ހަރިކޭން އަޔޮޓަރ: މިއަހަރުގެ އެންމެ ބާރުގަދަ އެޓްލާންޓިކް ތޫފާން

ސެންޓްރަލް އެމެރިކާ ސަރަހައްދަށް ދާދިފަހުން ހަރިކޭން އެޓާ ގެ ސަބަބުން ގިނަ ގެއްލުންތަކެއް ލިބިފައިވަނިކޮށް އަނެއްކާވެސް އެ ސަރަހައްދުގައި ބާރުގަދަ ތޫފާނެއް އުފެދިއްޖެއެވެ.

ހަރިކޭން އަޔޮޓަރ ގެ ނަމުން ނަންދެވިފައިވާ ތޫފާން ވަނީ ހޯމަ ދުވަހު ކެޓަގަރީ ފަހެއްގެ ޠޫފާނަކަށް ބަދަލުވެފައެވެ. މަޔާމީ ގައި ހުންނަ ނެޝެނަލް ހަރިކޭން ސެންޓަރ އިން ބުނީ މި ތޫފާނުގެ ސަބަބުން މީހުންގެ ފުރާނައަށް ނުރައްކާ ވުމަކީ އެކަށީގެންވާކަމެއް ކަމަށާ ބޯކޮށް ވާރޭވެހުމާ އެކު ބާރަށް ވައިޖެހޭނެ ކަމަށެވެ.

މި ތޫފާން ގަޑިއަކު 9 މޭލަށް ހުޅަނގަށް ދަތުރު ކުރަމުން ދާއިރު މި ތޫފާން ވަނީ ނިކަރާގުއާ އާ ހަމައަށް ފޯރާފައިއެވެ. އަދި ތޫފާނުގައި ގަޑިއަކު 155 މޭލަށް ވައިޖެހެމުން ދާއިރު، ތޫފާނުގެ އަސަރު ކުރަމުންދާ ހިސާބުތަކަށް 15 ފޫޓާ 20 ފޫޓާ ދެމެދަށް ފެންބޮޑުވުން އެކަށީގެންވާ ކަމަށް މޫސުމާ ބެހޭ އިދާރާތަކުން ވަނީ އިލްތިމާސްކޮށްފައެވެ.

ތޫފާނުގެ މިސްރާބު ހުރި ގޮތުން ހޮންޑިއުރަސް އާއި ގުއެޓަމާލާ އަށް ވެސް މި ތޫފާނުގެ އަސަރު ކުރާނެ ކަމަށް ލަފާކޮށް މި ހިސާބުތަކުގައި ދިރިއުޅޭ ފަރާތްތައް ރައްކާތެރި ސަރަހައްދުތަކަށް އުފުލުމުގެ މަސައްކަތް އަންނަނީ ކުރަމުންނެވެ.

ހަރިކޭން އެޓާގެ ސަބަބުން 200 އެއްހާ މީހުން މަރުވެފައިވާއިރު، މި ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވިފައިވަނީ އެޓާގެ ސަބަބުން ގެއްލުން ލިބުނު ސަރަހައްދުތަކަށެވެ.