ބަޔާން މިއުނިކުގެ ޑިފެންޑަރު ޖޯޝުއާ ކިމިޗަށް އަނިޔާވެ ޖެނުއަރީ މަހުގެ ނިޔަލަށް ކުޅުމާ ދުރަށް ދާން ޖެހިއްޖެއެވެ.

އުމުރުން 25 އަހަރުގެ ކިމިޗަށް އަނިޔާވީ ޖަރުމަން ލީގުގައި ހޮނިހިރު ދުވަހުގެރޭ ވާދަވެރި ބޮރޫޝީއާ ޑޯޓްމުންޑް އަތުން 3-2 ން ބަޔާން މޮޅުވި މެޗުގައެވެ. އެ މެޗުގައި ލިބުނު އަނިޔާއާ ގުޅިގެން މެޗުގެ 36 ވަނަ މިނެޓުގައި އޭނާ ވަނީ ބަދަލުކޮށްފައެވެ.

އެ މެޗުގައި ކިމިޗުގެ ކަކުލަށް ސީރިއަސް އަނިޔާއެއް ލިބުމާ ގުޅިގެން އާދީއްތަ ދުވަހު އޭނާ ވަނީ ކަކުލުގެ އޮޕަރޭޝަނެއް ކޮށްފައެވެ. ކިމިޗުގެ އޮޕަރޭޝަން ކާމިޔާބުކަމަށް ބަޔާނުން ބުނެފައިވާއިރު، މި އަނިޔާއާ ގުޅިގެން އަންނަ އަހަރުގެ ޖެނުއަރީ މަހުގެ ނިޔަލަށް ކިމިޗް ކުޅުމާ ދުރުގައި ހުންނަން ޖެހޭނެ ކަމަށް ރިޕޯޓުތައް ބުނެއެވެ.

އެހެންކަމުން ޖަރުމަނުގެ ގައުމީ ފުޓްބޯޅަ ޓީމުން މި މަހު ޗެކް ރިޕަބްލިކާ ދެކޮޅަށް ކުޅޭ ބައިނަލްއަގުވާމީ އެކުވެރިކަމުގެ މެޗާއި، ޔުއެފާ ނޭޝަންސް ލީގުގައި ޔޫކްރޭން އަދި ސްޕެއިނާ ދެކޮޅަށް ކުޅޭ މެޗުތަކުގައިވެސް ކިމިޗަށް ނުކުޅެވޭނެއެވެ.

ކިމިޗުގެ ކަކުލަށް ސީރިއަސް އަނިޔާއެއް ލިބުނުއިރު، މި ފަހަކަށް އައިސް އޭނާ އަންނަނީ މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގައި ބަޔާނުން ކުޅުނު 11 މެޗުގައި ކިމިޗް ވަނީ ތިން ލަނޑު ޖަހާފައެވެ. އަދި މި ސީޒަނުގެ ޔުއެފާ ސުޕަ ކަޕާއި، ޖަރުމަން ސުޕަ ކަޕް އަދި މިދިޔަ ސީޒަނުގެ ޔުއެފާ ޗެމްޕިއަންސް ލީގާއި، ޖަރުމަން ލީގު އަދި ޖަރުމަން ކަޕް ބަޔާނުން ކާމިޔާބުކުރިއިރު، ކިމިޗުގެ ދައުރު ބޮޑެވެ.

އާރްބީ ލެއިޕްޒީގް ދޫކޮށް 2015 ވަނަ އަހަރު ބަޔާނާ ގުޅުނު ކިމިޗް ވަނީ މިހާތަނަށް ބަޔާނަށް ކުޅެދިން 233 މެޗުގައި 27 ލަނޑު ޖަހާފައެވެ.