މަހުގެ އަގު އެއްކުރުމަށާއި ވަސީލަތް ތަރައްގީކޮށް، މަސްވެރިކަމުގެ ސިނާއަތަށް ކުރިއެރުވުމަށް ބަޖެޓުން ގިނަ އިންވެސްޓްމެންޓް ތަކެއް!
9 ނޮވެމްބަރު 2020 | ހޯމަ 04:37މިފްކޯގެ ކޫއްޑޫ އަދި ކަނޑުއޮތްގިރީގައި ޚިދުމަތް ފުޅާކޮށް ވަސީލަތްތައް ތަރައްޤީކުރަން ބަޖެޓުގައި ހިމަނާފައިވޭ
މަސްވެރިކަން ކުރާ އުޅަނދެއް
މަހުގެ އަގު އެއްކުރުމަށާއި ވަސީލަތް ތަރައްގީކޮށް، މަސްވެރިންކަމުގެ ސިނާއަތަށް ކުރިއެރުވުމަށް 2021 ވަނަ އަހަރުގެ ބަޖެޓުން ގިނަ އިންވެސްޓްމެންޓްތަކެއް ކުރާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ހޯމަ ދުވަހުގެ ޖަލްސާގައި ބަޖެޓުގެ ތަފްސީލް ހާމަކުރަމުން މިނިސްޓަރ ވަނީ، ހާއްސަ ސަމާލުކަމެއް ދެވިގެން 2021 ވަނަ އަހަރުގެ ބަޖެޓުގައި ވެސް މަހުގެ އަގު އެއްކުރުމަށް ކުރަން ޖެހޭ އިންވެސްޓްމަންޓް ތައް ކުރެވިގެންދާނެކަމަށް ވިދާޅުވެފަ އެވެ. އެގޮތުން ބަޖެޓުގައި މިފްކޯގެ ކޫއްޑޫ އަދި ކަނޑުއޮތްގިރީގައި ޚިދުމަތް ފުޅާކޮށް ވަސީލަތްތައް ތަރައްޤީކުރަން ހިމަނާފައިވާނެކަމަށާއި ޒަމާނީ ޓެކްނޮލޮޖީ ބޭނުންކޮށްގެން އަގު އެއް ކުރުމަށް އައްޑޫ ސިޓީގެ ހަތަރު ރަށެއްގައި ގޭދޮށު މަސްފެކްޓްރީ އެޅުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވާކަމަށް މިނިސްޓަރ ވިދާޅުވި އެވެ.
އަދި، ރާއްޖޭގެ އެކި ހިސާބުތަކުގައި މަހުގެ އަގު އެއްކުރުމަށް ބޭނުންވާ ވަސީލަތްތަކާއި، ސްޓޯރޭޖާއި، މަސްފިނި ކުރުމުގެ ނިޒާމްތައް ޤާއިމްކުރުމަށް ބަޖެޓުގައި ރާވާފައިވާކަން ފާހަގަކޮށް މިނިސްޓަރ އިތުރަށް ވިދާޅުވީ، ބާނާ މަހުގެ އިތުރުން އާލާކުރާ މަސްވެރިކަން ވެސް ތަރައްގީ ކުރުމަކީ ސަރުކާރުގެ އަމާޒެއްކަމަށެވެ. އެގޮތުން، ރާއްޖޭގެ ކަނޑުފަޅުގައި މަސްއާލާކޮށް ސިނާއަތް ތަރައްގީ ކުރުމަށް ގިނަ މަސައްކަތްތަކެއް ކުރުމަށް 2021 ވަނަ އަހަރު ރާވަފައިވާކަން މިނިސްޓަރ ފާހަގަކުރެއްވި އެވެ.
ރާއްޖޭގެ އިގުތިސާދު ސިންދަފާތު ކުރެވެން ހުރި ދިމާތަކަށް އިގުތިސާދީ ހަރަކާތްތައް އިތުރުކުރުމަށް މަގު ފަހިކޮށްދިނުމަކީ ސަރުކާރުގެ އަމާޒަކަށް ވާއިރު، މަސްވެރިކަމުގެ ސިނާއަތުގެ ނަފާ އިތުރު ކުރެވިދާނެ ގިނަ ގޮތްތަކެއް އަދިވެސް އެބަހުރިކަމަށް މިނިސްޓަރ ވިދާޅުވި އެވެ. އަދި، މަސްވެރިންނަށް ލިބޭ ނަފާ އިތުރުކޮށް، މަސްވެރިކަމުގެ އެކްސްޕޯޓް އިތުރުކުރުމަށް، ރާއްޖޭގެ މަސްވެރިކަމާއި މަހުގެ އުފެއްދުންތައް ބޭރު ދުނިޔޭގައި މާކެޓު ކުރުމަށް 2021 ވަނަ އަހަރުގެ ބަޖެޓުގައި ޚާއްޞަ އިސްކަމެއްދީފައިވާނެކަމަށް މިނިސްޓަރގެ ވާހަކަފުޅުގައި ފާހަގަކުރެއްވި އެވެ.
