ލިވަޕޫލަށް ކުޅެމުން އަންނަ މިސްރުގެ ފޯވާޑް މުޙައްމަދު ސަލާހު ކޮވިޑް-19 އަށް ޕޮޒިޓިވްވެއްޖެއެވެ.

ސަލާހް ކޮވިޑް-19 އަށް ޕޮޒިޓިވްވެފައިވަނީ މިސްރުގެ ގައުމީ ފުޓްބޯޅަ ޓީމާއެކު ބައިނަލްއަގުވާމީ ބްރޭކުގައި ފަރިތަކުރަމުން ދަނިކޮށެވެ. ބުރާސްފަތި ދުވަހު މިސްރުގެ ކުޅުންތެރިން ވައިރަހަށް ޓެސްޓު ކޮށްފައިވާއިރު، ކޮވިޑް-19 އަށް ޕޮޒިޓިވްވީ ސަލާހު އެކަންޏެވެ. އެއާއެކު ސަލާހު ސެލްފް-އައިސޮލޭޝަނަށް ގޮސްފައިވާ ކަމަށް މިސްރުގެ ފުޓްބޯޅަ އިދާރާއިން ވަނީ ހާމަކޮށްފައެވެ.

ސަލާހު ކޮވިޑް-19 އަށް ޕޮޒިޓިވްވިއިރު، ބައިނަލްއަގުވާމީ ބްރޭކުގައި މިސްރުން ދެ މެޗެއް ކުޅޭނެއެވެ. އެއީ އެފްރިކާ ކަޕް އޮފް ނޭޝަންސްގެ ކޮލިފައިންގައި އަމިއްލަ ގައުމުގަ އާއި ރަށުން ބޭރުގައި ޓޯގޯއާ ދެކޮޅަށް ކުޅޭ ދެ މެޗެވެ.

ސަލާހު ކޮވިޑް-19 އަށް ޕޮޒިޓިވްވުމަކީ ލިވަޕޫލަށް ލިބޭނެ ވަރަށް ބޮޑު ގެއްލުމެކެވެ. އެގޮތުން އެ ޓީމުގެ ގިނަ ކުޅުންތެރިންތަކެއް މިހާރުވެސް ތިބީ އަނިޔާގައި ކުޅުމާ ދުރުގައެވެ. އެގޮތުން އެ ޓީމުގެ ފަހަތަށް ކުޅެމުން އަންނަ ވާޖިލް ވެން ޑައިކާއި، ފަބީނިއޯ އާއި، ޓްރެންޓް އަލެކްސަންޑަ-އާނޯލްޑް އަދި ޖޯ ގޮމޭޒްވެސް ހުރީ އަނިޔާގައި ކުޅުމާ ދުރުގައެވެ. އަދި މި ސީޒަނުގައި އެ ޓީމާ އަލަށް ގުޅުނު މިޑްފީލްޑަރު ތިއާގޯ އަލްކަންޓާރާވެސް މި ވަގުތު ހުރީ އަނިޔާގެ ސަބަބުން ކުޅުމާ ދުރުގައެވެ.

ބައިނަލްއަގުވާމީ ބްރޭކަށްފަހު ލިވަޕޫލުން ދެން މެޗެއް ކުޅޭނީ މި މަހުގެ 21 ވަނަ ދުވަހުއެވެ. އެ ދުވަހު އަމިއްލަ ދަނޑުގައި އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން ލިވަޕޫލް ނުކުންނާނީ ލެސްޓާ ސިޓީއާ ދެކޮޅަށެވެ.