އާސަންދައިގެ އިސްރާފު ކުޑަކޮށް 300 މިލިއަން ރުފިޔާ ސަލާމަތް ކުރެވޭނެ
އާސަންދައަކީ ސަރުކާރުގެ ބަޖެޓުން ކޮންމެ އަހަރަކުވެސް ބޮޑު ހަރަދެއް ކުރަމުން އަންނަ ނިޒާމެއް
ރައީސް އޮފީހުގެ އަންޑަރ ސެކެޓްރީ އަހުމަދު ހަމްދާން
ކޮންމެ އަހަރުކުވެސް ސަރުކާރުގެ ބަޖެޓުން އާސަންދައަށް ބޮޑު ހަރަދެއް ކުރަމުން އަންނަ ކަމަށާއި، ނަމަވެސް 2021 ވަނަ އަހަރަށް ސަރުކާރުން ހުށަހަޅާފައިވާ ބަޖެޓުން އާސަންދައިގެ އިސްރާފު ކުޑަކޮށް 300 މިލިއަން ރުފިޔާ ސަލާމަތް ކުރެވޭނެ ކަމަށް ރައީސް އޮފީހުގެ އަންޑަރ ސެކެޓްރީ އަހުމަދު ހަމްދާން ވިދާޅުވެއްޖެ އެވެ.
ރާއްޖެ ޓީވީގެ "ބަޖެޓް 2021" ޕްރޮގްރާމްގައި ވާހަކަދައްކަވަމުން ހަމްދާން ވިދާޅުވީ 2021 ވަނަ އަހަރުގެ ބަޖެޓް ހުށަހަޅާފައިވާނީ ބޮޑެތި ބަދަލުތަކަކަށް ވިސްނައިގެން ކަމަށާއި، އެގޮތުން ބޭކާރު ހަރަދު ކުޑަކުރުމަށް ވަރަށް ބޮޑަށް ބަލާފައިވާނެ ކަމަށެވެ. އެގޮތުން ކޮންމެ އަހަރެއްގެ ބަޖެޓުން ވެސް އެންމެ ބޮޑު ހަރަދެއް ކުރަމުން އަންނަ އެއް ކަމަކީ އާސަންދަ ކަމަށާއި، އެކަމަކު 2021 އަށް ހުށަހެޅި ބަޖެޓުގައި އާސަންދައިން ކުރަމުން އަންނަ ބޭކާރު ހަރަދުތައް ކުޑަކުރުމަށް އަހަންމިއްޔަތުކަން ދީފައިވާނެ ކަމަށް ހަމްދާން ވިދާޅުވި އެވެ.
ހަމްދާން އިތުރަށް ވިދާޅުވީ ކުރިޔަށް އޮތް 2021 ވަނަ އަހަރު އާސަންދައިގެ ބަޖެޓުން 300 މިލިއަން ރުފިޔާ ސަލާމަތް ކުރުމަކީ ސަރުކާރުގެ އަމާޒެއް ކަމަށާއި، އާސަންދައިގެ ތެރޭގައި ހުރި ނުރަނގަޅު ކަންކަން މިހާރު ފާހަގަ ކުރެވިފައި ހުރި ކަމަށެވެ. އަދި ހަމްދާން ވިދާޅުވީ އާސަންދައިގެ ބަޖެޓުން 300 މިލިއަން ކުޑަކުރުމަށް ސަރުކާރުން މަސައްކަތް ކުރި ނަމަވެސް ރައްޔިތުންނަށް އެކަމުގައި ތަކުލީފެއް އުފުލަން ނުޖެހޭނެ ކަމަށެވެ.
އާސަންދައަކީ ރައީސް މުހައްމަދު ނަސީދުގެ ސަރުކާން ތައާރަފުކުރި ހިދުމަތެކެވެ. އާސަންދައިގެ ދަށުން އޭރު އެއްލައްކު ރުފިޔާ ކޮންމެ ދިވެހި ރައްޔިތަކު ބޭސް ފަރުވާ ކުރުމަށް ލިބިގެންދިޔައިރު، ރައީސް އަބްދުﷲ ޔާމީންގެ ސަރުކާރުން ވަނީ ހުސްނުވާ އާސަންދައިގެ ނަމުގައި އާސަންދައިގެ ހިދުމަތް އިތުރަށް ހަރުދަނާ ކޮށްފަ އެވެ. އަދި އާސަންދައަކީ ސަރުކާރުގެ ބަޖެޓުން ކޮންމެ އަހަރަކުވެސް ބޮޑު ހަރަދެއް ކުރަމުން އަންނަ ނިޒާމެކެވެ.
