އަމާޒަކީ ގަނޑުކުރި މަސް ތައިލެންޑަށް ބޭރުކުރުން ހުއްޓާލުން: ޒަހާ
މަސްވެރިކަމުގެ ސިނާއަތަށް އެއްމެ ފައިދާ ބޮޑީ، އަގު އެއްކުރުމުގެ މަސައްކަތް ރާއްޖޭގައި ކުރުމުން
ރާއްޖޭގައި ބާނާ މަހުގެ ތެރެއިން ބޮޑު އިންސައްތައެއް ޕްރޮސެސް ކުރަނީ ތައިލެންޑަށް ގަނޑުކުރި މަހުގެ ގޮތުގައި އެކްސްޕޯޓް ކޮށްގެން
އަމާޒަކީ ރާއްޖޭގައި ބާނާ މަސް ގަނޑުކުރި މަހުގެ ގޮތުގައި ތައިލެންޑަށް ބޭރުކުރުން ހުއްޓާލަން ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
ރާއްޖެޓީވީގެ "ބަޖެޓު 2021" ޕްރޮގްރާމުގައި އަންނަ އަހަރަށް އެ މިނިސްޓްރީއިން ގެންގުޅޭ ތަސައްވަރުގެ ވާހަކަ ދައްކަވަމުން ޒަހާ ވިދާޅުވި ގޮތުގައި، ރާއްޖޭގެ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް އެންމެ ފައިދާ ބޮޑީ ރާއްޖޭގައި ބާނާ މަސް ރާއްޖޭގައި ބަންދު ކުރެވޭނެ ނިޒާމެއް ގާއިމުކޮށް، ރާއްޖޭގައި އަގު އެއްކުރެވޭނެ އިންތިޒާމެއް ހަމަޖެހިގެން ދިއުމެވެ.
ރާއްޖޭގައި ބާނާ މަސް ރާއްޖޭގައި އަގު އެއްކުރުމަށް ދިމާވެފައިވާ ގޮންޖެހުންތަކާއި ގުޅޭ ގޮތުން ޒަހާ ވިދާޅުވީ، ކަނޑުއޮއްގިރި އަދި މިފްކޯގެ ފެސިލިޓީތަކުގައި ދަޅު މަހުގައި މަސް ކުރެވޭނެ ނިޒާމެއް ގާއިމް ކުރެވިފައިވީ ނަމަވެސް އެކަށީގެންވާ ވަރުގެ މަސް ރައްކާކުރެވޭނެ ނިޒާމެއް ގާއިމް ކުރެވިފައި ނުވާ ކަން މިނިސްޓަރ ފާހަގަ ކުރެއްވިއެވެ.
މަސް ބަންދުކުރުމުގެ ކެޕޭސިޓީ އިތުރު ކުރުމަށް ސަރުކާރުން ކުރަމުންދާ މަސައްކަތްތަކުގެ ތެރޭގައި، މިފްކޯގައި މިިހާރު ހުރި 3،000 ޓަން ސްޓޯރޭޖް ކެޕޭސިޓީ 10،000 ޓަނަށް އިތުރު ކުރުމަށް 30 މިލިއަން ރުފިޔާގެ މަޝްރޫއެއް ފެއްޓުމަށް އަންނަނީ ތައްޔާރު ވަމުންނެވެ.
އޭގެ އިތުރުން އިންޑިއާގެ ލައިން އޮފް ކްރެޑިޓް ފެސިލިޓީގެ ދަށުން މިފްކޯގެ ތަރައްގީއަށް 17.5 މިލިއަން ޑޮލަރު އެހީއެއް ވަނީ ކަނޑައަޅާފައެވެ. މި އެހީގެ ދަށުން ޅ. ފެލިވަރު ފިޝަރީޒް ކޮމްޕްލެކްސްގައި މަސް ކަލެކްޓްކޮށް ބެހެއްޓޭނެ ސްޓޯރޭޖް ފެސިލިޓީ ގާއިމުކޮށް ޓޫނާ ކުކްޑް ލޮއިންސް ޕްލާންޓަކާއި، ފިޝްމީލް ޕްލާންޓެއް ގާއިމު ކުރާނެއެވެ. އަދި ގއ. ގެމަނަފުށީގައި 50 މެޓްރިކް ޓަނުގެ އައިސް ޕްލާންޓެއް ގާއިމުކޮށް 100 މެޓްރިކް ޓަނުގެ އައިސް ސްޓޯރެޖް ކެޕޭސިޓީއެއް ގާއިމް ކުރެވިގެން ދާނެއެވެ.
މަސްވެރިކަމުގެ ސިނާއަތަށް ދިމާވެފައިވާ މައްސަލަތައް ހައްލު ކުރުމަކީ މި ސަރުކާރުން މުހިއްމު އެއް މަސައްކަތެވެ. އެގޮތުން މަސްވެރިން ބާނަ މަހަށް ހަމައަގު ހޯދައިދީ، ރާއްޖޭގައި ބާނާ މަހުގެ ބާވަތްތައް ރާއްޖޭގައި ޕްރޮސެސް ކުރެވޭނެ ނިޒާމެއް ގާއިމް ކުރުމަށް ވަނީ ރާވާފައެވެ. އަދި ހަމައެހެންމެ، މަސްވެރިކަމާއި ގުޅޭ ދުވަސްވީ ގާނޫނުތަކާއި ގަވައިދުތައް އަދާހަމަ ކުރުމުގެ މަސައްކަތް ވެސް ސަރުކާރުގެ ލެޖިސްލޭޓިވް އެޖެންޑާގެ ތެރެއިން ރައްޔިތުންގެ މަޖިލިހާ ގުޅިގެން ކުރަމުންނެވެ.
