ފަސް މަސް ދުވަހުގެ ތެރޭގައި ކޮވިޑުގެ ވެކްސިނެއް ރާއްޖެއަށް ލިބުމުގެ އުންމީދު އެބައޮތް: ރައީސް

ފަސް މަސް ދުވަސްތެރޭގައި ކޮވިޑް-19 ގެ ވެކްސިންއެއް ރާއްޖެއަށް ލިބޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ވިދާޅުވެއްޖެ އެވެ.

ބުރާސްފަތި ދުވަހު ހޯރަފުށީ އެއަރޕޯޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ކުރިއަށް އޮތް ހަތަރު ފަސް މަސް ދުވަހުގެ ތެރޭގައި، ކޮވިޑުގެ ވެކްސިނެއް ރާއްޖެއާއި ހިސާބަށްވެސް ލިބުމުގެ އުންމީދު އެބައޮތް ކަމަށެވެ.

ވެކްސިންއެއް ލިބުމުން ސަރުކާރުން އުއްމީދު ކުރާ ބަދަލުތައް ރާއްޖެއަށް އައިސް، ރާއްޖޭގެ އިޤްތިޞާދު ކުރިއަރައިގެންދާނެ ކަމަށް ރައީސް ވިދާޅުވި އެވެ.

މިއީ ދަތި އުނދަގޫ ވަގުތެއް ކަމަށާއި ސަރުކާރުން ދެމުންގެންދާ ލުއިތަކާއި އެކު ރައްކައުތެރިކަމުގެ ފިޔަވަޅުތަކާއިއެކު ކުރިއަށްދިއުމަށް ރައީސް ވަނީ އެދިވަޑައިގެންފަ އެވެ.

ރައީސް ސޯލިހް މިހެން ވިދާޅުވެފައިވާ އިރު، ކޮވިޑް-19 އަށް ތައްޔާރުކުރަމުން އަންނަ ވެކްސިންތަކުގެ ތެރެއިން އެމެރިކާގެ ފައިޒަރ އަދި ޖަރުމަންގެ ބައޯންޓެކް ކުންފުނިން ގުޅިގެން ތައްޔާރުކުރަމުން އަންނަ ވެކްސިންގެ 95 އިންސައްތަ ރައްކާތެރިކަމަށް ރިޕޯޓްތަކުން ދައްކާފައިވާއިރު، މި ވެކްސިންގެ އެމެޖެންސީ ހުއްދައަށް ހޯދުމަށް އެކުންފުނިން ދަނީ މަސައްކަތްކުރަމުންނެވެ.

މީގެ އިތުރުން މޮޑާނަރ، އިނގިރޭސިވިލާތުގެ އެސްޓްރަޒެނެކާ، ރަޝިއާގެ ގަލަމެޔާ ރީސަރޗް އިންސްޓިޓިއުޓް އިން ކޮވިޑް އަށް އުފައްދާ ވެކްސިންގެ އިތުރުން ޗައިނާއިން އުފައްދާ ވެކްސިންތައް ވެސް މި އަހަރުގެ ޑިސެމްބަރ މަހު ނުވަތަ އަންނަ އަހަރުގެ ޖެނުއަރީ މަހު ހުއްދަ ލިބިގެންދާނެ ކަމަށް ކުންފުނިތަކުން ފާހަގަކުރެއެވެ.