މިސްރުގެ ރިޔާސީ އިންތިހާބުގައި ލިވަޕޫލްއަށް ކުޅެމުން އަންނަ އެ ގައުމުގެ ގައުމީ ޓީމުގެ ކެޕްޓަން މުހައްމަދު ސަލާހުއަށް އެއް މިލިއަނަށް ވުރެ ގިނަ ވޯޓު ލިބިފައިވާ ކަމަށް ރިޕޯޓުތައް ބުނެފިއެވެ.

އިޓަލީގެ ރޯމާއިން ލިވަޕޫލްއަށް ބަދަލުވުމާއެކު އުމުރުން 25 އަހަރުގެ ފޯވާޑުގެ މަގުބޫލުކަން ވަނީ އިންތިހާއަށް އިތުރުވެފައެވެ. އޭނާވަނީ ޔާގަން ކްލޮޕްގެ ލިވަޕޫލްއަށް މި ސީޒަނުގެ މިހާނަތަށް ކުޅުނު 41 މެޗުގައި 36 ލަނޑު ޖަހައިދީފައެވެ.

މިސްރުގެ ގައުމީ ޓީމަށް ވެސް ކުޅުނު 55 މެޗުގައި ސަލާހު 33 ލަނޑު ޖަހާފައިވާއިރު އޭނާއަށް ގައުމުގެ ރައްޔިތުންގެ ލޯތްބާއި އިހުތިރާމު ލިބިގެންދިޔައީ ފީފާ ވޯލްޑް ކަޕުން އެ ގައުމަށް ޖާގައެއް ކަށަވަރުކޮށްދިނުމާއި ގުޅިގެންނެވެ. އެގޮތުން އެފްރިކާ ބައްރުގެ ކޮލިފައިންގެ އެންމެ ފަހު ބުރުގެ އެންމެ ފަހު މެޗުގައި ކޮންގޯއާ ދެކޮޅަށް ސަލާހު ކާމިޔާބުކުރި ލަނޑަކީ، އެ ޓީމަށް ވޯލްޑް ކަޕުން ފުރުސަތު ލިބުނު ސަބަބެވެ.

މިސްރުގެ ރިޔާސީ އިންތިހާބަށް އޭނާ ކުރިމަތިނުލި ނަމަވެސް ވޯޓުލި 25 މިލިއަނަށް ވުރެ ގިނަ މީހުންގެ ތެރެއިން އެއް މިލިއަނަށް ވުރެ ގިނަ މީހުން ސަލާހުއަށް ވޯޓު ދީފައިވާ ކަމަށް ރިޕޯޓުތައް ބުނެއެވެ. މިއީ އިންތިހާބުގެ ދެވަނައަށް ދިޔަ މޫސާ މުސްތަފާއަށް ލިބުނު އަދަދަށްވުރެ ދެގުނަ އިތުރު އަދަދެއް ކަމަށް ވެސް ރިޕޯޓުތައް ބުނެއެވެ. ވޯޓުލި މީހުންގެ 92 އިންސައްތަ ވޯޓާއެކު މި އިންތިހާބު ކާމިޔާބު ކުރެއްވި މިހާރު ވެސް އެ ގައުމުގެ ރައީސްކަން ކުރައްވަމުން އަންނަ އަބްދުލް ފައްތާހު އަލް ސީސީއެވެ.

މި ސީޒަނުގައި ސަލާހުއަށް އިތުރު ރެކޯޑު ގާއިމުކުރުމުގެ ފުރުސަތު ހުޅުވިފައިވާއިރު ޕްރިމިއާ ލީގުގެ ލަނޑު ލިސްޓުގެ އެއްވަނައިގައި 28 ލަނޑާއެކު ވެސް އޮތީ ސަލާހުއެވެ.