ސިނޯވެކްގެ ކޮވިޑް ވެކްސިންގެ ފޭސް ތިނެއްގެ ޓްރެއަލްގެ ނަތީޖާތައް ޑިސެމްބަރ މަހު ލިބޭނެ
20 ނޮވެމްބަރު 2020 | ހުކުރު 16:26ޕްރިލިމިނަރީ ނަތީޖާ ދައްކާގޮތުން އެ ވެކްސިންއިން ދިފާއީ ނިޒާމުގައި ވައިރަސް އާ ދެކޮޅަށް އެންޓިބޮޑީސް އުފައްދާ
ސިނޯވެކުން ކޮވިޑް-19 އަށް އުފައްދަމުން އަންނަ ވެކްސިން ޕެކްކުރުމުގެ މަސައްކަތްކުރަމުން އަންނަނީ
ޗައިނާގެ ސިނޯވެކް ބައޯޓެކުން ކޮވިޑް-19 އަށް އުފައްދަމުން އަންނަ ވެކްސިންގެ ފޭސް ތިނެއްގެ ޓްރެއަލްގެ ނަތީޖާ ޑިސެމްބަރ މަހު ލިބޭނެކަމަށް އެކުންފުނިން ބުނެފިއެވެ.
ސިނޯވެކުން އުފައްދަމުން އަންނަ ވެކްސިންގެ ފޭސް ތިނެއްގެ ޓްރެއަލްތައް ކުރިޔަށްދަނީ ބްރެޒިލް، އިންޑޮނޭޝިޔާ އަދި ތުރުކީ ގައެވެ. މިވެކްސިންގެ ޓްރެއަލްގެ އެންމެ ފުރަތަމަ ފޭސް އިން ފެށިގެން މެދާ ހަމައަށް ހުރި ޑާޓާތަކުގެ ނަތީޖާ މިހަފްތާ ވަނީ ނިކުމެފައެވެ.
މި ޕްރިލިމިނަރީ ނަތީޖާ ދައްކާގޮތުން އެ ވެކްސިންއިން ދިފާއީ ނިޒާމުގައި ވައިރަސް އާ ދެކޮޅަށް އެންޓިބޮޑީސް އުފައްދައެވެ. އެހެންނަމަވެސް ވައިރަސް ޖެހިފައި ރަނގަޅުވެފައި ތިބި މީހުންގެ ހަށިގަނޑުން ވައިރަސްއާ ދެކޮޅަށް އެންޓިބޮޑީސް އުފައްދާ މިންވަރު ވައިރަސް ނުޖެހޭ މީހުންނަށް ވުރެ އިތުރު ކަމަށް ނަތީޖާތަކުން ވަނީ ދައްކާފައެވެ.
ސިނޯވެކުގެ ސީނިއަރ ޑިރެކްޓަރ ވެއިނިންގ މެންގް ވިދާޅުވީ ފޭސް ތިނެއްގެ ޓްރެއަލް ކާމިޔާބުކަމާއެކު ކުރިޔަށްދާ ކަމަށެވެ. އަދި އަންނަ މަހު މިހާރު ކުރިޔަށްދާ ޓްރެއަލްތަކުގެ ޑާޓާތައް ލިބޭވަރުވާނެކަމަށް ވެއިނިންގ ވިދާޅުވިއެވެ.
ފައިޒަރ އާއި ބައޯއެންޓެކް ވެކްސިން ޑާޓާތަކުން ވަނީ އެ ވެކްސިންތައް 90 އިންސައްތަ ކާމިޔާބުކަން ހާމަވެފައިވާއިރު، އެ ކުންފުނިތަކުން އަންނަނީ ޔޫރަޕް އަދި އެމެރިކާގައި އެ ވެކްސިން އެމަރޖެންސީކޮށް ބޭނުން ކުރުމަށް ތައްޔާރުވަމުންނެވެ.
ސިނޯވެކުން ކޮވިޑަށް އުފައްދަމުން އަންނަ ވެކްސިން ކުރިޔަށް އޮތް މަސްތަކުގައި ބްރެޒިލް އަދި އިންޑޮނޭޝިޔާގައި ބޭނުންކުރުމަށް އަންނަނީ ތައްޔާރުވަމުންނެވެ.
ވެއިނިންގ ވިދާޅުވީ އެކި ކުންފުނިތަކާއެކު ވެކްސިންގެ އިތުރު ޑޯޒްތައް އުފެއްދުމުގެ އެއްބަސްވުންތަކަށް އަންނަމުންދާ ކަމަށެވެ. އޭގެ ސަބަބުން ވެކްސިން އުފެއްދުމުގެ ޚަރަދު ކުޑަވެ އަވަހަށް ވެކްސިން ބޭނުންވާ ފަރާތްތަކަށް ފޯރުކޮށްދެވޭނެކަމަށް ވެއިނިންގ ވިދާޅުވިއެވެ.
