އަންނަ އަހަރުގެ ބަޖެޓަކީ ތާށި ބަޖެޓެއް، އިތުރު ވަޒީފާއެއް އުފެއްދޭނެ ވަރުވެސް ބަޖެޓަކު ނެތް: ފިނޭންސް
2021 ގެ ބަޖެޓުގައި އެންމެ ބޮޑަށް ބަލާފައިވަނީ އިގްތިސާދީ ދުވެއްޔާއި އެއްވަރަށް ބަޖެޓް ކަނޑައެޅުން
މިނިސްޓްރީ އޮފް ފިނޭންސްގެ ޗީފް ފައިނޭޝަލް ބަޖެޓް އެގްޒެކެޓިވް އަޙްމަދު ޝަރުވަޝް
ދައުލަތުން 2021 ވަނަ އަހަރަށް ކަނޑައަޅާފައިވާ ބަޖެޓަކީ ތާށި ބަޖެޓެއް ކަމަށާއި، އަންނަ އަހަރު ބަޖެޓުން އިތުރު ވަޒީފާއެއް އުފެއްދެންވެސް ނެތް ކަމަށް މިނިސްޓްރީ އޮފް ފިނޭންސްގެ ޗީފް ފައިނޭޝަލް ބަޖެޓް އެގްޒެކެޓިވް އަޙްމަދު ޝަރުވަޝް ވިދާޅުވެއެޖެ އެވެ.
ރާއްޖެ ޓީވީގެ "ބަޖެޓް 2021" ޕްރޮގްރާމްގައި ވާހަކަދައްކަވަމުން ޝަރުވަޝް ވިދާޅުވީ ކޮންމެ އަހަރަކުވެސް ބަޖެޓް ތައްޔާރުކުރުމުގައި ވަރަށް ގިނަ ކަންކަމަށް ފިނޭންސް މިނިސްޓްރީއިން ބަލަމުން އަންނަ ކަމަށާއި، އެގޮތުން އެންމެ ފުރަތަމަ ވެސް ބަލަނީ އިގްތިސާދީ ގޮތުން ގައުމު އޮތް ހާލަތު ކަމަށެވެ. އަދި ބަޖެޓް ޕްރޮސެސް އަކީ ވަކި ގޮތަކަށް ބަލައިގެން ކުރަމުން އަންނަ ކަމެއް ކަމަށާއި، އެކަމަކު މިއަހަރު އެ ޕްލޭނާއި އެއްގޮތަށް ގޮސްފައި ނުވާ ކަމަށެވެ. އަދި ކޮވިޑް-19 އާއި ގުޅިގެން އިގްތިސާދު ދުވަހެއް ދުވަހަކަށް ދަށް ވަމުން އަންނަ ކަމަށް ޝަރުވަޝް ވިދާޅުވިއެވެ.
ޝަރުވަޝް ވިދާޅުވީ 2021 ގެ ބަޖެޓުގައި އެންމެ ބޮޑަށް ބަލާފައިވަނީ އިގްތިސާދީ ދުވެއްޔާއި އެއްވަރަށް ބަޖެޓް ކަނޑައެޅުން ކަމަށާއި، އެއް ސިނާއަތަކަށް ބަރޯސާވެފައި އޮތުމުގެ ބަދަލުގައި އެހެން ސިނާއަތްތަކަށްވެސް ފޯކަސް ކުރުމަށް އަންނަ އަހަރުގެ ބަޖެޓުގައި ބަލާފައިވާނެ ކަމަށެވެ. ޝަރުވަޝް ވިދާޅުވީ އަންނަ އަހަރުގެ ބަޖެޓުގައި އޮފީސްތަކަށާއި، މިނިވަން މުވައްސަސާތަކަށް ކަނޑައަޅާފައިވާ ބަޖެޓަކީ ވަރަށް ލިމިޓެޑް ބަޖެޓެއް ކަމަށާއި، ސަބަބަކީ ބަޖެޓް ފޯކަސް ކޮށްފައިވާނީ ދައުލަތުގެ ހަރަދުތައް ކުޑަކޮށް އެހެން އަމާޒަކަށް ވާސިލްވުމަށް ކަމަށްވާތީ ކަމަށެވެ. އަދި އަންނަ އަހަރު ސަރުކާރުން އިތުރު ވަޒީފާގެ ފުރުސަތު ހޯދުމަކީ ވުމަށްވުރެ ނުވުން ގާތް ކަމެއް ކަމަށް ޝަރުވަޝް ވިދާޅުވިއެވެ.
ޝަރުވަޝް ވިދާޅުވީ އަންނަ އަހަރުގެ ބަޖެޓުގެ މަގްސަދަކީ ހިނގަމުން އަންނަ ކަންކަން ސޭވް ކުރުމާއި އެކު އައު ކަންކަމަށް ޖާގަ ދިނުން ކަމަށާއި، އަދި އިގްތިސާދީ، އިޖްތިމާއީ ގެއްލުން ތަކުން އަރައިގަތުމާއި، އިގްތިސާދު ސިންދަފާތު ކުރުމާއި އަދި ސަރަހައްދީ ތަރައްގީ ކުރިޔަށް ގެންދިޔުމަށް ޖާގަ ދޭނެ ބަޖެޓެއް އެކުލަވާލުން ކަމަށެވެ. އަދި މިއަހަރުގެ ބަޖެޓަކީ އެކަންކަމަށް ޖާގަ ދޭނެ ބަޖެޓެއް ކަމަށް ޝަރުވަޝް ވިދާޅުވިއެވެ.
2021 ވަނަ އަހަރަށް ލަފާކޮށް ދައުލަތުން ހުށައަޅާފައިވަނީ، 34.7 ބިލިއަން ރުފިޔާގެ ބަޖެޓެކެވެ. އާމްދަނީގެ ގޮތުގައި ލިބޭނެކަމަށް އަންދާޒާކޮށްފައިވަނީ، ޓެކުހުގެ ގޮތުގައި 9.8 ބިލިއަން ރުފިޔާ، ޓެކްސް ނޫން އާމްދަނީގެ ގޮތުގައި 5.75 ބިލިއަން ރުފިޔާ އަދި ހިލޭ އެހީގެ ގޮތުގައި 2.2 ބިލިއަން ރުފިޔާއެވެ. މި އަހަރުގެ ބަޖެޓު 15.5 ބިލިއަން ރުފިޔާއިން ޑެފިސިޓް ވާނެއެވެ
