އިޓާލިއަން ލީގުގައި ހޮނިހިރު ދުވަހުގެރޭ ކަލިއާރީ ބަލިކޮށް ތާވަލުގެ ދެވަނައަށް އެންމެ ފަހުގެ ޗެމްޕިއަން ޔުވެންޓަސް ޖެހިލައިފިއެވެ.

ޔުވެންޓަސްގެ ދަނޑުގައި ކުޅުނު މި މެޗު އެޓީމުން ކާމިޔާބުކުރީ 2-0 ގެ ނަތީޖާއަކުންނެވެ.

މެޗު ފަށައިގެން ޔުވެންޓަސްއިން ކަލިއާރީގެ ގޯލަށް ނުރައްކާކުރިއިރު، މެޗުގެ 11 ވަނަ މިނެޓުގައި ޔުވެންޓަސްގެ ފެޑެރީކޯ ބާނަޑޭޝީ ލަނޑެއް ކާމިޔާބުކުރި ނަމަވެސް, ރެފުރީ ވަނީ އެއީ އޮފްސައިޑް ލަނޑެއް ކަމުގައި ނިންމައިފައެވެ. އޭގެ ފަހުން ޔުވެންޓަސްގެ އަލްވާރޯ މޮރާޓާ އާއި ކްރިސްޓިއާނޯ ރޮނާލްޑޯއަށްވެސް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ.

މެޗުގައި ޔުވެންޓަސްއިން ލީޑު ނެގީ 38 ވަނަ މިނެޓުގައެވެ. މޮރާޓާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ރޮނާލްޑޯއެވެ. އަދި އޭގެ ހަތަރު މިނެޓު ފަހުން ޔުވެންޓަސްއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑުވެސް އެޓީމަށް ކާމިޔާބުކޮށްދިނީ ރޮނާލްޑޯއެވެ.

މި މެޗުގެ ދެވަނަ ހާފުގައި ލަނޑެއް ނުފެނުނު ނަމަވެސް، ޔުވެންޓަސްއިން ވަނީ ނުރައްކާތެރި ދެ ހަމަލާއެއް ކަލިއާރީ ގޯލަށް ފޮނުވާލާފައެވެ. އެގޮތުން ޕައުލޯ ޑިބާލާ އާއި ރޮނާލްޑޯ ފޮނުވާލި ހަމަލާތައް ކަލިއާރީގެ ގޯލްކީޕަރު ވަނީ ހުށިޔާރުކަމާއެކު ދިފާއުކޮށްފައެވެ.

މި މޮޅާއެކު ޔުވެންޓަސް ދެވަނައަށް ޖެހިލީ ކުޅުނު އަށް މެޗުން ލިބުނު 16 ޕޮއިންޓާއެކުއެވެ. އެއް ވަނައިގައި އޮތީ ހަތް މެޗުން 17 ޕޮއިންޓް ހޯދާފައިވާ އޭސީ މިލާނެވެ. އަދި ޔުވެންޓަސް އަތުން ބަލިވި ކަލިއާރީ އޮތީ ތާވަލުގެ 11 ވަނައިގައި އަށް މެޗުން 10 ޕޮއިންޓާއެކުއެވެ.