ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ އެޓަލަންޓާ އަތުން ބަލިވެ ދެވަނަ ބުރަށް ކޮލިފައިވާން ލިވަޕޫލަށް އިތުރު އިންތިޒާރެއް ކުރަން ޖެހުނުއިރު، ރެއާލް މެޑްރިޑުން އިންޓަ މިލާން ބަލިކޮށްފިއެވެ.

ގްރޫޕް ޑީގައި ހިމެނޭ ލިވަޕޫލް ބަލިވީ އަމިއްލަ ދަނޑުގައި އެޓަލާންޓާ އަތުން 2-0 ގެ ނަތީޖާއަކުންނެވެ.

ގިނަ ބަދަލުތަކަކާއެކު ކުޅުނު ލިވަޕޫލަށް ރޭގެ މެޗުގައި އެންމެ އެދެވޭ ކުޅުމެއް ދެއްކިފައި ނުވާއިރު، މުޅި މެޗުގައިވެސް އެ ޓީމަށް އެޓަލާންޓާ ގޯލާ އަމާޒުކޮށް ހަމަލާއެއް އުފެއްދިފައެއް ނުވެއެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގެ ހަތަރު މިނެޓު ތެރޭ އެޓަލާންޓާއިން ވަނީ ދެ ލަނޑު ޖަހާފައެވެ. އެގޮތުން މެޗުގެ 60 ވަނަ މިނެޓުގައި ޔޯސިޕް އިލިޗިޗް އެޓަލާންޓާއަށް ލީޑު ނަގައިދިންއިރު، އޭގެ ހަތަރު މިނެޓު ފަހުން އެ ޓީމަށް ލީޑު ފުޅާކޮށްދިނީ ރޮބިން ގޮސެންސްއެވެ.

މި މެޗުން މޮޅުވެގެން ލިވަޕޫލަށް ދެވަނަ ބުރުގެ ޖާގައެއް ކަށަވަރުކުރެވެން އޮތް ނަމަވެސް، މި ވަގުތު ގްރޫޕުގެ އެއްވަނައިގައި އެ ޓީމު އޮތީ ހަތަރު މެޗުން ނުވަ ޕޮއިންޓާއެކުއެވެ، އަދި ދެވަނަ ބުރަށް ކޮލިފައިވަން ލިވަޕޫލަށް މަދުވެގެން ތިން ޕޮއިންޓް އަދި ބޭނުންވެއެވެ. މި ގްރޫޕުގެ ދެވަނައިގައި އޮތީ ބުދަ ދުވަހުގެރޭ މިޗީލޭންޑް އަތުން 3-1 ން މޮޅުވި އަޔަކްސްއެވެ. ދެވަނައިގައި އޮތް އަޔަކްސް އާއި ތިންވަނައިގައި އޮތް އެޓަލަންޓާއަށް ހަތަރު މެޗުން ހަތް ޕޮއިންޓް ލިބިފައިވާއިރު، ފުލުގައި އޮތް މިޗީލޭންޑަށް އަދި ޕޮއިންޓެއް ނުލިބެއެވެ.

މީގެ އިތުރުން މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް ވަނީ ބުދަ ދުވަހުގެރޭ ރަށުން ބޭރުގައި އިންޓަ އަތުން 2-0 ން މޮޅުވެފަ އެވެ.

އިންޓަގެ ދަނޑުގައި ކުޅުނު މި މެޗުގެ ވަރަށް ކުރީކޮޅު ރެއާލުން ވަނީ ލީޑު ނަގާފައެވެ. މެޗުގެ ހަތްވަނަ މިނެޓުގައި ލިބުނު ޕެނަލްޓީއަކުން މި ލަނޑު ރެއާލަށް ކާމިޔާބުކޮށްދިނީ އެޑެން ހަޒާޑެވެ. މި މެޗުގައި އިންޓައަށް މައްސަލަ ދިމާވީ މެޗުގެ 33 ވަނަ މިނެޓުގައި އެ ޓީމުގެ އާޓޫރޯ ވިޑާލަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އޭގެ ފައިދާ ނަގައި މެޗުގެ 59 ވަނަ މިނެޓުގައި ރެއާލުން ވަނީ ލީޑު ފުޅާކޮށްފައެވެ. މި ލަނޑަކީ އިންޓަގެ އަޝްރަފް ހަކީމީ އަތުން ބައިކޮޅަށް ވަން ލަނޑެކެވެ.

ގްރޫޕް ބީގައި ހިމެނޭ ރެއާލުން އިންޓަ ބަލިކުރިއިރު، މި ގްރޫޕުގެ އެއްވަނައިގައި މި ވަގުތު އޮތީ ބުދަ ދުވަހުގެރޭ ޝަޚްތަރު ޑޮނެސްކް އަތުން 4-0 ން މޮޅުވި ބޮރޫޝިއާ މޮންޗެންގްލަޑްބަކެވެ. އެ ޓީމަށް ހަތަރު މެޗުން އަށް ޕޮއިންޓް ލިބިފައިވާއިރު، ރެއާލް ދެވަނައަށް އެރީ ހަތަރު މެޗުން ހަތް ޕޮއިންޓާއެކުއެވެ. އަދި ތިންވަނައިގައި އޮތް ޝަޚްތަރަށް ހަތަރު މެޗުން ހަތަރު ޕޮއިންޓް ލިބިފައިވާއިރު، އިންޓަ ފުލުގައި އޮތީ ހަތަރު މެޗުން ދެ ޕޮއިންޓާއެކުއެވެ.