ޗައިނާގެ ޔުނާން ޕްރޮވިންސްގައި ބޭއްވި ކުންމިންގ ފެއަރ ވަރަށް ކާމިޔާބު ކަމަށް އިކޮނޮމިކް މިނިސްޓްރީ ބުނެފި އެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އިކޮނަމިކް މިނިސްޓަރީގެ ޑެޕިއުޓީ މިނިސްޓަރ އާދަމް ތައުފީޤު ވިދާޅުވީ ޖޫން މަހުގެ 12-18 އަށް ޗައިނާގެ ޔުނާން ޕްރޮވިންސުގައި ބޭއްވި ކުންމިންގ ފެއަރގައި ދިވެހިރާއްޖޭގެ ޕްރޮޑަކްޓުތަކަށް ވަރަށް ބޮޑު ތަރުހީބެއް ލިބިގެންދިޔަކަމަށެވެ. ޚާއްސަކޮށް ދިވެހި މަހުގެ އުފެއްފުންތަކަށް ލިބުނު ބޮޑު ތަރުހީބު ފާހަގަކޮށްލެވޭ ކަމަށް އޭނާ ވިދާޅުވި އެވެ.

ތައުފީގު ވިދާޅުވީ މިފަދަ ފެއަރއެއް ބޭއްވުމުގެ މައިގަނޑު މަޤްސަދަކީ ރާއްޖޭގެ އުފެއްދުންތައް ބޭރުގެ ޤައުމުތަކަށް ތައާރަފުކުރުން ކަމަށާއި ރާއްޖޭގެ ވިޔަފާރި އާއި ބޭރުގެ ވިޔަފާރީތަކުގެ ގުޅުން ބަދަހިކުރުން ކަމަށެވެ.

މި ފެއަރގެ ސަބަބުން ޗައިނާގެ ބައެއް ޕްރޮޑަކްޓްތައް އަގު ހެޔޮކޮށް ރާއްޖެއަށް އެތެރެކުރެވިގެންދާނެ ކަމަށާއި ޗައިނާގައި ރާއްޖޭގެ އޮފީހެއް ޤާއިމުކުރަން މަސައްކަތް ކުރަމުންދާކަމަށް ވެސް ތައުފީގު ވިދާޅުވިއެވެ.

ކުންމިންގ ފެއަރގައި ރާއްޖެއިން ބައިވެރިވި މިއީ ހަތަރު ވަނަ އަހަރެވެ.