ބަޖެޓް 2021: ބަޖެޓް ކޮމިޓީން 200 މިލިއަން ރުފިޔާ އިތުރުކޮށް، ބަޖެޓް ރިޕޯޓް ނިންމައިފި
24 ނޮވެމްބަރު 2020 | އަންގާރަ 06:52ފިނޭންސް މިނިސްޓްރީން ހުށަހެޅި ބަޖެޓަކީ، 34،787،720،151ރ
ބަޖެޓް ކޮމެޓީގެ ބައްދަލުވުމެއްގެ ތެރެއިން: ފިނޭންސް މިނިސްޓްރީން ހުށަހެޅި ބަޖެޓަށް 200 މިލިއަން ރުފިޔާ ވަނީ އިތުރު ކޮށްފައި
އަންނަ އަހަރަށް ލަފާކޮށް ފިނޭންސް މިނިސްޓްރީން ހުށަހަޅަފައިވާ ދައުލަތުގެ ބަޖެޓަށް, ބަޖެޓް ދިރާސާކުރި ކޮމިޓީން ބައެއް ބަދަލުތައް ގެނެސް، 200 މިލިއަން ރުފިޔާ އިތުރުކޮށްފި އެވެ.
އަންނަ 2021 ވަނަ އަހަރަށް ލަފާކޮށް ފިނޭންސް މިނިސްޓްރީ ރައްޔިތުންގެ މަޖިލީހަށް ހުށަހަޅާފައިވަނީ، 34،787،720،151ރ (ތިރީސްހަތަރު ބިލިއަން ހަތްސަތޭކަ އަށްޑިހަ ހަތްމިލިއަން ހަތްސަތޭކަ ވިހިހާސް އެއްސަތޭކަ ފަންސާސް އެއް ރުފިޔާ) ބަޖެޓެކެވެ. ބަޖެޓް ކޮމިޓީން ގެނެސްފައިވާ އިސްލާހުތަކާ ގުޅިގެން، ޖުމްލަ ބަޖެޓްގެ އަދަދު، 34،922،716،599ރ (ތިރީސްހަތަރު ބިލިއަން ނުވަސަތޭކަ ބާވީސް މިލިއަން ހަތްސަތޭކަ ސޯޅަހާސް ފަސްސަތޭކަ ނުވަދިހަނުވަ ރުފިޔާ) އަށް ވަނީ އިތުރު ވެފައެެވެ.
މިބަދަލާއި، ދައުލަތުގެ އާމްދަނީއަށް ނެގެސްފައިވާ ބަދަލާއެކު ފައިނޭންސިންގ ޕްލޭން ބަދަލުވެފައި ވެއެވެ. އަދި މިބަދަލާ ގުޅިގެން 2021 ވަނަ އަހަރަށް ލަފާކުރާ ބަޖެޓުގެ އޮވަރރޯލް ބަޖެޓު ޑެފިސިޓް 15،504.1ރ (ފަނަރަހާސް ފަސްސަތޭކަ ހަތަރެއް ޕޮއިންޓް އެކެއް) މިލިއަން ރުފިޔާއިން 12،303 (ބާރަހާސް ތިންސަތޭކަތިނެއް) މިލިއަން ރުފިޔާއަށް ދަށަށް ދާނެ އެވެ.
މިބަދަލާ ގުޅިގެން، ދައުލަތުގެ ޖުމްލަ ދަރަނީގެ މިންވަރު ގައުމީ އުފެއްދުންތެރިކަމުގެ ނިސްބަތުން 2021 ވަނަ އަހަރަށް 142.8 އިންސައްތައިން 137 އިންސައްތައަށް ކުޑަވާނެ ކަަމަށް އަންދާޒާ ކުރެވޭ ކަމަށް ބަޖެޓް ކޮމެޓީން ނިންމާފައިވާ ރިޕޯޓުގައި ހާމަ ކޮށްފައި ވެއެވެ. އަދި ނޮމިނަލް ޖީޑީޕީގެ ނިސްބަތުން އޯވަރރޯލް ބެލެންސް ޑެފިސިޓް 23.4 އިންސައްތައިން 18.5 އިންސައްތައަށް ކުޑަވާނެ ކަމަށްވެސް ބަޖެޓް ދިރާސާ ކުރި ކޮމިޓީގެ ރިޕޯޓުގައި ހާމަކޮށްފައި ވެއެވެ.
އަންނަ އަހަރަށް އޮފީސްތަކަށް ކަނޑައަޅާފައިވާ ބަޖެޓް ރައްޔިތުންގެ މަޖިލީހުން ފާސްކުރުމަށްފަހު އަހަރުގެ ތެރޭގައި ފިނޭންސް މިނިސްޓްރީއަށް ހުށަހަޅައިގެން މިހާރު އަމަލުކުރާގޮތަށް، ބަޖެޓަށް ފައިސާ އިތުރުކޮށްގެން ބަޖެޓުގައި ނުހިމެނޭ ކަންކަން ކުރަމުންދާ ދިއުން ހުއްޓުމަކަށް ގެނެސް، މިހާރަށްވުރެ ބޮޑަށް ބަޖެޓަށް ޚަރަދުކުރުމުގައި ސަރުކާރުގެ އޮފީސްތައް ޒިންމާދާރުކުރުވައި، ބަޖެޓުގައި ޚަރަދު ކުރުމަށް ރާވާފައިވާގޮތަށް ބަޖެޓް ތަންފީޒުކުރުމަށް ބާރުއެޅުމަށް ވެސް ބަޖެޓް ކޮމެޓީން ލަފާދީފައި ވެއެވެ.
