މާދަމާގެ ފަށާއިރު ޕްރޮގްރާމްގެ ޚާއްސަ މެހެމާނަކަށް، ރައީސް ސޯލިޙު!
10 ނޮވެމްބަރު 2020 | އަންގާރަ 08:10ރައީސް ސޯލިޙު ބައިވެރިވެވަޑައިގަންނަވާނީ ހެނދުނު 08:00 ގައި
ރައީސް ސޯލިޙު ވެރިކަމަށް ވަޑައިގަތުމަށްފަހު ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން ދެއްވި ޚާއްސަ އިންޓަރވިއުގެ ތެރެއިން
ރާއްޖެޓީވީން ކޮންމެ ދުވަހަކު ހެނދުނު ގެނެސްދޭ "ފަށާއިރު" ޕްރޮގްރާމްގެ ބުދަ ދުވަހުގެ ޝޯވްގައި ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ބައިވެރިވެވަޑައިގަންނަވާނެއެވެ.
ޖުމްހޫރީ ދުވަހާއި، ރައީސް ސޯލިޙުގެ ސަރުކާރަށް 2 އަހަރު ފުރުން ބުދަ ދުވަހު ފާހަގަ ކުރުމަށް ނިންމާފައިވާއިރު، އެކަމާ ގުޅޭ ޚާއްސަ ކަވަރޭޖް ރާއްޖެޓީވީން ގެނެސްދިނުމަށް ވަނީ ނިންމާފައެވެ. އެގޮތުން މި ކަވަރޭޖް ފެށުމަށް ހަމަޖެހިފައިވަނީ ބުދަ ދުވަހުގެ ފަށާއިރު ޕްރޮގްރާމުންނެވެ.
މި ޕްރޮގްރާމްގައި ރައީސް ސޯލިޙު ބައިވެރިވެވަޑައިގަންނަވާނީ ހެނދުނު 08:00 ގައެވެ.
ރައީސް ސޯލިޙު ވަނީ މީގެ ކުރިންވެސް ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގަންނަވާފައެވެ. އެގޮތުން އެމަނިކުފާނުގެ ސަރުކާރަށް 100 ދުވަސް ފުރެން ބާކީ އޮތް 10 ދުވަސް ކުލަގަދަކޮށް ފާހަގަ ކުރުމުގެ ހަރަކާތްތައް ފެށުމުގެ ގޮތުން އޭރު ޕްރޮގްރާމްގައި ބައިވެރިވެވަޑައިގަންނަވާފައިވާއިރު، އެއީ ވެރިކަމަށް ވަޑައިގަތުމަށް ފަހު ފުރަތަމަ ފަހަރަށް ރާއްޖޭގެ ޓީވީ ޗެނަލެއްގެ ލައިވް ޕްރޮގްރާމެއްގައި ދެއްވި އިންޓަރވިއުވެސް މެއެވެ.
އެކަމާ ގުޅޭ ގޮތުން ޕްރޮގްރާމްގެ ހޯސްޓް އަދި ރާއްޖެޓީވީގެ ޕްރޮގްރާމް ހެޑް އާމިރު ސަލީމް ވިދާޅުވީ، ރައީސް ސޯލިޙު ފަށާއިރު ޕްރޮގްރާމަށް ވަޑައިގަތުމަށް ނިންމެވި ނިންމެވުމަކީ ރާއްޖެޓީވީއާއި، ޓީވީގެ މުވައްޒަފުންނަށް ލިބުނު ބޮޑު އުފަލެއްގެ އިތުރުން، ފަށާއިރު ޕްރޮގްރާމަށް ލިބުނު ޝަރަފެއް ކަމަށެވެ.
ރައީސް ސޯލިޙު ވަނީ ވެރިކަމަށް ވަޑައިގަތުމުގެ ކުރިން ކޮންމެ ދުވަހަކުވެސް ޤަވާއިދުން ފަށާއިރު ޕްރޮގްރާމް ބައްލަވާ ކަމަށް މީގެ ކުރިން ވިދާޅުވެފައެވެ. އަދި މިހާރުވެސް ވަގުތު ލިބިވަޑައިގެންނެވި މިންވަރަކަށް މި ޝޯވް ބައްލަވާ ކަމަށް ރައީސް ސޯލިޙު ވިދާޅުވިއެވެ.
ނިއުސް އެންޑް ކަރަންޓް އެފެއާރޒް ޚަބަރުތައް ނުރަސްމީ އަދި ތަފާތު ގޮތަކަށް ގެނެސްދޭ މި ޝޯވް ރާއްޖެޓީވީގެން ފާއިތުވި 5 އަހަރުގެ ތެރޭގައި މެދުކެނޑުމެއް ނެތި ކޮންމެ ދުވަހެއްގެ ހެނދުނު 6:30 އިން 8:45 އަށް ދަނީ ގެނެސްދެމުންނެވެ.
