ކުށުގެ ރެކޯޑް ބެލެހެއްޓުން ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އަށް ބަދަލުކުރުމާއި ގުޅިގެން، ކުށުގެ ރެކޯޑް ސާފުކޮށްދިނުން ވެސް ދެން އޮންނާނީ އެ ތަނުން ކަމަށް ޑީޖޭއޭއިން ބުނެފިއެވެ.
ޑީޖޭއޭ އިން ބުނީ ކުށުގެ ރެކޯޑް ބެލެހެއްޓުން އެ އޮފީހަށް ބަދަލުވީ ޖިނާއީ އިޖުރާއަތުގެ ގާނޫނަށް ގެނައި ބަދަލާއި ގުޅިގެން ކަމަށާއި، އަދި އެކަން އެގޮތަށް ބަދަލުވެފައިވާކަން އެޓަރނީ ޖެނެރަލް އޮފީހުން ޑީޖޭއޭ އަށް އަންގާފައިވާ ކަމަށެވެ.
ޑީޖޭއޭ އިން އިތުރަށް ބުނީ ކުށުގެ ރެކޯޑް ސާފުކުރުން އެދޭ ފޯމު އެ އިދާރާއަށް އީމެއިލް މެދުވެރިކޮށް ވެސް މިހާރު ހުށަހެޅޭނެ ކަމަށެވެ. އަދި އެގޮތަށް ހުށަހަޅާ ފޯމަށް މެއިލް މެދުވެރިކޮށް ޑީޖޭއޭ އިން ޖަވާބު ދެމުން ގެންދާނެ ކަމަށެވެ.
ކުށުގެ ރެކޯޑް ސާފުކުރުމަށް ކުރިން ރައްޔިތުން ބޮޑު ތަކުލީފެއް އުފުލަން ޖެހެއެވެ. އެގޮތުން ކުށުގެ ރެކޯޑް ސާފުކުރުމަށް ކުރިން އެކި ކޯޓުތަކަށް ވަކިވަކިން ދާންޖެހެއެވެ. އެހެންކަމުން އެކަމަށް ގިނަ ވަގުތުތަކެއް ހޭދަވެއެވެ. ޖިނާއީ އިޖުރާއަތުގެ ގާނޫނަށް ތިން ވަނަ އިސްލާހު ގެނައުމުގެ ގާނޫނަށް އަމަލުކުރަން ފެށީ މިދިޔަ ސެޕްޓެމްބަރު މަހުއެވެ.
