ހޯރަފުށީ އެއަރޕޯޓް ފެހި ކުރުމުގެ ޕްރޮގްރާމްގައި ރާއްޖެޓީވީން ބައިވެރި ވެއްޖެ
ހޯރަފުށި އެއާޕޯޓް ފެހި ކުރުމުގެ ޕްރޮގްރާމްގައި އެ އަތޮޅު ރަށްތަކުން އަންނަނީ އެހީތެރިވަމުން
ރާއްޖެޓީވީގެ މުވައްޒަފުންތަކެއް ހޯރަފުށީ އެއަރޕޯޓް ފެހި ކުރުމުގެ ޕްރޮގްރާމުގައި ބައިވެރިވެ ގަސް އިންދަނީ
ހއ. ހޯރަފުށީ އެއަރޕޯޓް ފެހި ކުރުމަށް އެ ރަށު ރައްޔިތުންނާއި ކައުންސިލުން ފަށާފައިވާ ޕްރޮގްރާމްގައި ރާއްޖެޓީވީން ބައިވެރިވެ ގަސް އިންދައިފިއެވެ.
ހޯރަފުށި އެއާޕޯޓް ހުޅުވުމުގެ ރަސްމިއްޔާތު ލައިވް ކުރުމަށް ރާއްޖެޓީވީގެ ފަރާތުން ހޯރަފުއްޓަށް ދިއަ ޓީމުން، ގަސްއިންދާއިފައި ވަނީ އަންގާރަ ދުވަހު ހޯރަފުށި އެއާޕޯޓްގައި ބޭއްވި ގަސް އިންދުމުގެ ޕްރޮގްރާމްގައެވެ.
ރާއްޖެޓީވީގެ ހެޑް އޮފް ޕްރޮގްރާމް، އާމިރު ސަލީމް ވިދާޅުވީ، ހޯރަފުށީ އެއާޕޯޓްގައި ރާއްޖެޓީވީގެ ކްރޫއިން ގަސްއިންދާފައިވަނީ ހޯރަފުށި އެއަރޕޯޓް ފެހި ކުރުމަށް އެ ރަށު ރައްޔިތުންްނާއި ކައުންސިލާއި، ދާއިރާގެ މެންބަރުގެ އިސްނެންގެވުމުގެ މަތިން ފަށާފައިވާ ޕްރޮގްރާމަށް އެހީތެރިވެދިނުމުގެ ގޮތުން ކަމަށެވެ. އެގޮތުން ހޯރަފުއްޓަށް ދިއަ ރާއްޖެޓީވީގެ ޓީމުން ވަނީ އަންގާރަ ދުވަހު ރާއްޖެޓީވީ ކޮންމެ މުވައްޒަފަކަށް އެރަށު އެއަރޕޯޓުގައި ގަހެއް އިންދާފައި ކަމަށް އާމިރު ވިދާޅުވިއެވެ.
ރާއްޖެޓީވީ ޓިމުން އިންދާފައިވާ ގަސްތަކުގެ ތެރޭގައި ހޭޅިފަށުގައި ހެދޭ ބާވަތުގެ ގަހާއި، މަގޫ ގަސް ހިމެނެއެވެ.
ހޯރަފުށީ އެއަރޕޯޓް ހުޅުވުގެ ރަސްމިއްޔާތު ލައިވް ކުރުމަށް ރާއްޖެޓީވީގެ ހަ މުވައްޒަފަކު ވަނީ ހޯރަފުއްޓަށް ގޮސްފައެވެ.
ހޯރަފުށީ އެއަރޕޯޓުގައި އެއް ލައްކަ ގަސް އިންދުމުގެ ޕްރޮގުރާމު ފަށާފައިވަނީ 7 ޖެނުއަރީ 2020 ގައެވެ. "ހޯރަފުށި އެއަރޕޯޓު ފެހި ކުރުން، އަހަރުމެން އެންމެންގެ ޒިންމާ" މި ޝިއާރުގެ ދަށުން ކުރިއަށްދާ މި ހަރަކާތަށް ރަށުގެ ރައްޔިތުންގެ ފަރާތުން ބޮޑު އެއްބާރުލުމެއް ލިބެ އެވެ. ހޯރަފުށި ދާއިރާގެ މެންބަރު އަޙްމަދު ސަލީމާއި އެރަށު ކައުންސިލްގެ އިސްނެންގެވުމުގެ މަތިން ކުރިއަށް ގެންދާ މި ހަރަކާތަށް ހޯރަފުށި ކައުންސިލާއި، މުއައްސަސާތަކާއި ކުންފުނިތަކާއި، ރަށުގެ ރައްޔިތުންގެ ފަރާތުން ބޮޑު އެއްބާރުލުމެއް ލިބެ އެވެ. ރަށުގެ ރައްޔިތުން ގުޅިގެން ކުރިއަށް ގެންދާ މި ހަރަކާތަށް ބޮޑު އެއްބާރުލުމެއް ލިބިގެން ގޮސްފައިވާއިރު، އަތޮޅުގެ އެހެން ރަށްރަށުން ވެސް ގަސް ހަދިޔާކޮށްފައިވާ ކަން ފާހަގަކުރެވެ އެވެ.
ހޯރަފުށި އެއާޕޯޓް ހުޅުވުމުގެ ރަސްމިއްޔާތު ކުރިން އަންގާރަ ދުވަހު ބާއްވަން ނިންމި ނަމަވެސް މޫސުން ގޯސްވުމުގެ ސަބަބުން މި ރަސްމިއްޔާތު މިހާރު މިވަނީ ބުރާސްފަތި ދުވަހަށް ފަސްކޮށްފައެވެ.
