ހުޅުލެ-ހުޅުމާލެ ހައިވޭގައި ސޯލަރ ނިޒާމު ގާއިމުކުރުމުން 20 މިލިއަން ރުފިޔާ ސަލާމަތްކުރެވޭނެ
މި ޕްރޮޖެކްޓާއިއެކު ސޯލަރ ހަކަތައިން އުފައްދާ ކަރަންޓް ޔުނިޓަކަށް ޖެހޭ އަދަދުގެ ދެބައިކުޅަ އެއްބައި އަގުހެޔޮވާނެ
އެންވަޔަރަމެންޓް މިނިސްޓްރީގެ ޕާމަނަންޓް ސެކެޓްރީ އަޖުވަދު މުސްތަފާ
ހުޅުލެ-ހުޅުމާލެ ހައިވޭގައި ސޯލަރ ހަކަތަ އުފައްދާ ނިޒާމު ގާއިމުކުރުމާއިއެކު ދައުލަތުގެ ބަޖެޓުން ކަރަންޓް އުފެއްދުމަށް ކުރާ ހަރަދުގެ ތެރެއިން 20 މިލިއަން ރުފިޔާ ސަލާމަތްކުރެވޭނެ ކަމަށް އެންވަޔަރަމަންޓް މިނިސްޓްރީގެ ޕާމަނަންޓް ސެކެޓްރީ އަޖުވަދު މުސްތަފާ ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަދައްކަވަމުން އަޖުވަދު ވިދާޅުވީ ރައްޔިތުންގެ އެންމެ ބޮޑު ކަންބޮޑުވުމަކީ ކަރަންޓް ހަރަދު ބޮޑުވުން ކަމަށާއި، މި ޕްރޮޖެކްޓްގެ ދަށުން އެކަމަށް ހައްލު ލިބިގެންދާނެ ކަމަށެވެ. އަދި ހަމައެހެންމެ ސްޓެލްކޯއަށް މިހާރުވެސް މާލެ ސަރަހައްދަށް ބޭނުންވާ މިންވަރަށް ކަރަންޓް ނުއުފެއްދޭ ކަމަށާއި، އެހެންކަމުން މިހާރުވެސް މަގުމަތީގައި ޖަނަރޭޓަރު ބަހައްޓަން ޖެހޭ ފަހަރު އަންނަ ކަމަށެވެ.
އަޖުވަދު އިތުރަށް ވިދާޅުވީ، ހަމައެކަނި މިއަހަރަށް ބަލާލި ކަމުގައިވިޔަސް ސްޓެލްކޯގެ ޖެނެރޭޝަން ކެޕޭސިޓީއަށް 10 މެގަވޯޓު ޖަނަރޭޓަރުތައް އިތުރު ކުރެވިފައިވާނެ ކަމަށާއި، މިގޮތައް އެމަރޖެންސީކޮށް އިތުރުކުރަން ޖެހުނީ މާލެ އާއި ހުޅުމާލެ ކަރަންޓުގެ ސިސްޓަމް އެއް ވިއުގަޔަކުން ގުޅާލުމަށް ފަށާފައިވާ ޕްރޮޖެކްޓް ނިންމަން ތާވަލުކުރި ދުވަހަށް ނުނިމުމުން ކަމަށެވެ.
މި ސަރުކާރުގެ އެންމެ ބޮޑު އެއް އަމާޒަކީ ކަރަންޓް އުފެއްދާ ކެޕޭސިޓީ ބޮޑު ކުރުން ކަމަށާއި، އޭގެ ދަށުން އެސްޕަޔަރ ޕްރޮޖެކްޓް ފެށިގެން ދިޔުމަކީ ތިމާވެއްޓާއި ރައްޓެހި ގޮތައް ކަރަންޓް އުފެއްދުމަށް އެޅިގެންދިޔަ ބޮޑު ފިޔަވަޅެއް ކަމަށް އަޖުވަދު ވިދާޅުވިއެވެ. އަދި މި ޕްރޮޖެކްޓްގެ ސަބަބުން ސަރުކާރުގެ ބަޖެޓުން ކޮންމެ އަހަރަކު ކަރަންޓަށް ކުރާ ހަރަދުގެ ތެރެއިން 20 މިލިއަން ރުފިޔާ ސަލާމަތްވާނެ ކަމަށް ލަފާކުރެވޭ ކަމަށް އަޖުވަދު ވިދާޅުވިއެވެ.
5 މެގަވޮޓްގެ ސޯލަރ ޕީވީގެ ނިޒާމް ހުޅުލެ އަދި ހުޅުމާލޭ ގުޅުވައިދޭ ލިންކް ރޯޑްގައި ޤާއިމުކުރާ ސްޓަރަކްޗަރ ޑިޒައިންކޮށްފައި ވަނީ ތިމާވެއްޓާއި ރައްޓެހިގޮތަކަށް އަދި އާންމުންނަށް ޕޭވްމަންޓް ބޭނުން ކުރެވޭނެ ހެންނެވެ. މި މަޝްރޫއުގެ އަމަލީ މަސައްކަތް ފެށޭނެ ކަމަށް ލަފާކުރެވެނީ 2021 ވަނަ އަހަރުގެ ކުރީކޮޅުގައެވެ.
