މި ސަރުކާރުން ރައްޔިތުންނަށް ހިތްފަސޭހަ މާހައުލެއް ހޯދައިދިނުމަށް އިސްކަންދެން: ރައީސް ސޯލިހު
12 ނޮވެމްބަރު 2020 | ބުރާސްފަތި 03:03ތޮއްޖެހިގެން ދިރިއުޅެން ޖެހުމަކީ، އާންމު ސިއްހަތަށް ނޭދެވޭ އަސަރުކުރާ ކަމެއް
\'\'ލޮނުޒިޔާރަތް ޕާކު\'\' ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވާހަކަފުޅު ދައްކަވަނީ
ރައްޔިތުންނަށް ޚިދުމަތް ކުރުމުގެ މަސްއޫލިއްޔަތާ މި ސަރުކާރުން ހަވާލުވުމަށް ފަހު، އެންމެ ބޮޑު އިސްކަމެއް ދީގެން ކުރަމުން އަންނަ އެއް ކަމަކީ، މާލޭގައި ދިރިއުޅޭ ރައްޔިތުންނަށް މާލެއިން ހިތްފަސޭހަ މާހައުލެއް ހޯދައިދިނުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ ''ލޮނުޒިޔާރަތް ޕާކު'' ރަސްމީކޮށް ހުޅުވުމަށް ބުދަ ދުވަހުގެ ހަވީރު ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ޕާކު ރަސްމީކޮށް ހުޅުވައިދެއްވީ ނިޝާން އިއްޒުއްދީންގެ އިއްޒަތުގެ ވެރިޔާ އުމަރު ޒާހިރެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވަނީ މިފަދަ ޕާކެއް އޮތުމުގެ މުހިންމުކަމުގެ މައްޗަށް އަލިއަޅުއްވައިލައްވާފައެވެ. މިގޮތުން މާލެ ފަދަ ކުޑަ ރަށެއްގައި ގިނަ އަދަދެއްގެ ބަޔަކު ތޮއްޖެހިގެން ދިރިއުޅެން ޖެހުމަކީ، އާންމު ސިއްހަތަށާއި، ނަފްސާނީ ދުޅަހެޔޮކަމަށް ވެސް ވަރަށް ނޭދެވޭ އަސަރުތައް ފޯރާ ކަމެއްކަން އެ މަނިކުފާނު ފާހަގަކުރެއްވިއެވެ. އެހެންކަމުން، މާލޭގައި ހުސްބިންތައް އުފައްދައި، އާއިލާތަކުގެ މެންބަރުން އެކުގައި ހިތް އުފާކޮށްލަން ނުކުމެ އުޅެވޭނެ މައިޒާންތަކާއި ޕާކުތައް ހުރުމަކީ، އާންމު ސިއްހަތު ރައްކާތެރިކުރުމަށް ވެސް ކޮންމެހެން ބޭނުންތެރި ކަމެއްގެ ގޮތުގައި ރައީސް ސޯލިހު ވަނީ ފާހަގަކުރައްވާފައެވެ.
ކޮވިޑް-19 ގެ ހާލަތަށް ރިޔާއަތްކުރައްވާ ރައީސް ސޯލިހު ވަނީ މިފަދަ ޕާކުތަކުގެ ބޭނުން ހިފުމުގައި ވީވަރަކުން ސިއްހީ ގޮތުން ރައްކާތެރިކަމުގެ ފިޔަވަޅުތަކަށް އިސްކަންދީގެން މިފަދަ ޕާކުތަކުގެ ބޭނުން ހިފުމަށް ނަސޭހަތްތެރިވެ ވަޑައިގަންނަވާފައެވެ. އަދި ކޮވިޑް-19 ގެ ސަބަބުން، މުޅި ދުނިޔޭގައި ވެސް، ނަފްސާނީ ބަލީގެ އަސަރުކުރާ މީހުންގެ އަދަދު ދަނީ އިތުރުވަމުންކަމަށާއި, މިފަދަ ޕާކުތަކާއި ހުސް ބިންތަކަށް ނުކުމެ ވަގުތު ހޭދަކުރުމަކީ، ގިނަ ވަގުތު ގޭތެރޭގައި ތިބެންޖެހުމުން ކުރިމަތިވާ ހާސްކަމާއި ކަންބޮޑުވުންތަކަށް ލިބޭ ވަރަށް ރަނގަޅު ފަރުވާއަކަށް ވާނެކަމުގައި އެ މަނިކުފާނު ވިދާޅުވިއެވެ.
މީގެ އިތުރުން ރައީސް ސޯލިހު ވިދާޅުވީ, މާލެއަކީ ހިތްފަސޭހަ މާހައުލަކަށް ހެދުމަށް ކުރަންޖެހޭ ވަރަށް ގިނަ ކަންކަން އަދިވެސް އެބަހުރި ކަމަށެވެ. އެގޮތުން މާލެއަށް އުފަން ރައްޔިތުންނަށް މާލެ ސަރަހައްދުން ބޯހިޔާވަހިކަން ހޯދައިދިނުމަކީ ވެސް، މާލޭގެ މައްސަލަތަކަށް ބޭނުންވާ ވަރަށް އަވަސް ހައްލެއްކަން ރައީސް ސޯލިހު ފާހަގަކުރެއްވެވިއެވެ.
ރައީސް ސޯލިހު ވިދާޅުވީ އަންނަ އަހަރަށް ސަރުކާރުން ކަނޑައެޅި މަޝްރޫއުތަކުގެ ތެރެއިން މާލެ ސަރަހައްދުގައި އެންމެ އިސްކަން ދީގެން ކުރާނެ އެއް ކަމަކީ، މާލޭގެ ރަށްވެހިންނަށް ބޯހިޔާވަހިކަން ހޯދައިދިނުމުގެ މަސައްކަތް ފެށުން ކަމަށެވެ. މީގެ އިތުރުން ވެސް, އަންނަ އަހަރުގެ ތެރޭގައި މާލޭގެ ހިތްފަސޭހަކަމާ ގުޅިފައިވާ އިތުރު މަސައްކަތްތައް ކުރިއަށްދާނެ ކަމަށް ރައީސް ސޯލިހު ވިދާޅުވިއެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ނިޝާން އިއްޒުއްދީންގެ އިއްޒަތުގެ ވެރިޔާ އުމަރު ޒާހިރު, މާލޭގެ ތަރައްގީއަށް ކޮށްދެއްވާފައިވާ ބުރަ މަސައްކަތްޕުޅު ފާހަގަކުރައްވައި, އެ މަނިކުފާނަށް ޝުކުރު އަދާކުރައްވާފައެވެ. މި ރަސްމިޔާތުގައި ރައީސުލްޖުމްހޫރިއްޔާގެ ދެ ކަނބަލުންގެ އިތުރުން ރައީސުލްޖުމްހޫރިއްޔާގެ ނައިބު ބައިވެރިވެވަޑައިގެންނެވިއެވެ. އަދި, ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި, ދައުލަތުގެ މުއައްސަސާތަކުގެ އިސްވެރިން ވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.
މާލެ ސިޓީގެ ބެލުމުގެ ދަށުން ތަރައްގީކުރެވުނު ލޮނުޒިޔާރަތް ޕާކަކީ ސަރުކާރުގެ ވައުދުތަކުގެ ތެރެއިން މާލެ ސަރަހައްދު ފެހިކުރުމުގެ ވައުދުގެ ތެރެއިން ކުރިއަށްގެންދިޔަ މަޝްރޫއެކެވެ. އަދި މި ޕާކުގައި ހައްދާފައިވާ ގަސްތަކުގެ ނަން އެނގޭނެހެން ފެންނަން ހުންނާނެއެވެ. މި ޕާކުގައި މާއަޅާގަހާއި މާނާޅާ ގަހާއި، ނެތެމުންދާ ގަސް ވެސް ހައްދާފައިވެއެވެ.
