ކޮވިޑް-19 އަށް އުފައްދާފައިވާ ވެކްސިންތައް ޖެހުމުން ސައިޑްއިފެކްޓް އަންނާނެ ކަމަށް ކަމާބެހޭ މާހިރުން ބުނެފިއެވެ.

ކޮވިޑް-19 އަށް އެމެރިކާގެ ދެ ކުންފުންޏެއް ކަމަށްވާ މޮޑާނަރ އަދި ފައިޒަރ އިން ކޮވިޑް-19 އަށް އުފައްދާފައިވާ ވެކްސިންތަކުގެ ޓެސްޓްތައް ދައްކާގޮތުން ވެކްސިންދޭ މީހުންގެ ތެރެއިން މީހުންނަށް ވެކްސިން ދިނުމުން އޭގެ ސައިޑްއިފެކްޓްސްއާ ވަނީ ކުރިމަތިލާންޖެހިފައެވެ.

އެގޮތުން ފައިޒަރ އަދި މޮޑާނަރގެ ވެކްސިންވެސް 95 އިންސައްތަ ރައްކާތެރިކަމަށް ދައްކާފައިވާ އިރު، އެ ދެ ވެކްސިނުންވެސް މީހާގެ ފުރާނައަށް ގެންލުންވާފަދަ ސައިޑްއިފެކްޓްސްތަކެއް ނުފެނުނު ނަމަވެސް ކޮންމެސް ވަރަކަށް ސައިޑްއިފެކްޓްސް ހުންނަ ކަމަށް ދިރާސާތަކުން ދައްކާ ކަމަށް މާހިރުން ބުނެއެވެ. އަދި ވެކްސިން ޖަހާ އިރު، ސައިޑްއިފެކްޓްސް ހުންނާނެކަން އެނގުން މުހިންމުކަމަށް އެފަރާތްތަކުން ފާހަގަކުރެއެވެ.

މޮޑާނަރ ވެކްސިންގެ ސައިޑްއިފެކްޓްތަކަށް ބަލާލާއިރު، ވެކްސިންގެ ފުރަތަމަ ޑޯޒް ޖެހުމުން ވެކްސިން ޖަހާތަނަށް ތަދުވާކަމަށް ޓެސްޓްތަކުން ދައްކާއިރު، މިއީ ވެކްސިންގެ ޓްރަޔަލްތަކުގައި ބައިވެރިވި މީހުންގެ ތެރެއިން 2.7 އިންސައްތަ މީހުން ތަޖުރިބާކޮށްފައިވާ ސައިޑްއިފެކްޓެކެވެ. ވެކްސިންގެ ދެ ވަނަ ޑޯޒް ދިނުމުން އެންމެ ގިނަ މީހުން ތަޖުރިބާކޮށްފައި ވަނީ ވަރުބަލިކަން ކަމަށާއި، މިއީ ޓްރަޔަލްގައި ބައިވެރިވި މީހުންގެ ތެރެއިން 9.7 އިންސައްތަ މީހުން ކަމަށް ޓެސްޓްތަކުން ދައްކައެވެ. ވެކްސިންގައި ބައިވެރިވި 8.9 އިންސައްތަ މީހުންގެ ގައިގެ މަސްގަނޑުގައި ރިއްސާފައިވާ އިރު، 5.2 އިންސައްތަ މީހުންގެ ހުޅުހުޅުގައި ވަނީ ރިއްސާފައެވެ. އަދި 4.5 އިންސައްތަ މީހުންގެ ބޮލުގައި ރިއްސާފައިވާއިރު، 4.1 އިންސައްތަ މީހުން ވަނީ ވެކްސިން ޖެހި ތަނަށް ތަދުވާކަމަށް ބުނެފައެވެ.

ފައިޒަރ އަދި އެކުންފުނީގެ ވެކްސިން އެންމެ ފަހުގެ ޓްރަޔަލްތަކުގެ ޑީޓެއިލްޑް ސޭފްޓީ ޑޭޓާ އާންމުކޮށްފައި ނުވާއިރު، އެކުްންފުނިން ވަނީ އެކުންފުނީގެ ވެކްސިން ދިން އެއްވެސް މީހަކަށް ސީރިއަށް ސައިޑްއިފެކްޓް ތަޖުރިބާކުރަން ޖެހިފައި ނުވާކަމަށް ބުނެފައެވެ. މީގެ ކުރިން އާންމުކޮށްފައިވާ ޓްރަޔަލްތަކުގެ ޑޭޓާތައް ދައްކާގޮތުން، ފައިޒަރގެ ވެކްސިން ދިން މީހުން އެންމެ ބޮޑަށް ތަޖުރިބާކުރަން ޖެހުނު ސައިޑްއިފެކްޓަކީ ބޮލުގަރިހުމާއި ވަރުބަލިވުމެވެ.

ވެކްސިން ޖެހުމަކީ ފަސޭހަކަމެއް ނޫން ކަމަށާއި މިކަންތައް އާންމުންނަށް ރަނގަޅަށް ކިޔާދެން ޖެހޭކަމަށް ކަމާބެހޭ މާހިރުން ފާހަގަކުރާއިރު، ވެކްސިންގެ ފުރަތަމަ ޑޯޒް ދިނުމުން ކުރިމަތިވާ ސައިޑްއިފެކްޓްސް ތަކުގެ ސަބަބުން ދެވަނަ ޑޯޒް ޖެހުމަށް އަންނަން ފަސްޖެހޭނެ ކަމަށާއި މިކަމަށް ރައްޔިތުން ހޭލުންތެރިކުރުވަން ޖެހޭނެ ކަމަށް އެފަރާތްތަކުން ފާހަގަކުރެއެވެ.