ބޯޑަރު އަލުން ހުޅުވިފަހުން އެންމެ ގިނަ ފަތުރުވެރިން އައީ އިއްޔެ
16 ނޮވެމްބަރު 2020 | ހޯމަ 09:382240 ފަތުރުވެރިން އާދިއްތަ ދުވަހު ރާއްޖެއަށް ޒިޔާރާތްކުރި
ރާއްޖެއަށް އަންނަ ފްލައިޓްތަކުގެ އަދަދާއި ފަތުރުވެރިންގެ އަދަދުތައް އަންނަނީ މަހުންމަހަށް އިތުރުވަމުން
ކޮވިޑުގެ ހާލަތާއި ގުޅިގެން ރާއްޖޭގެ ބޯޑަރުތައް ބަންދުކުރުމަށް ފަހު އަލުން ހުޅުވާލި ފަހުން އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި ދުވަހަށް އާދިއްތަ ދުވަސް ވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓުން މައުލޫމާތު ދިން ގޮތުގައި އާދިއްތަ ދުވަހު 2240 ފަރުވެރިން ރާއްޖެ އައިސްފައިވެއެވެ. އަދި 13 އިންޓަރނޭޝަނަލް ފްލައިޓް އަދި 9 ޕްރައިވެޓް ޖެޓް ރާއްޖެއަށް ޖައްސާފައިވެއެވެ. އާދިއްތަ ދުވަހު ރާއްޖެއިން ފުރާފައި ވަނީ 1621 ފަތުރުވެރިއެކެވެ. ކާގޯ ފްލައިޓްތަކަށް ބަލާއިރު، ދެ ފްލައިޓެއް އޮޕަރޭޓް ކޮށްފައިވެއެވެ. އެގޮތުން 84.27 ޓަނު ކާގޯ ރާއްޖެއަށް އެތެރެކޮށްފައިވާއިރު، 48.71 ޓަނު ކާގޯ ރާއްޖެއިން ބޭރުކޮށްފައިވެއެވެ.
ޑޮމެސްޓިކް ފްލައިޓްތަކުގެ ދަތުރުތައް ވެސް ގިނަ އަދަދަކަށް ކޮށްފައިވާއިރު، އަލުން ބޯޑަރު ހުޅުވާލިފަހުން އާދިއްތަ ދުވަހަކީ އެއަރޕޯޓް އޮޕަރޭޝަނުގައި އެހެން ދުވަސްތަކަކާ އަޅާބާއިރު ބުރަ ދުވަހެއްކަން އެމްއޭސީއެލްއިން ފާހަގަކުރިއެވެ.
ދާއިރާގައި ހަރަކާތްތެރިވާ ފަރާތްތަކުން ލިބިފައިވާ މައުލޫމާތަށް ބަލާއިރު ކުރިއަށް އޮތް ހަފްތާއިން ފެށިގެން ރާއްޖެއަށް އަންނަ ފަތުވެރިންގެ އަދަދު އިތުރުވެގެންދާނެއެވެ. އަދި މިއީ ރާއްޖޭގެ ފަތުރުވެރިކަމުގެ "ސީޒަން" ދުވަސްވަރު ކަމުން، ދުވަހުންދުވަހަށް މި އަދަދުތައް އިތުރުވެގެން ދާނެ ކަމަށް ބެލެވެއެވެ.
ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާ ގޮތުގައި ބޯޑަރުތައް އަލުން ހުޅުވާލި ފަހުން ރާއްޖެއަށް 51،354 ފަތުރުވެރިން އައިސްފައިވެއެވެ. އަދި ނޮވެމްބަރު މަހުގެ އެވަރެޖްކޮށް 997 ފަތުރުވެރިން ވަނީ ރާއްޖެއަށް އައިސްފައެވެ.
ބޯޑަރު އަލުން ހުޅުވާލި ފަހުން ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައި ވަނީ ރަޝިއާއިންނެވެ. އެ ގައުމުން މިހާތަނަށް 11،240 ފަތުރުވެރިން ޒިޔާރަތްކޮށްފައިވާއިރު، ޔުނައިޓެޑް އަރަބް އެމިރޭޓްސް، އެމެރިކާ، އިނގިރޭސިވިލާތް، އިންޑިއާ، ޖަރުމަނުވިލާތް، ފްރާންސް، ބްރެޒިލް، ޔޫކްރެއިން އަދި ސްޕެއިން ފަދަ ގައުމުތަކުން ވެސް ރާއްޖެއަށް ގިނަ އަދަދަކަށް ފަތުރުވެރިން އައިސްފައިވެއެވެ.
ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދުވަހެއްދުވަހަކަށް އިތުރު ވަމުން އަންނައިރު ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ބުނަމުންދަނީ މި އަހަރު ރާއްޖެއަށް ޒިޔާރަތް ކުރާނެ ކަމަށް ބެލެވެނީ 800،000 ފަތުރުވެރިން ކަމަށެވެ.
