ޕްރިމިއާ ލީގު: ސަލާހުގެ 29 ވަނަ ލަނޑާއެކު ލިވަޕޫލް މޮޅުވެއްޖެ

އިނގިރޭސި ޕްރިމިއާ ލީގުގައި މުހައްމަދު ސަލާހު ކާމިޔާބު ކުރި 29 ލަނޑާއެކު ފަހަތުން އަރައި ކްރިސްޓަލް ޕެލަސްގެ މައްޗަށް ލިވަޕޫލްއިން ކުރި ހޯދައިފިއެވެ.

ކްރިސްޓަލް ޕެލަސްގެ ދަނޑު ކަމަށްވާ ސެލަހަސްޓް ޕާކްގައި ކުޅުނު މި މެޗު ލިވަޕޫލްއިން ކާމިޔާބުކުރީ ފަހަތުން އަރައި 2-1 ގެ ނަތީޖާއަކުންނެވެ. ލިވަޕޫލްގެ ފަރާތުން ވަރުގަދަ ފުރަތަމަ އެގާރައެއް ފެނިގެންދިޔައިރު އެ ޓީމުގެ ފުރަތަމަ އެގާރައިން ޖަރުމަނުގެ މިޑްފީލްޑަރު އެމްރޭ ޗާންއަށް އަނިޔާގެ ސަބަބުން ފުރުސަތު ދީފައެއް ނުވެއެވެ. ކްރިސްޓަލް ޕެލަސްގެ ޓީމުން ދެ ބަދަލެއް ފެނިގެންދިޔަ އިރު ކްރިސްޓަލް ޕެލަސް މި ސީޒަނުގައި ކުޅެމުން އަންނަނީ ރެލިގޭޝަނުން ސަލާމަތްވުމުގެ އުއްމީދުގައެވެ.

ފުރަތަމަ ހާފު ފެށިގެން ލިވަޕޫލްއިން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް ކްރިސްޓަލް ޕެލަސްއިން ވަނީ ކައުންޓާގައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މެޗުގެ ފުރަތަމަ ލަނޑު ޖަހާ ލީޑު ވެސް ނެގީ ޕެލަސްއިންނެވެ. މި ލަނޑު މެޗުގެ 12 ވަނަ މިނެޓުގައި ލިބުނު ޕެނަލްޓީއަކުން އެ ޓީމަށް ޖަހައިދިނީ ލޫކާ މިލޮޖެވިޗްއެވެ. މެޗުގެ 30 ވަނަ މިނެޓުގައި ލިވަޕޫލްއިން ލަނޑެއް ޖެހި ނަމަވެސް ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ.

އެއް ލަނޑުގެ ލީޑެއްގައި އޮވެ ޕެލަސްއިން ފުރަތަމަ ހާފު ނިންމާލިއިރު ދެވަނަ ހާފުގައި ލިވަޕޫލްއިން ވަނީ މޮޅު ކުޅުމެއް ދައްކާފައެވެ. ދެވަނަ ހާފު ފެށިގެން ހަތަރު މިނެޓު ނުވަނީސް ލިވަޕޫލްއިން އެއްވަރުކުރި އިރު އެ ޓީމަށް މި ލަނޑު ޖަހައިދިނީ ސަދިއޯ މާނޭއެވެ. މި ލަނޑަށް ފަހު ޕެލަސްގެ ކްރިސްޓިއަން ބެންޓެކޭއަށް އަލުން އަނބުރާ އެ ޓީމަށް ލީޑު ނަގައިދިނުމަށް ދެ ފުރުސަތު ލިބި ބޭކާރުވެފައިވެއެވެ. ޕެލަސްއަށް ލިބުނު ފުރުސަތުތަކުގެ ބޭނުން އެ ޓީމަށް ހިފިފައިނުވާއިރު މެޗުގެ 84 ވަނަ މިނެޓުގައި ސަލާހު ވަނީ ލަނޑެއް ޖަހާ ލިވަޕޫލްއަށް ލީޑު ނަގައިދީފައެވެ.

މި މެޗުގައި ޖެހި ލަނޑާއެކު ސަލާހު ވަނީ މި ސީޒަނުގެ ޕްރިމިއާ ލީގުގައި 29 ލަނޑު ޖަހާފައެވެ. އޭނާއާ އެއް އަދަދަކަށް ޔޫރަޕުގެ ގަދަ ފަސް ލީގުގައި ކުޅެމުން އަންނަ އެހެން އެއްވެސް ކުޅުންތެރިޔަކަށް ލަނޑު ޖެހިފައެއް ނުވެއެވެ. ހަމައެހެންމެ އޭނާ ވަނީ އެއް ސީޒަނެއްގައި އެންމެ ގިނަ ލަނޑު ޖެހި އެފްރިކާގެ ކުޅުންތެރިޔާގެ ރެކޯޑާއި ވެސް އަރާ ހަމަކޮށްފައެވެ. މިހާރު އެ ރެކޯޑު އޮންނަނީ ޗެލްސީއަށް މީގެކުރިން ކުޅުނު އައިވޮރީ ކޯސްޓުގެ ފޯވާޑް ޑިޑިއާ ޑްރޮގްބާ އަތުގައެވެ.

ކުޅުނު 32 މެޗުން ލިބުނު 66 ޕޮއިންޓާއެކު ތާވަލުގެ ތިންވަނައިގައި ލިވަޕޫލް އޮތްއިރު ކްރިސްޓަލް ޕެލަސް އޮތީ 17 ވަނައިގައެވެ. ޕްރިމިއާ ލީގުގައި ކުރިޔަށް އޮތް ހަފްތާގައި އެވަޓަންއާ ދެކޮޅަށް ލިވަޕޫލް ނުކުންނައިރު ޕެލަސް ނުކުންނާނީ ބޯންމައުތާ ދެކޮޅަށެވެ.