ރާއްޖެއަށް އިންޓެގްރޭޓެޑް ޓުއަރިޒަމް ގެންނަން ޖެހޭ: ރާއިދު
ބަރެސްދޫއަކީ ރާއްޖޭގެ ފުރަތަމަ އިންޓެގްރޭޓެޑް ރިސޯޓް
މޯލްޑިވްސް އިންޓެގްރޭޓެޑް ޓުއަރިޒަމް ޑިވަލަޕްމަންޓް ކޯޕަރޭޝަން (އެމްއައިޓީޑީސީ) ގެ މެނޭޖިންގެ ޑިރެކްޓަރ މުހައްމަދު ރާއިދު
އެއްމެ މީހެއްގެ މިލްކުގައި ފަތުރުވެރިކަން ހިންގާ ތަންތަން އޮތުމުގެ ބަދަލުގައި ރާއްޖެއަށް އިންޓެގްރޭޓެޑް ޓުއަރިޒަމް ގެންނަ ޖެހޭ ކަމަށް މޯލްޑިވްސް އިންޓެގްރޭޓެޑް ޓުއަރިޒަމް ޑިވަލަޕްމަންޓް ކޯޕަރޭޝަން (އެމްއައިޓީޑީސީ) ގެ މެނޭޖިންގެ ޑިރެކްޓަރ މުހައްމަދު ރާއިދު ވިދާޅުވެއްޖެއެވެ.
ރާއްޖެޓީވީގެ ފަލަސުހުރީ ޕްރޮގްރާމުގައި ވާހަކަދައްކަވަމުން ރާއިދު ވިދާޅުވީ މިއަދު ރާއްޖެއަށް އިންޓްގްރޭޓެޑް ޓުއަރިޒަމް އަންނަން ވެއްޖެ ކަމަށާއި، އެއް އޮޕަރޭޓަރަކަށް ނުވަތަ އެއް އޯނަރަކަށް ދިނުމުގެ ބަދަލުގައި ރަށްރަށުގައި ކޮމްޕޯނެންޓް ހަދައިގެން ގިނަ ބަޔަކަށް މަންފާ ލިބޭނެ ގޮތަކަށް ޓުއަރިޒަމް އިންޑަސްޓްރީ މަޑުމަޑުން ބައްޓަން ކުރަން ޖެހޭ ކަމަށެވެ.
ބަރެސްދޫއަކީ އިންޓެގްރޭޓެޑް ސިސްޓަމަށް ރާއްޖޭގައި ފުރަތަމަ ހުޅުވޭ ރިސޯޓްކަން ފާހަގަ ކުރައްވާ ރާއިދު ވިދާޅުވީ ބަރެސްދޫއަކީ 150 ކޮޓަރި ނުވަތަ 3000 އެނދުގެ ބޮޑު ޕްރޮޖެކްޓެއް ކަމަށެވެ. އަދި ފަޅު ނުހިއްކާ ގުދުރަތީ ރަށެއްގައި ހިންގޭނެ އެންމެ ބޮޑު ޕްރޮޖެކްޓަކީ އެއީ ކަމަށެވެ. އެގޮތުން ފޭސްތަކަށް ބަހާލައިގެން މި ދައުރުގެ ތެރޭގައި ބަރެސްދޫއަށް ފަތުރުވެރިން ގެނައުމަކީ އަމާޒެއް ކަމަށެވެ.
އިންޓެގްރޭޓެޑް ކޮންސެޕްޓަށް އެހެން ރަށްތަކެއް ތަރައްގީ ކުރުމާއި މެދު ހިޔާލަކީ ކޮބައިތޯ އެއްސެވެމުން ރާއިދު ވިދާޅުވީ އެމްއައިޓީޑީސީގެ މެންޑޭޓްގައި އޮތީ ކުދި އަދި މެދުފަންތީގެ ފަތުރުވެރިކަން ކުރިއެރުވުން ކަމަށާއި، އެހެންކަމުން ކުރިއަށްދާން ބޭނުންވަނީ އިންޓްގްރޭޓެޑް މޮޑެލްއަށް ކަމަށެވެ. އަދި ކުންފުނީގެ މަގްސަދުގެ ތެރޭގައި ރަށްރަށުގައި ކުރިއަށް ގެންދާ ފަތުރުވެރިކަމުގެ ކަންކަމުގައި އެހީތެރިވުން ވެސް ހިމެނޭ ކަމަށެވެ.
