ކޮވިޑް ޖެހިގެން އިތުރު ދިވެއްސަކު މަރުވެއްޖެ، މިއީ 44 ވަނަ މަރު
16 ނޮވެމްބަރު 2020 | ހޯމަ 02:55ނިޔާވީ 52 އަހަރުގެ ދިވެހި ފިރިހެނެއް
ރާއްޖޭގައި ކޮވިޑް ޖެހިގެން ނިޔާވި ވަޅުލުމުގެ މަސައްކަތުގައި ބަޔަކު ހަރަކާތްތެރިވަނީ
ރާއްޖެއިން ކޮވިޑް-19 އަށް ފަރުވާ ހޯދަމުން ދިޔަ އިތުރު ދިވެއްސަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާ ގޮތުގައި އާދީއްތަ ދުވަހުގެރޭ ނިޔާވި މީހާއަކީ ހުޅުމާލޭ މެޑިކަލް ފެސިލިޓީގައި 11:32 ހާއިރު އެޑްމިޓްކޮށްގެން ފަރުވާދެމުންދިޔަ މީހެއް ކަމަށެވެ. އަދި ނިޔާވި މީހާއަކީ އުމުރުން 52 އަހަރުގެ ދިވެހި ފިރިހެނެއް ކަމަށެވެ.
މިއާއެކު ރާއްޖެއިން ކޮވިޑް ޖެހިގެން މަރުވި މީހުންގެ ޖުމުލަ އަދަދު ވަނީ 44 އަށް އަރާފައެވެ. މިއީ މި މަސް ތެރޭގައި ރާއްޖެއިން މި ބަލީގައި ނިޔާވި ފަސްވަނަ މީހާއެވެ. މި ބަލީގައި މިހާތަނަށް 36 ދިވެހިންނާއި 8 ބިދޭސީއަކު ވަނީ ދުނިޔެ ދޫކޮށްފައެވެ.
ކޮވިޑްގެ އެހެނިހެން ތަފާސްހިސާބުތަކަށް ބަލާއިރު އާދީއްތަ ދުވަހު ޕޮޒިޓިވްވި މީހުންގެ އަދަދު 50 އަށް ވަނީ މަތިވެފައެވެ. އެއީ އަތޮޅު ތެރެއިން ޕޮޒިޓިވްވި 29 މީހުންނާއި މާލެއިން ޕޮޒިޓިވްވި 21 މީހުންނެވެ.
