ސަރުކާރު ފްލެޓްތަކުގެ ކުލި ދެއްކުމުގެ މުއްދަތު އިތުރުކޮށްފި
ކުލި ދެއްކުމުގެ މުއްދަތު ފަސްކުރުމަށް އެދި ގިނަ ފަރާތްތަކަކުން އަންނަނީ އެދެމުން
ސަރުކާރުން ތިނަދޫގައި އަޅާފައިވާ ފްލެޓްތައް
ގެދޮރުވެރިކަމުގެ ޕްރޮގްރާމްގެ ދަށުން މާލޭ، ހުޅުމާލެ، އަދި އަތޮޅުތެރޭ ރަށްރަށުން ދޫކޮށްފައިވާ ފްލެޓްތަކަށް ފައިސާ ދެއްކުން ފަސްކޮށްދިނުމަށް އެދި ގިނަ ފަރާތްތަކަކުން ހުށަހަޅަމުންދާތީ އެ މުހުލަތު މިނިސްޓްރީ އޮފް ޕްލޭނިން، ހައުސިން އެންޑް އިންފްރާސްޓްރަކްޗާއިން އިތުރުކޮށްދީފިއެވެ.
ހައުސިން މިނިސްޓްރީން ބުނީ އެ ޥުޒާރާއިން ސެޕްޓެމްބަރު މަހުން ފެށިގެން ޑިސެމްބަރު މަހުގެ ނިޔަލަށް ފްލެޓްތަކުގެ ކުލި ދެއްކުން ފަސްކުރުމަށް އެދޭ ފަރާތްތަކުން ފޯމު ހުށަހެޅުމުގެ މުއްދަތު އޮކްޓޯބަރ މަހުގެ 15 ވަނަ ދުވަހާއި ހަމައަށް ހުޅުވާލި ނަމަވެސް އަދިވެސް އެކަމަށް އެދި ގިނަ ފަރާތްތަކުން އަންނަނީ މިނިސްޓްރީގައި އެދެމުން ކަމަށެވެ.
އެހެންކަމުން ސެޕްޓެމްބަރުން ފެށިގެން ޑިސެމްބަރު މަހުގެ ނިޔަލަށް ކުލި ފަސްކުރުމަށް އެދޭ ފަރާތްތަކަށް، މި ފުރުސަތު މި ހިނގާ ޑިސެމްބަރު މަހުގެ 15 ވަނަ ދުވަހުގެ ނިޔަލަށް ހުޅުވާލާފައިވާ ކަމަށް ހައުސިންގ މިނިސްޓްރީން ބުނެއެވެ. ނަމަވެސް ކުރިން ކުލި ފަސްކުރުމަށް އެދި ހުށަހެޅި ފަރާތްތަކުން، އަލުން ހުށަހަޅަން ނުޖެހޭނެ ކަމަށެވެ.
ކުލި ފަސްކުރާ މުއްދަތުގައިވެސް މެއިންޓެނެންސް ފީ ދައްކަން ޖެހެއެވެ. އަދި ކުލި ފަސްކޮށްދެނީ، އެ މުއްދަތު އެގްރިމެންޓަށް އިތުރުކުރާ ގޮތަށް ކަމަށް މިނިސްޓްރީން މައުލޫމާތުދީފައިވެއެވެ.
ކުލި ފަސްކުރަން ބޭނުންވާ ފަރާތްތަކުން ޑިސެމްބަރު މަހުގެ 15 ވަނަ ދުވަހުގެ ކުރިން އައިޑީކާޑުގެ ކޮޕީއާއި މިނިސްޓްރީއާއެކު ކުރެވިފައިވާ އެގްރިމެންޓުގެ ނަންބަރު އެނގޭނެހެން އީމެއިލް ކުރުމަށް ހައުސިންގ މިނިސްޓްރީގެ އީމެއިލް ކަމަށްވާ beneficiary@planning.gov.mv އީމެއިލް ކުރުމަށް މިނިސްޓްރީން ވަނީ އަންގާފައެވެ.
