މިނިސްޓަރ ފައްޔާޒު މަޤާމުން ވަކިކުރާކަށް ނޫޅެން: ރައީސް ނަޝީދު
ކުރިއަށް ގެންދިޔައީ ޕާޓީގެ އެތެރޭގެ މަޝްވަރާތަކެއް ކަމަށް ވިދާޅުވި
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އިކޮނޮމިކް މިނިސްޓަރ ފައްޔާޒު އިސްމާއިލް
އިކޮނޮމިކް މިނިސްޓަރ ފައްޔާޒު އިސްމާއިލް މަޤާމުން ވަކިކުރަން މަޖިލީހަށް ހުށަހަޅުއްވަން ނޫޅުއްވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ބުރާސްފަތި ދުވަހު ރައްޔިތުންގެ މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ ފައްޔާޒު ވަކި ކުރައްވަން ނޫޅުއްވާކަމަށާއި ކުރިއަށް ގެންދިޔައީ އެމްޑީޕީގެ އެތެރޭގެ މަޝްވަރާތަކެއް ކަމަށެވެ.
އަދި ސަރުކާރު ޒިންމާދާރު ކުރުވުމާއި ރައްޔިތުންނަށް އެންމެ ރަނގަޅުގޮތަށް ކަންކަން ނިންމުމަކީ އެމަނިކުފާނުގެ މަސްއޫލިއްޔަތެއް ކަމަށް ދެކެވަޑައިގަންނަވާ ކަަމަށް ވިދާޅުވިއެވެ.
ބޭފުޅަކު ހިތްހަމަ ޖެހިވަޑައިގަތަސް އަދި ނުގަތަސް ކަންކަން ގޯސްކޮށްދާނަމަ އެވާހަކަ ދައްކަވާނެ ކަމަށް ނަޝީދު ވިދާޅުވިއެވެ.
ފައްޔާޒުގެ އިތުބާރުނެތްކަމުގެ ވޯޓުނަގަން މަސައްކަތް ނުކުރައްވާކަމަށް ރައީސް ނަޝީދު ވިދާޅުވެފައިވާއިރު، އެމަނިކުފާނު އިސްވެހުންންވާ ފައްޔާޒުގެ އިތުބާރުނެތްކަމުގެ މައްސަލަ މަޖިލީހަށް ވައްދަން މެންބަރުގެ ސޮއި ހޯއްދެވުމުގެ މަސައްކަތް ކުރެއްވި އެވެ.
އަދި ނަޝީދު ވަނީ ފައްޔާޒަށް ބަހުގެ ހޫނު ހަމަލާތަކެއްވެސް ރައްދުކުރައްވާފަ އެވެ.
އެމްޑީޕީގެ ގައުމީ މަޖިލީހުގެ ވަޓްސްއަޕް ގުރޫޕުގައި ރައީސް ނަޝީދު ވިދާޅުވެފައިވަނީ ފައްޔާޒުގެ އިތުބާރު ނެތް ކަމުގެ މައްސަލަ ހުށަހެޅުމުގައި އެމަނިކުފާނު ބައިވެރިވެވަޑައިގަންނަވާ ކަމަށެވެ.
އަދި އެ މައްސަލައަށް 30 މެމްބަރުންގެ ތާއީދު ލިބިފައިވާ ކަން ރައީސް ނަޝިދު ފާހަގަ ކުރެއްވި އެވެ.
އޭގެ އިތުރުން އެ މެމްބަރުންނަށް ދިމާކޮށް ނުފޫޒު ނުފޯރުވުމަށާއި "ބުރޯ" ހެދިގެން ނޫޅުއްވުމަށް އެމަނިކުފާނު އެދިވަޑައިގެންނެވި އެވެ.
އެމައްސަލައިގައި އެމްޑީޕީގެ މަޖިލީސް މެންބަރުންގެ މެދުގައި ޚިޔާލުތަފާތުވުންތައް އުފެދުނެވެ.
