ކަކުލަށް ލިބުނު ސީރިއަސް އަނިޔާއަކާ ގުޅިގެން ބާސެލޯނާގެ ޒުވާން ތަރި އަންސޫ ފަޓީ ހަތަރު މަހަށް ކުޅުމާ ދުރަށް ދާން ޖެހިއްޖެއެވެ.

ފަޓީއަށް އަނިޔާވީ ސްޕެނިޝް ލީގުގައި ހޮނިހިރު ދުވަހުގެރޭ 5-2 ން ރެއާލް ބެޓިސް އަތުން ބާސާ މޮޅުވި މެޗުގައެވެ. އެ މެޗުގައި ފަޓީގެ ވާތު ކަކުލަށް އަނިޔާވުމާ ގުޅިގެން، މެޗުގެ ދެވަނަ ހާފު ބާސާއިން ފެށީ ފަޓީ ނުލައެވެ.

މެޗަށްފަހު ހެދި ޓެސްޓުތަކުން ފަޓީގެ ކަކުލަށް ސީރިއަސް އަނިޔާއެއް ލިބިފައިވާކަން ފާހަގަވުމާއެކު، ހޯމަ ދުވަހު އޭނާ ވަނީ ކަކުލުގެ އޮޕަރޭޝަނެއް ކޮށްފައެވެ. ޒުވާން އުމުރުގައި ފަޓީ ކަކުލުގެ އޮޕަރޭޝަނެއް ކުރަން ޖެހުނުއިރު، އޮޕަރޭޝަނަށްފަހު އުމުރުން 18 އަހަރުގެ ފަޓީއަށް ކުޅުމުގެ ތެރެއަށް އާދެވޭނީ ހަތަރު މަސް ފަހުން ކަމަށް ބާސާއިން ވަނީ ބުނެފައެވެ. އެކަމަކު އެ މުއްދަތު އިތުރުވުމުގެ ފުރުސަތުވެސް އެބައޮތް ކަމަށް ރިޕޯޓުތައް ބުނެއެވެ.

ފަޓީއަށް އަނިޔާވުމަކީ ބާސާގެ އިތުރުން ސްޕެއިން ގައުމީ ފުޓްބޯޅަ ޓީމަށްވެސް ލިބުނު ގެއްލުމެކެވެ. އަނިޔާގެ ސަބަބުން ފަޓީ ވަނީ ސްޕެއިނުގެ ސްކޮޑުންވެސް ބާކީކޮށްފައެވެ.

މި ސީޒަނުގައި ރޮނާލްޑް ކޫމަނުގެ އިރުޝާދުގެ ދަށުން ފަޓީ އަންނަނީ މޮޅު ކުޅުމެއް ދައްކަމުންނެވެ. އެގޮތުން ސީޒަނުގެ މިހާތަނަށް އޭނާ ކުޅުނު 10 މެޗުގައި ވަނީ ހަ ލަނޑު ޖަހާފައެވެ. އަދި މި ސީޒަނުގެ އެލް ކްލަސިކޯ މެޗުގައި ފަޓީ ލަނޑު ޖެހިއިރު، އޭނާ ވެފައިވަނީ ކްލަސިކޯ މެޗެއްގައި ލަނޑު ޖެހި އެންމެ ހަގު ކުޅުންތެރިޔާއަށެވެ.

ގިނީ ބިސާއުއަށް އުފަން ފަޓީ ބާސާގެ ސީނިއާ ޓީމުން ޖާގަ ހޯދީ މިދިޔަ އަހަރުގެ އޯގްސްޓް މަހުގެ 31 ވަނަ ދުވަހުއެވެ. އޮސަސޫނާއާ ދެކޮޅަށް ބާސާ ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ފަޓީ ކުޅެން އަރާ ވަނީ ހަ މިނެޓު ތެރޭ ލަނޑެއް ޖަހާފައެވެ. އެއާއެކު އޭނާ ވެފައިވަނީ ބާސާގެ ތާރީޚުގައި އެ ޓީމަށް މެޗެއް ކުޅެދިނުމުގެ އިތުރުން ބާސާގެ ޖާޒީގައި ލަނޑު ޖެހި އެންމެ ހަގު ކުޅުންތެރިޔާއަށެވެ. އަދި ފަޓީ އަކީ ސްޕެނިޝް ލީގުގެ ތާރީޚުގައި ލަނޑު ޖެހި ތިންވަނައަށް އެންމެ ހަގު ކުޅުންތެރިޔާ އެވެ. އޭރު އޭނާގެ އުމުރަކީ 16 އަހަރާ 304 ދުވަހެވެ.

އެއަށްފަހު ފަޓީ ގިނަ ރިކޯޑުތަކެއް މުގުރާލާފައިވާއިރު، އޭނާއަކީ މިހާރު ޔުއެފާ ޗެމްޕިއަންސް ލީގުގެ ތާރީޚުގައިވެސް ލަނޑެއް ޖެހި އެންމެ ހަގު ކުޅުންތެރިޔާއެވެ. އަދި ފަޓީ ވަނީ ސްޕެނިޝް ލީގުގެ ތާރީޚުގައި އެއް މެޗެއްގައި ދެ ލަނޑު ޖެހި އެންމެ ހަގު ކުޅުންތެރިޔާގެ ރިކޯޑުވެސް މުގުރާލާފައެވެ.

ގިނަ ބަޔެއްގެ ލޯ އަމާޒުވެފައިވާ އުންމީދީ ފޯވާޑް ފަޓީ ތަފާތު މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ބާސާގެ ސީނިއާ ޓީމަށް ކުޅެދިން 43 މެޗުގައި 13 ލަނޑު ޖަހާފައެވެ.