ހޯރަފުށި ރައްޔިތުންގެ ފަރާތުން މުޅި ރާއްޖެއަށް އެކުވެރިކަމުގެ ނަމޫނާ ދައްކަނީ!
14 ނޮވެމްބަރު 2020 | ހޮނިހިރު 12:45މިމަހު 17 ވަނަދުވަހު ހޯރަފުށި އެއަރޕޯޓު ހުޅުވާ ހޯމަ ދުވަހު ދުވަހު އެ އެއާޕޯޓަށް ފުރަތަމަ ޓެސްޓް ފްލައިޓް ޖައްސަނީ
ހޯރަފުށި ރައްޔިތުން އެއަރޕޯޓް ރަންވޭ ސާފު ކުރަނީ
މިމަހު 17 ވަނަދުވަހު ހޯރަފުށި އެއަރޕޯޓު ހުޅުވާ ހޯމަ ދުވަހު ދުވަހު އެ އެއާޕޯޓަށް ފުރަތަމަ ޓެސްޓް ފްލައިޓް ޖައްސަން ހަމަޖެހިފައިވާއިރު ރައްޔިތުންގެ ފަރާތުން މުޅި ރާއްޖެއަށް އެކުވެރިކަމުގެ ނަމޫނާ ދައްކަނީ އެވެ.
އެރަށު ކައުންސިލްގެ ރައީސް މުހައްމަދު ވަހީދު ވިދާޅުވީ އެރަށު ރައްޔިތުން އިސްނަގައިގެން އެއަރޕޯޓު ހުޅުވުމަށް ތައްޔާރު ވުމުގެ ގޮތުން ރަށު ތެރެ ސާފު ކުރުމުގެ ޕްރޮގްރާމެއް ފަށައިފައި ވާކަމަށެވެ. އެގޮތުން ހުކުރު ދުވަހުން ފެށިގެން އެރަށު އަންހެންވެރިން އެއަރޕޯޓުގެ ރަންވޭ އެއްކޮށް ފޮޅައި ސާފުކޮށްފައިވާ ކަމަށެވެ.
މީގެ އިތުރުން ހޮނިހިރު ދުވަހު އެރަށު ހުރިހާ ރައްޔިތުން ވެގެން މުޅި ރަށުތެރެ ސާފު ކުރަން ފަށާފައިވާ ކަމަށަވެ. އެގޮތުން މުޅި ރަށު ތެރޭގައި ކުލަލުމާއި ބެނާ ހަރު ކުރުމާއި ދިދަ ދެމުމުގެ ކަންކަން އެރަށުގެ ރައްޔިތުން ވަރަށް ކުރާހިތުން ކުރަމުން ގެންދާ ކަމަށް ވަހީދު ފާހަގަ ކުރައްވާފައިވެ އެވެ. އަދި މި މަސައްކަތްތަކުން ވެސް އެރަށުގެ ރައްޔިތުންގެ އެއްބައިވަންތަކަން ފެނިގެންދާ ކަމަށް ވަހީދު ނަުހަނު އުފަލާއެކު ފާހަގަ ކޮށްފައިވެ އެވެ.
ހޯރަފުށި ރައްޔިތުންގެ ހުވަފެނެއް ކަމަށްވާ ހޯރަފުށީގައި އަޅާފައިވާ އެއަރޕޯޓް ހަގީގަތަކަށް ހެދުމަށް މަސައްކަތް ކުރަމުން ގެންދާ ބައެއް ފަރާތަކަށް ވަހީދު ޝުކުރު އަދާކޮށްފައިވެ އެވެ. އެގޮތުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ހުއްޓުމެއްނެތި 24 ގަޑިއިރު ކުރަމުން ގެންދާ ބުރަ މަސައްކަތަށް ޝުކުރުއަދާކޮށްފައިވެ އެވެ. މީގެ އިތުރުން ހޯރަފުށި ދާއިރާގެ މެމްބަރ އަހުމަދު ސަލީމު ހޯރަފުށި ރައްޔިތުންނަށް ކޮއްދެއްވަމުން ގެންދާ މަސައްކަތް ފާހަގަކޮށް އެކަމަށް ފަށްފަށުން އެރަށުގެ އެންމެހާ ރައްޔިތުންގެ ނަންމަތީ ޝުކުރު އަދާކޮށްފައިވެ އެވެ.
ހަމައެފަދައިން ހޯރަފުށި ޖަމިއްޔާ ޖަމާއަށް ތަކާއި ހޯރަފުށި ކައުންސިލް އިދާރާގެ އެންމެހާ ފަރާތް ތަކުން އަމިއްލައަށް އިސް ނަގައިގެން ކުރަމުން ގެންދާ މަސައްކަތް ތަކަށްވެސް ޝުކުތު އަދާކޮށްފައިވެ އެވެ.
ހޯރަފުށީ އެއާޕޯޓުގެ ރަންވޭ އާއި ޓެކްސީވޭ އަދި އޭޕްރަން ތަރައްގީކުރުމުގެ މަޝްރޫއުގެ އަގު 198 މިލިޔަނަށް އަރާއިރު، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން މި މަސައްކަތް އަމަލީ ގޮތުން އެމްޓީސީސީއާއި ހަވާލުކޮށްފައި ވަނީ 2019 ވަނަ އަހަރުގެ މާޗް މަހުގެ 25 ވަނަ ދުވަހު އެވެ. އަދި އެއަރޕޯޓް ޓާމިނަލް އަދި ފަޔަރ ބިލްޑިން ތަރައްގީ ކުރުމުގެ މަޝްރޫއުގެ މަސައްކަތް 2020 ވަނަ އަހަރުގެ ސެޕްޓެމްބަރ މަހުގެ 13 ވަނަ ދުވަހު އެމްޓީސީސީއާއި ހަވާލުކޮށްފައިވަނީ 80 ދުވަހުގެ މުއްދަތަށެވެ.
އާބާދީގައި ތިންހާހަށްވުރެ ގިނަ މީހުން ރަޖިސްޓްރީވެފައިވާ ހޯރަފުށީގައި އެއާޕޯޓް އެޅުމުން، އެ ރަށާ ކައިރީގައި އޮންނަ އެހެނިހެން ރަށްތަކަށް ނުހަނު ފަސޭހަތަކެއް ލިބިގެންދާނެ އެވެ.
