ކުރެވޭނެ އައުޓްޑޯ ޖިމެއްވެސް މި ޕާކުގެ ތެރޭގައި ވަނީ ގާއިމްކޮށްފައެވެ.
ދަތުރުދާ ފަރާތްތަކަށް ހާއްސަކޮށް ޕާކުގައި ވަނީ އައުޓްޑޯ ޝަވަރ، ބީޗް ހަޓްގެ އިތުރުން ސަން ބެޑްވެސް ވަނީ މި ސަރަހައްދުގައި ބެހެއްޓިފައެވެ. ބީއެމްއެލްއިން ބުނީ މި ޕާކު ގާއިމް ކުރުމަށް ޕްރޮޕޯޒަލް ހުށައަޅާފައިވަނީ ޖިނާން މުހައްމަދު ޝަމީމްގެ އިތުރުން މުހައްމަދު ޝިފާން އަދި ރީޔޫނިއަން ކްލަބް ގެ ފަރާތުންކަމަށެވެ.
ބޭންކް އޮފް މޯލްޑިވްސްގެ "އަހަރެންގެ ބޭންކް ކޮމިއުނިޓީ ފަންޑު" ގެ ދަށުން ގިނަ އެހީތަކެއް ފޯރުކޮށްދީފައިވާއިރު މިހާތަނަށް މި ފަންޑުން ވަނީ 30 ރަށެއްގެ މަޝްރޫއު ހިންގުމަށް އެހީތެރިކަން ފޯރުކޮށްދީފައެވެ.
