1753 ސާމްޕަލް އިން ޕޮޒިޓިވްވީ 37 މީހުން!
މާލޭ ސަރަހައްދުން 30 މީހުން ވަނީ ޕޮޒިޓިވްވެފައި
ކޮވިޑް-19 ގެ ރޭންޑަމް ސާމްޕަލް ނަގަނިކޮށް
ފާއިތުވެދިޔަ 24 ގަޑިއިރު ތެރޭގައި ރާއްޖެއިން ކޮވިޑް-19 އަށް ޕޮޒިޓިވްވެފައިވަނީ 37 މީހުން ކަމަށް ހެލްތު ޕޮރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުން ބުރާސްފަތި ދުވަހުގެ އިރުއޮއްސި 06:00 އިން ހުކުރު ދުވަހުގެ އިރުއޮއްސި 06:00 އާއި ހަމައަށް 1،753 މީހެއްގެ ގައިން ކޮވިޑްގެ ސާމްޕަލް ޓެސްޓު ކޮށްފައިވާއިރު، އޭގެތެރެއިން ޕޮޒިޓިވްވެފައިވަނީ 37 މީހުންނެވެ.
މާލޭ ސަރަހައްދުން 30 މީހުން ފާއިތުވެދިޔަ 24 ގަޑިއިރު ތެރޭގައި ޕޮޒިޓިވްވެފައިވާއިރު، އަތޮޅުތެރެއިން 2 މީހުން ވަނީ ޕޮޒިޓިވްވެފައެވެ. އަދި އެހިނިހެން ގޮތްގޮތުން (ކަނޑުމަތިން) 3 މީހަކު ވަނީ ޕޮޒިޓިވްވެފައެވެ.
އިތުރު 37 މީހަކު ކޮވިޑަށް ޕޮޒިޓިވްވުމާއިއެކު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 13،143 އަށް އަރައިފައެވެ. އަދި މިބަލިން 12،199 މީހަކު ރަނގަޅުވެފައިވާއިރު، ހޮސްޕިޓަލުގައި އެޑްމިޓްކޮށްގެން 78 މީހަކަށް އަންނަނީ ފަރުވާދެމުންނެވެ.
މިބަލީގައި ރާއްޖެއިން މިހާތަނަށް 47 މީހަކު ވަނީ ނިޔާވެފައެވެ.
