ފައްޓަރުބައިގެ އަގުހުރި ނަމަވެސް މިފަހަރު ހިޔާރުކުރީ އަގުނުކުރެވޭ އެކުވެރިކަން: ޗައިނާ ސަފީރު
އެކުވެރިކަމަކީ އަގުނުކުރެވޭ އެއްޗެއްކަމަަށް ސަފީރުވަނީ ވިދާޅުވެފަ
ޗައިނާގެ ސަފީރު ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ބައްދަލު ކުރައްވަނީ
ފައްޓަރުބައިގެ އަގުހުރި ނަމަވެސް މިފަހަރު ހިޔާރުކުރީ އަގުނުކުރެވޭ އެކުވެރިކަން ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގ ލީޖޮން ވިދާޅުވެއްޖެ އެވެ.
މާމަގެ ފައްޓަރު ބައި ވިއްކާލައިގެން ވެސް ކުރީގެ ރައީސް އަބްދުﷲ ޔާމީނު ސަރުކާރުން ނަގާފައިވާ ދަރަނި ނުދެއްކޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމާއި ގުޅިގެން ޗައިނާގެ ސަފީރު ހުކުރު ދުވަހު ކުރެއްވި ޓްވީޓެއްގައި ވިދާޅުވީ ފައްޓަރުބަޔަކީ ވަރަށްވެސް އަގުހުރި އެއްޗެއް ކަމަށެވެ. ނަމަވެސް ފައްޓަރުބައިގެ މައްޗަށް މިފަހަރު ހިޔާރުކުރީ އެކުވެރިކަން ކަމަށާއި އެކުވެރިކަމަކީ އަގުނުކުރެވޭ އެއްޗެއްކަމަަށް ސަފީރު ވަނީ ވިދާޅުވެފައެވެ.
ޖީ-20 ޑެޓް ސާވިސް ސަސްޕެންޝަން އިނިޝިއޭޓިވް ގެ ދަށުން ބައެއް ލޯނުތައް ދެއްކުން ޗައިނާއިން ފަސްކޮށްދީފައިވާއިރު ރާއްޖެއިން އެހީތެރިކަމަށް ބޭނުންވާ ކޮންމެ ވަގުތެއްގައި ވެސް އެހީވާން ޗައިނާ އޮތީ ތައްޔާރަށް ކަމަށް ދާދި ފަހުން ސަފީރު ވަނީ ވިދާޅުވެފައެވެ. ޗައިނާއިން ރާއްޖެއަށް ގިނަ އެހީތަކެއް ވެފައިވާއިރު، ޗައިނާގެ ސަފީރު ވިދާޅުވީ ހަގީގީ ރަހުމަތްތެރިންނަކީ ބޭނުން ޖެހިފައިވާ ވަގުތެއްގައި އެހީވާން ތިބޭ މީހުން ކަމަށެވެ.
ޗައިނާއިން ރާއްޖެ ނަގާފައިވާ ލޯނުގެ ޖުމްލަ އަދަދަކީ 1.5 ބިލިއަން ޑޮލަރަށް ވީއިރު އޭގެ ތެރެއިން ސީދާ ސަރުކާރުން ސަރުކާރަށް ނަގާފައިވާ ލޯނުތަކުގެ އަދަދަކީ 600 މިލިއަން ޑޮލަރެވެ.
