ނުކުޅެދުންތެރިކަން ހުންނަ މީހުންގެ ޙައްޤުތައް ގެއްލިގެން ފާއިތުވި 4 އަހަރު 72 މައްސަލައެއް ހިއުމަން ރައިޓްސް ކޮމިޝަން (އެޗްއާރްސީއެމް) އަށް ހުށައެޅިފައިވާ ކަމަށް އެ ކޮމިޝަނުން ބުނެފިއެވެ.

ނުކުޅެދުންތެރިކަން ހުންނަ މީހުންގެ ދުވަހުގެ ގޮތުގައި ފާހަގަކުރާ ބައިނަލްއަގްވާމީ ދުވަހުގެ މުނާސަބަތުގައި އެޗްއާރްސީއެމް އިން ނެރުނު ބަޔާނެއްގައި ބުނީ، ނުކުޅެދުންތެރިކަން ހުންނަ މީހުންގެ ދުވަހާއި ގުޅިގެން އ.ދ. އިން މިއަހަރު ކަނޑައަޅާފައިވާ ޝިއާރަކީ "ކުރިއަށްވުރެ ފުރިހަމައަށް ބިނާކުރުން- ނުކުޅެދުންތެރިކަން ހުންނަ ފަރާތްތައް ޝާމިލުވާ، ޚިދުމަތްތަކަށް ފަސޭހައިން ވާސިލުވެވޭ، ދެމެހެއްޓެނިވި މުޖުތަމަޢުއެއް ކޮވިޑް19 އަށްފަހު ބިނާކުރުމަށް" ކަމަށެވެ.

އެޗްއާރްސީއެމް އިން ބުނީ، މި ޝިޢާރުގެ މައިގަނޑު މަޤްސަދަކީ ދުނިޔެއަށް ދިމާވެފައިވާ ކޮވިޑް-19 ގެ ބަލި މަޑުކަމުން އަރައިގަނެ، އާންމު ހާލަތަށް ރުޖޫއަވުމަށް ކުރަމުންދާ މަސައްކަތުގައި ނުކުޅެދުންތެރިކަން ހުންނަ ފަރާތްތަކުގެ ބައިވެރިވުން ހިމެނުމާއި، ޚިދުމަތްތަކަށް ފަސޭހަކަމާއެކު ވާސިލުވެވޭނެ، ދެމެހެއްޓެނިވި ގޮތަކަށް ޤައުމު ބިނާކުރުން ކަމަށެވެ.

ދުނިޔޭގެ އާބާދީގެ %15 މީހުންނަކީ ކޮންމެވެސް ނުކުޅެދުންތެރިކަމެއް ތަޙައްމަލު ކުރަމުންދާ ބައެއްކަން ފާހަގަކޮށް އެޗްއާރްސީއެމް އިން ބުނީ، ނުކުޅެދުންތެރިކަން ހުންނަ މީހުންގެ ޙައްޤުތައް ގެއްލިގެން ފާއިތުވި 4 އަހަރު ދުވަހުގެ ތެރޭގައި ޖުމްލަ 72 މައްސަލައެއް ހިއުމަން ރައިޓްސް ކޮމިޝަނަށް ހުށައެޅިފައިވާ ކަމަށެވެ. އެގޮތުން ކޮމިޝަނުން ބަލައިފައިވާ މައްސަލަތަކުގެ ތެރޭގައި، ޢާއިލާގެ ފަރާތުން ލިބެންޖެހޭ އަޅާލުން ނުދިނުމާއި، އިހުމާލުގެ މައްސަލަތަކާއި، އާއިލާއިން އެދިގެން ނުކުޅެދުންތެރިކަން ހުންނަ ފަރާތްތައް ދައުލަތުގެ ބެލުމުގެ ދަށަށް ބަދަލު ކޮށްދިނުމަށް އެދި ހުށަހަޅައިފައިވާ މައްސަލަތައް ހިމެނޭ ކަމަށް އެ ކޮމިޝަނުން މައުލޫމާތު ދެއެވެ.

ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކަށް ރައްކާތެރިވެ، ކަންކަން ނިންމުމުގައި އެމީހުންގެ ބައިވެރިވުން އިތުރުކޮށް، ޚިދުމަތްތަކަށް ފަސޭހައިން ވާސިލުވެވޭނެ ހަރުދަނާ އަދި ފަސޭހަ ގޮތްތަކެއް އެކަށައެޅުމަކީ މުހިއްމު ކަމެއް ކަމަށް އެޗްއާރްސީއެމްގެ ބަޔާނުގައި ފާހަގަ ކޮށްފައިވެއެވެ. އެއާއެކު ދަތުރުފަތުރު ކުރުމާއި، ހިނގާބިނގާވެ އުޅުމާއި، ތަންތަނަށް ވަދެނިކުމެ އުޅުމުގައި ފަސޭހަ ގޮތްތަކެއް އެކުލަވާލުމަށް އެޗްއާރްސީއެމުން ވަނީ ދައުލަތަށް އިލްތިމާސް ކޮށްފައެވެ.