މަރަޑޯނާގެ ޑޮކްޓަރުގެ މައްޗަށް އިހުމާލުވުމުގެ ދައުވާ އުފުލައިފި

އާޖެންޓީނާގެ ފުޓްބޯޅަ ލެޖެންޑް ޑިއޭގޯ މަރަޑޯނާގެ ޑޮކްޓަރު ލެއޮޕޮލްޑޯ ލޫކޭގެ މައްޗަށް ފަރުވާދިނުމުގައި އިހުމާލުވިކަމުގެ ދައުވާ އުފުލައިފިއެވެ.

އުމުރުން 60 އަހަރުގައި މަރަޑޯނާ މަރުވީ މިދިޔަ ހަފުތާގެ ބުދަ ދުވަހުގެރޭ ޖެހުނު ހާޓްއެޓޭކެއްގެ ސަބަބުން ކަމަށް ރިޕޯޓުތައް ބުނެއެވެ. އޭގެ ކުރިން މި މަހުގެ ކުރީކޮޅު އޭނާގެ ސިކުނޑީގައި ލޭ ކޮޅެއް ގަނޑުވެފައި ހުރުމުގެ ސަަބަބުން ވަނީ ކުއްލި އޮޕަރޭޝަނެއްވެސް ކޮށްފައެވެ. މަރަޑޯނާ މަރުވީ އެ އޮޕަރޭޝަނަށްފަހު ހޮސްޕިޓަލުން ދޫކޮށްލިތާ ދެ ހަފުތާއެއްހާ ދުވަސް ފަހުންނެވެ.

މަރަޑޯނާ މަރުވުމުގައި ސިއްހީ ކަންތައްތަކާ ބެހޭ ފަރާތްތަކުގެ އިހުމާލެއް އޮތް ކަމަށް އޭނާގެ އާއިލާއިން ތުހުމަތުކޮށްފައިވާއިރު، މަރަޑޯނާގެ ވަކީލު މަޓިއަސް މޯލާ ވަނީ މަރަޑޯނާ މަރުވި ދުވަހު އެމްބިއުލަންސްއަށް ގުޅައިގެން އެ އައުން ލަސްވި މައްސަލަ އާއި ސިކުނޑީގެ އޮޕަރޭޝަނަކަށްފަހު ދެ ހަފުތާއެއްހާ ދުވަސް ފަހުން ގެއަށް ބަދަލުކުރި މީހެއްގެ ސިއްހީ ކަންތައްތައް ބެލުމުގައި ހޮސްޕިޓަލުން އިހުމާލުވެފައިވާ މައްސަލަ ހުށަހަޅާފައެވެ.

އެއާއެކު މަރަޑޯނާގެ ޑޮކްޓަރުގެ މައްސަލަ ބަލަމުން އަންނައިރު، ދާދި ފަހުން ފުލުހުން ވަނީ އޭނާގެ ގެ ބަލައި ފާސްކޮށްފައެވެ. އަދި ޑޮކްޓަރުގެ އިތުރުން މަރަޑޯނާއަށް ފަރުވާ ދިނުމުގައި ހަރަކާތްތެރިވި ހުރިހާ ސިއްހީ އެހީތެރިންގެ މައްސަލަވެސް އާޖެންޓީނާގެ ޕްރޮސެކިއުޓަރުން އަންނަނީ ބަލަމުންނެވެ. މީގެ ތެރެއިން ޑޮކްޓަރުގެ މައްޗަށް ފަރުވާދިނުމުގައި އިހުމާލުވިކަމުގެ ދައުވާ މިހާރު އުފުލާފައިވާއިރު، މަރަޑޯނާގެ ޑޮކްޓަރާއި އެހެން ބައެއް ސިއްހީ އެހީތެރިންގެ މައްޗަށް އިހުމާލުން މީހަކު މަރުވުމުގެ ކުށުގެ ދައުވާ ކުރުންވެސް އެކަށީގެންވާ ކަމަށް އާޖެންޓީނާގެ މީޑިއާތަކުން ވަނީ ރިޕޯޓުކޮށްފައެވެ.

މި ދައުވާއާ ގުޅިގެން މަރަޑޯނާގެ ޑޮކްޓަރު ބުނީ އެއްވެސް އިހުމާލެއް ވެފައި ނުވާނެ ކަމަށާއި، މަސައްކަތްކުރީ ދެ ފުށް ފެންނަ ގޮތަށް، އެއްވެސް ކަމެއް ނުފޮރުވާ ކަމަށެވެ.

އާޖެންޓީނާގެ ރިޕޯޓުތައް ބުނާ ގޮތުން އޮޓޮޕްސީ ރިޕޯޓުގައި ހިމަނާފައި އޮތީ މަރަޑޯނާ މަރުވީ ނިދީގައި ހިތާއި ފުއްޕާމޭ ފެއިލްވެގެން ކަމަށެވެ. އެކަމަކު މަރަޑޯނާގެ ކަންތައްތައް ބެލުމަށް ހުރި ނަރުހަށް އޭނާ މަރުވި ސީދާ ގަޑިއެއް ބުންނަން ނޭނގުމުން، މަރަޑޯނާގެ މަރުގެ ސެޓްފިކެޓުގައި މަރުވި ގަޑިއެއް ޖެހުމުގައި މައްސަލަތަކެއް ދިމާވި ކަމަށްވެސް ވަނީ ރިޕޯޓުކޮށްފައެވެ.

މިދިޔަ ހަފުތާގެ ބުދަ ދުވަހުގެރޭ މަރަޑޯނާ މަރުވުމާއެކު އާޖެންޓީނާގެ ގިނަ އަދަދެއްގެ ރައްޔިތުން އަންނަނީ އެކަމާ ހިތާމަފާޅުކުރަމުންނެވެ. އާޖެންޓީނާއަށް 1986 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ކެޕްޓަން މަރަޑޯނާ އަކީ ފީފާއިން ހޮވި 20 ވަނަ ގަރުނުގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ފުޓްބޯޅަ ލެޖެންޑެކެވެ.