"އިތުރު ދައުރަކަށް ކުރިމަތިލުމަށް ވިސްނަވައިގެން ވެރިކަމަށް ވަޑައިގެންނެވުމަކީ ކުރެވޭނެ އެންމެ ގޯސް އެއް ކަންތައް"
ތުހުމަތު ކުރެވޭ އެކި ފެންވަރުގެ 260 އެއްހާ މީހުން ހިމެނޭކަމަށް ތުހުމަތު ކުރެވޭ
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު
އިތުރު ދައުރަކަށް ކުރިމަތިލެއްވުމުގެ ވިސްނުމުގައި ވެރިކަމަށް ވަޑައިގެންނެވުމަކީ ކުރެވޭނެ އެންމެ ގޯސް އެއް ކަންތައް ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.
ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން އިތުރު ދައުރަކަށް ކުރިމަތިލައްވާނެތޯ ކުރި ސުވާލަށް ޖަވާބު ދެއްވަމުން ރައީސް ވިދާޅުވީ، އިތުރު ދައުރަކަށް ކުރިމަތިލުމަށް ވިސްނަވައިގެން ވެރިކަމަށް ވަޑައިގެންނެވުމަކީ ކުރެވޭނެ އެންމެ ގޯސް އެއް ކަންތައް ކަމަށެވެ. އޭގެ ބަދަލުގައި ވިސްނަވަން ޖެހޭނީ ރައްޔިތުންނަށް ޚިދުމަތެއް ފޯރުކޮށްދެއްވުމަށް ކަމަށް ރައީސް ވިދާޅުވިއެވެ.
ޕްރޮގްރާމްގައި އިތުރަށް ވާހަކަ ދައްކަވަމުން ރައީސް ވަނީ މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ޙިޔާނާތުގެ ފައިސާ އެއްވެސް މިންވަރެއްގައި ލިބިވަޑައިގެންފައި ނުވާކަމަށް ވިދާޅުވެފައެވެ.
އެކަމާ ގުޅޭގޮތުން ވާހަކަ ދައްކަވަމުން ރައީސް ވިދާޅުވީ، އެމްއެމްޕީއާރްސީ ޙިޔާނާތުގެ ފައިސާ އެއްވެސް މިންވަރެއްގައި ލިބިވަޑައިގެންފައި ނުވާ ކަމަށެވެ. އަދި ކުރީގެ ނައިބް ރައީސް އަހުމަދު އަދީބާ ބައްދަލުވެވަޑައިގެން ނަމަވެސް އެއްވެސް އިރެއްގައި ފައިސާއެއްގެ ވާހަކައެއް ދެކެވިފައިނުވާނެ ކަމުގެ ޔަޤީންކަން ރައީސް ސޯލިޙު ދެއްވިއެވެ.
ރައީސް ވިދާޅުވީ، މި މައްސަލައިގައި އެކި ފެންވަރުގައި ތުހުމަތު ކުރެވޭ މީހުން ތިބިއިރު، ތަހުޤީޤުކޮށް ދައުވާ ކުރަން އެދި ޕްރޮސެކިއުޓަރ ޖެނެރަލް އޮފީހަށް ފޮނުވޭނީ އެކަށީގެންވާ ހެކި ހުރެގެން ކަމަށެވެ. އެގޮތުން ކުރިއަށް އޮތް ހަފްތާ ތެރޭގައި އެމްއެމްޕީއާރްސީ ޙިޔާނާތާ ގުޅޭ 4 މައްސަލައެއް ފެށިގެންދާނެކަމުގެ މައުލޫމާތު ލިބިވަޑައިގެންފައިވާ ކަމަށް ރައީސް ފާހަގަ ކުރެއްވިއެވެ.
މީގެކުރިން ހާމަކޮށްފައިވާ މައުލޫމާތުތަކަށް ބަލާއިރު 18 ވަނަ ރައްޔިތުންގެ މަޖިލީހުގެ 44 މެމްބަރުންނާއި 19 ވަނަ މަޖިލީހުގައި ހިމެނިވަޑައިގަންނަވާ 16 މެމްބަރުންގެ އިތުރުން މިނިވަން މުއައްސަސާތަކުގައި ތިއްބެވި 5 މެމްބަރުނަށް ޚިޔާނާތުގެ ފައިސާ ލިބިފައިވާކަން ވަނީ ހާމަވެފައެވެ. އަދި މި ސަރުކާރުގައި ތިއްބެވި 7 ފަރާތަކާއި ކޯޓުތަކުގައި ފަނޑިޔާރުކަން ކުރައްވާ 6 ފަނޑިޔާރަކާއި ކުރީ ސަރުކާރުގެ އެކި މަޤާމުތަކުގައި ތިއްބެވި 23 ފަރާތެއްގެ އިތުރުން ސަލާމަތީ ޚިދުމަތްތަކުގެ ތެރެއިން 7 އޮފިސަރެއް ހިމެނޭ ކަން ހާމަވެފައިވެއެވެ.
މި މައްސަލައިގައި ތުހުމަތު ކުރެވޭ އެކި ފެންވަރުގެ 260 އެއްހާ މީހުން ހިމެނޭކަމަށް މީގެ ކުރިން އިދާރާތަކުން ހާމަ ކޮށްފައިވީ ނަމަވެސް، މި މައްސަލަ އެކަށީގެންވާ ގޮތެއްގައި ކުރިއަށް ނުދާކަމަށް ގިނަ ބަޔަކު ދެކެއެވެ.
