ހޯމް މިނިސްޓަރު، މާފުށީ ޖަލުގައި ތިބި ހައި ސެކިއުރިޓީ ޤައިދީންނާ ބައްދަލުކުރައްވައިފި

ހޯމް މިނިސްޓަރު އިމްރާން ޢަބްދުﷲ މާފުށީ ޖަލަށް ޒިޔާރަތްކުރައްވައި، ހައި ސެކިއުރިޓީ ޔުނިޓްތައް ބައްލަވާލައްވާ، އެތަނުގައި ތިބި ޤައިދީންނާ ބައްދަލުކުރައްވައިފިއެވެ.

އާދިއްތަ ދުވަހު މިނިސްޓަރު އިމްރާން މާފުށީ ޖަލަށް ކުރެއްވި މި ޒިޔާރަތުގައި މިނިސްޓަރާއި ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވަނީ ހައި ސެކިއުރިޓީ ގޮޅިތަކަށް ވަކިވަކިން ޒިޔާރަތްކުރައްވައި، އެ ގޮޅިތަކުގައި ތިބި ޤައިދީންގެ ކަންބޮޑުވުންތައް އައްސަވައި، އެ ކަންބޮޑުވުންތަކަށް ހައްލު ހޯދޭނެ ގޮތްތައް ވެސް ބައްލަވާފައެވެ.

ކަރެކްޝަނަލް ސަރވިސްގެ ހިންގުން ހަރުދަނާކުރުމަށް ޚާއްޞަ އިސްކަމެއް މިސަރުކާރުން ދެއްވާފައިވާއިރު، ސަރުކާރުގެ ފުރަތަމަ 100 ދުވަހުގެ ތެރޭގައި ޖަލުތަކުގެ އޮޑިޓެއްކޮށް، ޖަލުތަކުގެ ހާލަތު ރަނގަޅު ކުރަން ކުރަންހުރި ކަންކަން ދެނެގަނެވިފައިވާ ކަމަށް ކަރެކްޝަނުން ބުނެއެވެ.

ހޯމް މިނިސްޓަރ އިމްރާން ވަނީ، މި މަހުގެ 5 ވަނަ ދުވަހު ކުރިއަށްދިޔަ ޔުނިވަރސަލް ޕީރިއޮޑިކް ރިވިއު (ޔޫޕީއާރު) ސެޝަންގައި ވާހަކަ ދައްކަވަމުން މިހާރު ދިމާވެފައިވާ އެންމެ ބޮޑު ގޮންޖެހުމަކީ، ޖަލުތައް ފުރި ޖާގައަށް ވުރެ ޤައިދީން އިތުރުވުން ކަން ފާހަގަ ކުރައްވާ، ޖަލުތަކުގެ ހާލަތު ރަނގަޅުކޮށް، ޒިންމާދާރު ބައެއްގެ ގޮތުގައި ކުށްވެރިން އަނބުރާ މުޖުތަމައުއަށް ނެރުމަށް މުހިއްމު މަސައްކަތްތަކެއް ފެށިފައިވާ ކަމަށް ވިދާޅުވެފައެވެ.

މި ސެޝަންގައި ވާހަކަ ދައްކަވަމުން މިނިސްޓަރު އިމްރާން ވަނީ ނެލްސަން މަންޑޭލާ ރޫލްސް ދިވެހި ބަހަށް ތަރުޖަމާކުރެވި، ކަރެކްޝަން އޮފިސަރުން އެ ރޫލްސްއަށް އަހުލުވެރި ކުރުމުގެ ތަމްރީން ހިނގަމުންދާކަން ފާހަގަކުރައްވާފައެވެ. އަދި ސަރުކާރުގެ އަމާޒަކީ 2021 ވަނަ އަހަރު ނިމޭއިރު ޖަލުތަކާއި، މީހުން ބަންދުކޮށްގެން ބައިތިއްބާ ތަންތަނުގައި ތިބޭ ހުރިހާ އޮފިސަރުންނަކީ ނެލްސަން މަންޑޭލާ ރޫލްސްއަށް އަހުލުވެރި އޮފިސަރުންނަށް ހެދުން ކަމަށް ވިދާޅުވެފައެވެ.

މީގެ އިތުރުން މިނިސްޓަރު ވަނީ މި މަސައްކަތް ހަރުދަނާ ނިޒާމެއްގެ ތެރެއިން ހިންގުމަށްޓަކައި ކަރެކްޝަނަލް ސަރވިސްގައި ރިހެބިލިޓޭޝަން އެންޑް ރީ-އިންޓަގްރޭޝަން ކޮމާންޑް އުފައްދާފައިވާކަން ވެސް ފާހަގަކުރައްވާފައެވެ.