ޖޭއެސްސީގެ އިތުބާރު ބޮޑުވެ، ހުށައަޅާ ޝަކުވާތައް އިތުރުވެއްޖެ: 2018 ގައި އެންމެ 9 ޝަކުވާ، މި އަހަރު 312

ޖުޑީޝަލް ސަރވިސް ކޮމިޝަން (ޖޭއެސްސީ) އަށް ރައްޔިތުން ކުރާ އިތުބާރު ބޮޑުވެ، ފަނޑިޔާރުންނާ ގުޅިގެން ރައްޔިތުން ހުށައަޅާ ޝަކުވާގެ މިންވަރުވެސް އިތުރުވެފައިވާކަމަށް ބަންޑާރަނައިބު (އޭޖީ) އިބްރާހިމް ރިއްފަތު ވިދާޅުވެއްޖެއެވެ.

ބުދަ ދުވަހު ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ބަންޑާރަނައިބު ވިދާޅުވީ، މީގެ ކުރިންވެސް ފަނޑިޔާރުންނާ ގުޅިގެން ޝަކުވާ ހުށައެޅޭ ކަމަށާއި، ނަމަވެސް އޭރު އެ ޝަކުވާތަކަށް ވާނުވާ ރައްޔިތުންނަށް ވެސް އޮޅުން ނުފިލާ ކަމަށެވެ. އެހެން ނަމަވެސް މިހާރު ޖޭއެސްސީން އެ މަސައްކަތް ކުރިއަށް ގެންދަނީ ވަރަށް ދެފުށް ފެންނަ ގޮތެއްގައިކަން ފާހަގަ ކުރައްވައި ބަންޑާރަނައިބު ވިދާޅުވީ، ފަނޑިޔާރުން މަޤާމަށް ހޮއްވަވާއިރުވެސް އެ ފަނޑިޔާރެއްގެ ނަޒާހަތްތެރިކަމާއި، ފަނޑިޔާރަކާއި ގުޅިގެން ހުށައެޅިފައިވާ ތުހުމަތުތަކަށް ރިއާޔަތް ކުރައްވައި ބައްލަވާ ކަމަށެވެ.

އޭގެ އިތުރުން، ފާއިތުވި އަހަރުތަކުގެ ތަފާސްހިސާބުތަކަށް އަލިއަޅުވާލައްވާ ބަންޑާރަނައިބް ވިދާޅުވީ، 2018 ވަނަ އަހަރު ފަނޑިޔާރުންނާ ގުޅިގެން ޖޭއެސްސީއަށް ހުށައަޅާފައި ވަނީ އެންމެ 9 ޝަކުވާ ކަމަށެވެ. އެހެން ނަމަވެސް، ޝަކުވާ ބެލުމުގެ ނިޒާމު ހަރުދަނާވެގެން ދިއުމުގެ ނަތީޖާއެއްގެ ގޮތުން ރައްޔިތުންގެ އިތުބާރުވެސް އެތައް ގުނައަކަށް އިތުރުވެފައިވާކަން ފާހަގަ ކުރައްވައި ބަންޑާރަނައިބު ވިދާޅުވީ، 2019 ވަނަ އަހަރު އެ އަދަދު 114 އަށް އިތުރުވެގެން ދިޔަ ކަމަށެވެ.

ބަންޑާރަނައިބް އިތުރަށް ވިދާޅުވީ، މި އަހަރުގެ މިހާތަނަށް އެކަނިވެސް 312 ޝަކުވާ ހުށައަޅާފައިވާ ކަމަށާއި، ފަނޑިޔާރަކާ ގުޅިގެން މައްސަލައެއް ހުށައެޅިއްޖެ ނަމަ އެކަން ބަލާނެ ކަމުގެ ޔަޤީންކަން މިއަދު ރައްޔިތުންނަށް ވެސް ލިއްބައިދީފައިވާ ކަމަށެވެ.

އައު މެމްބަރުންތަކާއެކު ޖޭއެސްސީން ކުރަމުންދާ މަސައްކަތްތަކަށް މިއަދު ގިނަ ބައެއްގެ ތައުރީފު ދަނީ ލިބެމުންނެވެ. އެގޮތުން ފަނޑިޔާރުންނާ ގުޅިގެން ހުށައެޅޭ ސުލޫކީ މައްސަލަތައް ބަލަމުންދާއިރު، އެކަމުގެ ތަފްސީލުތައް އާންމުންނަށް ވެސް ގެންދަނީ ފޯރުކޮށްދެމުންނެވެ. އަދި ކުރެވޭ ތުހުމަތުތަކާ ގުޅިގެން ތަހުޤީޤު ކުރުމަށްފަހު ފަނޑިޔާރުންނާމެދު އަޅަންޖެހޭ ފިޔަވަޅު އަޅާ މަންޒަރުވެސް މިއަދު ފެންނަމުންދާ ކަމަށް ގިނަ ބަޔަކު ބުނެއެވެ.