އިކޮނޮމިކް މިނިސްޓްރީއިން ކުރާ މަސައްކަތްތަކުގެ ބޮޑުބައެއް ގުޅިފައިވަނީ ޒުވާނުންނާއި: މިނިސްޓަރ މަހުލޫފް
18 ނޮވެމްބަރު 2020 | ބުދަ 09:51މިނިސްޓަރ މަހުލޫފް ވިދާޅުވީ އެ މިނިސްޓްރީއިން ދަނީ ޒުވާނުންނާ ގުޅުންހުރި މަސައްކަތްތައް ކުރަމުން ކަމަށް
ޔޫތް މިނިސްޓްރީގައި ބޭއްވި ރަސްމިއްޔާތުގެ ތެރެއިން
އިކޮނޮމިކް މިނިސްޓްރީއިން ކުރާ މަސައްކަތްތަކުގެ ބޮޑުބައެއް ގުޅިފައިވަނީ ސީދާ ޒުވާނުންނާ ކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަހުލޫފް ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ ޒުވާނުން ކުރިއެރުމުގައި ދިމާވާ މައްސަލަތަކަށް ޙައްލު ހޯދުމަށް ކުރަމުންދާ މަސައްކަތުގެ ތެރެއިން މިނިސްޓްރީ އޮފް އިކޮނޮމިކް ޑިވެލޮޕްމަންޓާއި އެކު އެމް.އޯ.ޔޫ އެއްްގައި ސޮއިކުރުމަށް ބުދަ ދުވަހު ޔޫތް މިނިސްޓްރީގައި ބޭއްވި ރަސްމިއްޔާތެއްގައި ވާހަކަދައްކަވަމުންނެވެ.
ޔޫތް މިނިސްޓަރ މަހުލޫފް ވިދާޅުވީ އެ މިނިސްޓްރީއިން ދަނީ ޒުވާނުންނާ ގުޅުންހުރި މަސައްކަތްތައް ކުރަމުން އަންނަ އެކިއެކި ވުޒާރާތަކާއި ބައްދަލު ކުރަމުން ކަމަށެވެ. އަދި މިފަދަ އެއްބަސްވުންތަކެއް ހެދުމުގެ މަސައްކަތް ކުރައްވާ ކަމަށް ވިދާޅުވަމުން މިނިސްޓަރ ފާހަގަ ކުރެއްވީ އިކޮނޮމިކް މިނިސްޓްރީއާއި އެކު ކޮމިޓީއެއް އެކުލަވާލާނެ ކަމަށެވެ.
މި އެއްބަސްވުމުގެ ދަށުން ކުރުމަށް ނިންމާފައިވާ މަސައްކަތްތަކަކީ އަތޮޅުތަކާއި އާބާދީ ބޮޑެތި ސަރަޙައްދުތަކުގައި ދިރިއުޅޭ ޒުވާނުންނަށް ޖެހޭ މައްސަލަތައް ދިރާސާކޮށް ސަރުކާރުގެ އިދާރާތަކުގެ ތެރޭގައި ރޭވޭނެ ހަރަކާތްތައް ދެނެގަތުމާއި، ވަޒީފާ އަދާނުކުރާ ޒުވާނުންނާއި ގުޅޭ މައްސަލަތަކަށް ހައްލު ގެނައުމަށް އެކްޝަން އޮނިގަނޑެއް އެކުލަވާލުމާއި، އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓާއި، މިނިސްޓްރީ އޮފް ހަޔަރ އެޑިއުކޭޝަން އާއި ގުޅިގެން ޖޮބް ސެންޓަރުތަކުގެ ޚިދުމަތް ވަލްނަރެބަލް ޒުވާން އަންހެނުންނަށާއި ފިރިހެނުންނަށް ފޯރުކޮށްދިނުމަށް ފުޅާކުރުން ހިމެނެއެވެ.
މީގެ އިތުރުން މިނިސްޓްރީ އޮފް އިކޮނޮމިކް ޑިވެލޮޕްމަންޓް ގެ ކެރިއަރ ޕޯޓަލްއަށް އެޓް ރިސްކް ޒުވާނުން ހިމެނުމަށް ކޯޑިނޭޓްކުރުމާއި، ޔޫތު ސެންޓަރުތައް ރިޕަރޕަސްކޮށް އިނޮވޭޓިވް ލެބްތަކެއް ޤާއިމްކޮށް ޒުވާނުން އިކޮނޮމިކަލީ އެމްޕަވަރ ކުރެވޭނެ ނިޒާމެއް ޤާއިމްކުރުމަށްވެސް ވަނީ ނިންމާފައެވެ.
މިނިސްޓަރ ވިދާޅުވީ މީގެ ކުރިންވެސް ޒުވާނުންގެ އެކިއެކި މައްސަލަތައް ދެނެގަތުމަށްޓަކައި ތަފާތު މަސައްކަތްތަކެއް ކުރެވިފައިވާ ކަމަށެވެ. އެގޮތުން ހިންގާފައިވާ ޕްރޮގްރާމްތަކަށް ބަލާއިރު މިނިސްޓަރ ވަނީ ޒުވާނުންގެ ހިޔާލު ހޯދާ އެމީހުންގެ މަޝްވަރާ ހޯދުމަށް ހިންގުނު ހޮޅުއަށި ޕްރޮގްރާމް ފާހަގަކުރައްވާފަ އެވެ.
މި ރަސްމިއްޔާތުގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ފަރާތުން މިނިސްޓަރ އަލްއުސްތާޛު ފައްޔާޟް އިސްމާޢީލް ވަނީ މި އެއްބަސްވުމުގައި ސޮއި ކުރައްވާ ވާހަކަ ދައްކަވާފައެވެ. މިނިސްޓަރ ފައްޔާޟް ވިދާޅުވީ އިކޮނޮމިކް މިނިސްޓްރީ ހާއްސަވަނީ ހަމައެކަނި ޒުވާނުންނަސް ނޫންކަމަށާ މުޅި އިގްތިސާދަށް ކަމަށެވެ.
އެގޮތުން ޒުވާނުންނާ ގުޅޭ މަސައްކަތް ކުރުމައްޓަކައި އެކަަމަށް ހާއްސަ މިނިސްޓްރީ އަކާއިއެކު ބޭނުންވާ މައުލޫމާތުތައް ހިއްސާކޮށްގެން މަސައްކަތް ކުރުމުގެ މުހިއްމުކަމަށް މިނިސްޓަރވަނީ އަލިއަޅުވާލައްވާފަ އެވެ. އަދި މި އެއްބަސްވުމުގެ ސަބަބުން ޒުވާނުންނަސް ހާއްސަ ހާއްސަ ގިނަ ކަންކަން ކުރެވޭނެ ކަމަސް އުއްމީދު ކުރައްވާކަމަށް މިނިސްޓަރ ވިދާޅުވި އެވެ.
ޔޫތް މިނިސްޓްރީއިން ބުނީ ރައީސް އިބްރާހީމް މުހައްމަދު ސޯލިހުގެ ސަރުކާރުގެ މެނިފެސްޓޯގައި ހިމެނޭ ވައުދުތައް ފުއްދުމަށްޓަކައި އެކުލަވާލާފައިވާ "ސްޓެރެޓެޖިކް އެކްޝަން ޕްލޭން 2019-2023" ގައި ކަނޑައަޅާފައިވާ ސިޔާސަތުތަކާއި، ސްޓްރެޓެޖީތަކާއި އަދި އެކްޝަންތައް ތަންފީޒުކުރުމަށްޓަކައި އެ މިނިސްޓްރީއިން ގިނަ މަސައްކަތްތަކެއް ކުރަމުން އަންނަ ކަމަށެވެ.
