6 ރަށެއްގެ ބިިން ހިއްކުމާ 3 ރަށެއްގެ ބަނދަރު ތަރައްގީ ކުރުމުގެ މަޝްރޫއު އެމްޓީސީސީއާ ހަވާލުކޮށްފި
10 ނޮވެމްބަރު 2020 | އަންގާރަ 11:45މި އެއްބަސްވުންތަކުގައި ސޮއި ކޮށްފައިވަނީ އަންގާރަ ދުވަހު ބޭއްވި ރަސްމިއްޔާތެއްގެއި
މިހާރުވެސް ގިނަ އަދަދެއްގެ ރަށްތަކުގައި ބިންހިއްކުމާ ބަނދަރު ހެދުމުގެ މަޝްރޫއުތައް ކުރިއަށް ދޭ
6 ރަށެއްގެ ބިިން ހިއްކުމާ 3 ރަށެއްގެ ބަނދަރު ތަރައްގީ ކުރުމުގެ މަޝްރޫއު މިނިސްޓްރީ އޮފް ނެޝަނަލް ޕްލޭނިންގ ހައުސިންގް އެންޑް އިންފްރާސްޓްރަކްޗަރ އިން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލު ކޮށްފިއެވެ.
ޕްލޭނިންގ މިނިސްޓްރީއިން އެމްޓީސީއާއެކު މި އެއްބަސްވުންތަކުގައި ސޮއި ކޮށްފައިވަނީ އަންގާރަ ދުވަހު ބޭއްވި ރަސްމިއްޔާތެއްގެ ތެރެއިންނެވެ. އެގޮތުން ބިން ހިއްކުމުގެ މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ރ. ދުވާފަރު، ހއ. އިހަވަންދޫ، އއ. އުކުޅަސް، ތ. ހިރިލަންދޫ، ގއ. ދާންދޫ އާއި މ. ދިއްގަރުގައެވެ.
ރ. ދުވާފަރުން 22.2 ހެކްޓަރުގެ ބިން ހިއްކުމަށް ހަމަޖެހިފައިވާއިރު މިއީ 143 މިލިއަން ރުފިޔާގެ މަޝްރޫޢުއެކެވެ. ޕްލޭނިންގ މިނިސްޓްރީއިން ބުނީ މި މަސައްކަތް ނިންމުމަށް ހަމަޖެހިފައިވަނީ 445 ދުވަހުގެ ތެރޭގައި ކަމަށެވެ.
ހއ. އިހަވަންދޫއިން 25 ހެކްޓަރުގެ ބިން ހިއްކަން ހަމަޖެހިފައިވާއިރު މި މަޝްރޫޢުއަކީ 123 މިލިއަން ރުފިޔާގެ މަޝްރޫއު އެކެވެ. އަދި މި މަސައްކަތް ނިންމަން ހަވާލުކޮށްފަައިވަނީ އެއް އަހަރު ދުވަހުގެ ތެރޭގައެވެ. މީގެ އިތުރުން މި މަޝްރޫއުގެ ދަށުން އެ ރަށުގެ ގޮނޑުދޮށް ޙިމާޔަތް ކުރުމަށްވެސް ވަނީ ނިންމާފައެވެ.
އއ. އުކުޅަހުގެ ބިން ހިއްކުމާ އެކު މި މަޝްރޫއުގެ ދަށުން އެ ރަށުގެ ގޮނޑުދޮށް ޙިމާޔަތްކުރުމަށް ވަނީ ނިންމާފައެވެ. އެގޮތުން އެރަށު ފަޅުން 10 ހެކްޓަރުގެ ސަރަޙައްދެއް ހިއްކާނެ ކަމަށް ޕްލޭނިންގ މިނިސްޓްރީއިން ބުނެއެވެ. އަދި މިއީ 71 މިލިއަން ރުފިޔާގެ މި މަޝްރޫޢުއެއްކަމާއި މި މަސައްކަތް 235 ދުވަހުގެ ތެރޭގައި ނިންމުމަށް ހަމަޖެހިފައިވާ ކަމަށް އެ މިނިސްޓްރީއިން ވަނީ ބުނެފައެވެ.
ޕްލޭނިންގ މިނިސްޓްރީއިން އިތުރަށް ބުނީ ތ. ހިރިލަންދޫއިން 20 ހެކްޓަރުގެ ބިން ހިއްކުމަށް ހަމަޖެހިފައިވާކަމަށާ މި މަޝްރޫއުއަކީ 105 މިލިއަން ރުފިޔާގެ މަޝްރޫއު އެއްކަމަށެވެ. އަދި 285 ދުވަހުގެ ތެރޭގައި މަސައްކަތް ނިންމުމަށް ކަނޑައެޅިފައިވާއިރު، އެރަށުގެ ގޮނޑުދޮށް ޙިމާޔަތްކުރުން ވެސް މި މަޝްރޫއުގެ ތެރޭގައި ހިމެނެއެވެ.
ގއ. ދާންދޫގެ ބިން ހިއްކުމުގެ މަޝްރޫޢުގައި އެރަށުން 25 ހެކްޓަރުގެ ސަރަޙައްދެއް ހިއްކުމަށްވަނީ ނިންމާފައެވެ. މިއީ 186 މިލިއަން ރުފިޔާގެ މަޝްރޫޢުއަކަށް ވާއިރު މި މަސައްކަތް 350 ދުވަސްތެރޭ ނިންމުމަށް ވަނީ ހަމަޖެހިފައެވެ.
މި މަޝްރޫއުތަކުގެ ތެރެއިން ބަނދަރު ތަރައްގީ ކުރުމަށް ހަމަޖެހިފައިވަނީ ޅ. ހިންނަވަރު، އއ. އުކުޅަސް އަދި އއ. މާޅޮހުގައެވެ.
މި އެއްބަސްވުންތަކުގައި މިނިސްޓްރީ އޮފް ނެޝަނަލް ޕްލޭނިންގ ހައުސިންގް އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. އަދި އެމްޓީސީސީގެ ފަރާތުން ސޮއިކުރެއްވީ ސީއީއޯ ޢާދަމް އާޒިމްއެވެ.
