އެމެރިކާއިން ހުކުރު ދުވަހު އެކަނިވެސް 183,527 (އެއްލައްކަ އައްޑިހަތިންހާސް ފައްސަތޭކަ ހަތާވީސް) މީހުން ޕޮޒިޓިވްވެ، މިހާތަނަށް އެންމެ ގިނަ މީހުން ޕޮޒިޓިވްވި ދުވަހުގެ ރެކޯޑް ހަދައިފިއެވެ.

ނޮވެމްބަރ މަހުގެ ފަސްވަނަ ދުވަހުން ފެށިގެން އެމެރިކާއިން ޕޮޒިޓިވްވާ މީހުންގެ އަދަދު ދުވާލަކު އެއްލައްކައަށް ވުރެ މަތީގައި އުޅޭއިރު އެ ގައުމުން މުޅި ޖުމްލަ ކޮވިޑަށް ޕޮޒިޓިވްވި މީހުންގެ އަދަދު ވަނީ 11،064،364 (އެގާރަ މިލިއަން ފަސްދޮޅަސް ހަތަރު ހާސް ތިންބސަތޭކަ ފަސްދޮޅަސް ހަތަރެއް) އަށް އަރާފައެވެ. އެ ގައުމުގެ ރިޔާސީ އިންތިޚާބުގެ ވޯޓު ގުނުމުގެ މަސައްކަތްތަކަށް ފަހު އެ ގައުމުގެ ކޮވިޑްގެ ހާލަތު ވަނީ އިންތިހާއަށް ގޯސްވެފައެވެ. އެމެރިކާއަކީ މުޅި ދުނިޔެއިންވެސް ކޮވިޑްގެ ހާލަތު އެންމެ ގޯސް ގައުމެވެ.

މުޅި އެމެރިކާގައި ވައިރަސް ޖެހިފައިވާ މީހުންގެ 10 އިންސައްތަ ހިއްސާކުރަނީ ޓެކްސަސް ސްޓޭޓުންނެވެ. އެ ސްޓޭޓުން ދުވާލެއްގެ މައްޗަށް ކޮވިޑް ޖެހިގެން ރިޕޯޓްކުރާ މީހުންގެ އަދަދު އަންނަނީ ދުވަހެއް ދުވަހަކަށް އިތުރުވަމުންނެވެ. އެގޮތުން ފާއިތުވި ހަތަރު ދުވަހު އެ ސްޓޭޓުން 10،000 އަށް ވުރެ ގިނަ ކޭސް ރިޕޯޓްކޮށްފައިވެއެވެ. އަދި އެއް ސްޓޭޓަކުން މިލިއަނަކަށް ވުރެ ގިނަ މީހުންނަށް ވައިރަސް ޖެހިގެން ރިޕޯޓްކުރާ ފުރަތަމަ ސްޓޭޓަށް ޓެކްސަސް ވުން ގާތް ކަމަށް މާހިރުން އަންދާޒާކުރެއެވެ.

ވައިރަސް ޖެހޭ މީހުންނެކޭ އެއްފަދައިން ވައިރަސް ޖެހިގެން މަރުވާ މީހުންގެ އަދަދުތައްވެސް އަންނަނީ އިތުރުވަމުންނެވެ. އެގޮތުން ދުވާލެއްގެ މައްޗަށް އެވްރެޖްކޮށް 1000 މަރު ރިޕޯޓްކުރަމުން އަންނައިރު، އެ ގައުމުން ކޮވިޑް-19 ޖެހިގެން 249،975 (ދެލައްކަ ސާޅީސް ނުވަ ހާސް ނުވަ ސަތޭކަ ހައްދިހަފަސް) މީހުން ވަނީ މަރުވެފައެވެ.