ވަކި ޕާޓީއެއް ވުމުން ޒާތީ ވެގެން ތަފާތުކުރުމެއް ނުގެންގުޅެން: އީސީ ޝަރީފް

ވަކި ސިޔާސީ ޕާޓީއަކަށް ވުމުން ޒާތީ ވެގެން އެއްވެސް ތަފާތު ކުރުމެއް ނުގެންގުޅޭ ކަމަށާއި، ފިޔަވަޅު އަޅަންޖެހޭ ހާލަތެއްގައި ކޮންމެ ޕާޓީއަކަށް ވެސް ސިޔާސީ ޕާޓީތަކުގެ ގާނޫނުގެ ތެރެއިން ފިޔަވަޅު އަޅާނެ ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.

އިދިކޮޅު ސިޔާސީ ފަރާތްތަކުން އިލެކްޝަންސް ކޮމިޝަނުން ވަކި ޕާޓީތަކަކަށް ތަފާތު ކުރުން ގެންގުޅޭ ކަމަށް ވިދާޅުވާ ވިދާޅުވުމަށް ޖަވާބު ދެއްވަމުން ރާއްޖެޓީވީގެ "ފަލަސުރިހީ" ޕްރޮގްރާމުގައި ވާހަކަ ދައްކަވަމުން އީސީގެ ރައީސް ޝަރީފް ވިދާޅުވީ، ސިޔާސީ ޕާޓީތަކަށް ހެދިފައި އޮންނަ ގާނޫނުގެ ތެރެއިން ކަންކަން ކުރުމަށް ނަސޭހަތްތެރިވާއިރު، އެކަން ކަމަށް ގޮންޖައްސަވައި، ހެދިފައިވާ ގާނޫނުތަކާއި، އަންގާ އެންގުންތަކަށް ބޯނުލަނބާ ކަމަށްވާނަމަ ކޮންމެ ސިޔާސީ ޕާޓީއަކާއި ދޭތެރޭ ވެސް އިލެކްޝަނުން މިހާތަނަށް ފިޔަވަޅު އަޅަމުން އަންނަ ކަމަށެވެ.

ޝަރީފް ވިދާޅުވީ، އިދިކޮޅު ޕީޕީއެމް އަދި ޕީއެންސީން ވެސް އިލެކްޝަނުން އަންގާ އެންގުންތަކަށް ތަބާނުވެ ކަނޑައެޅިގެން ދިމާ އިދިކޮޅަށް މަސައްކަތް ކުރުމުގެ ރޫހެއްގައި ބައެއް ކަންކަން ކޮށްފައިވާ ކަމަށެވެ. އެއާއެކު ތަފާތު އެތައް ފަހަރެއްގެ މަތިން އެފަރާތްތަކަށް އިލެކްޝަނުން ނަސޭހަތްތެރިވެ، އެ އެންގުންތަކާ ހިލާފުވުމުން ފިޔަވަޅު އަޅުއްވާފައިވާނެ ކަމަށް ޝަރީފް ވިދާޅުވިއެވެ.

މިހާރު އިލެކްޝަންސް ކޮމިޝަނުން އަމަލު ކުރަމުންދާ އުސޫލަށް ގެނެސްފައިވާ ބަދަލުތަކާއި ގުޅޭގޮތުން މައުލޫމާތު ދެއްވަމުން ޝަރީފް ވިދާޅުވީ، އެއްވެސް ޕާޓީއަކާއި ދޭތެރޭ ގާނޫނާއި ހިލާފުވެގެން ފިޔަވަޅު އަޅާއިރު، އެ ފިޔަވަޅެއް އަޅަންޖެހޭނީ ކަނޑައެޅިގެން ހެކި ހުރިކަމުގައި ވިޔަސް، އެޕާޓީއެއްގެ ފަރާތުން އެކަމަށް ލިޔުމުން އަންގައި، ޖަވާބުދާރީ ވުމަށް ފުރުސަތު ދިނުމަށްފަހުގައި ކަމަށެވެ.

ޝަރީފް ވިދާޅުވީ ސިޔާސީ އެއްވެސް ޕާޓީއެއްގައި ނުހިމެނޭ މީހަކު، މިނިވަން ވިސްނުމަކުން ވިސްނާލައިފި ނަމަ އިލެކްޝަނުން ޖޫރިމަނާ ކުރަމުންދާ ގޮތާއި، އަމަލު ކުރަމުންދާ ގޮތް ވަރަށް ރަނގަޅަށް ސާފު ވެގެންދާނެ ކަމަށެވެ.