މުލިން ގޯތި ދޫކުރުމުގައި އެކުލަވާލާފައިވާ އުސޫލަށް ޚިޔާލު ހުށަހެޅުމުގެ ފުރުސަތު ހުޅުވާލައިފި

މ.މުލިން އަލަށް ގޯތި ދޫކުރުމުގައި ކައުންސިލުން އެކުލަވާލާފައިވާ އުސޫލަށް ޚިޔާލު ހުށަހެޅުމުގެ ފުރުސަތު ހުޅުވާލައިފި އެވެ.

މުލީ ކައުންސިލުން ބުނީ އެރަށުން އަލަށް 53 ގޯތި ދޫކުރުމަށްޓަކައި، އެކައުންސިލުން އެކުލަވާލާފައިވާ "މުލަކަތޮޅު މުލިން ދިރިއުޅުމަށްޓަކައި ބަންޑާރަ ގޯތި ދޫކުރުމުގެ އުޞޫލް" އަށް ޚިޔާލް ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.

Advertisement

ކައުންސިލުން ބުނީ ޚިޔާލު ހުށަހެޅުމަށް ބޭނުންވާ ފަރާތްތަކުން 24 ނޮވެންބަރ 2020 ވާ އަންގާރަ ދުވަހުގެ 14:00 ގެ ކުރިން ހިޔާލު ހުށަހެޅުމަށް އެދޭ ފޯމް މެދުވެރިކޮށް ޚިޔާލު ހުށަހެޅުމަށް އެދޭ ކަމަށެވެ. އަދި އެެ އިދާރާއިން ފޯމް ލިބޭނެ ކަމަށްވެސް ކައުންސިލުން ބުންޏެވެ.

މުލަކަތޮޅު މުލިން ދިރިއުޅުމަށްޓަކައި ބަންޑާރަ ގޯތި ދޫކުރުމުގެ އުސޫލުގައި ބުނެފައިވަނީ ގޯއްޗަށް އެދޭ ފޯމު ހުށަހެޅި ކަމަށް ބެލޭނީ، ފޯމު ހުށަހެޅުމަށް އިއުލާނުގައި ކަނޑައަޅާ މުއްދަތުގައި، ފޯމާއެކު ހުށަހެޅުމަށް ކަނޑައަޅާފައިވާ އެންމެހައި ލިޔެކިޔުންތަކާއެކު ފޯމު ހުށަހަޅާފައިވާނަމަ އެވެ.

އަދި މުއްދަތުގެ ފަހުން ހުށަހަޅާ ފޯމާއި، ތަކެތި ހަމަނުކޮށް ހުށަހަޅާ ފޯމު ބަލައެއް ނުގަނެވޭނެ އެވެ. އެފަދަ ފޯމެއް ކައުންސިލަށް ބަލައިގަނެފައި އޮތްނަމަވެސް ކަނޑައެޅިފައިވާ މުއްދަތުގެ ފަހުން ހުށަހަޅާފައިވާ ފޯމާއި ލިޔެކިޔުންތައް ފުރިހަމަނުވާ ފޯމުތައް އެކަން ބަޔާންކޮށް އަނބުރާ ރައްދުކުރެވޭނެ ކަމަށް ކައުންސިލުން ބުންޏެވެ.

މުލިން ދޫކުރުމަށް ނިންމާފައިވަނީ 1800 އަކަފޫޓާ 2000 އަކަފޫޓްގެ 53 ގޯއްޗެވެ.

ކައުންސިލުން ބުނީ 53 އަށްވުރެ ގިނަ ފަރާތްތަކުން ގޯއްޗަށް އެދި ހުށަހަޅާފައިވާނަމަ ގޯތި ދޫކުރެވޭނީ އުސޫލުގެ ދަށުން އެންމެ މަތިން މާކްސް ލިބޭ 53 ފަރާތަކަށް ކަމަށާއި، ތަފާތު އެކި ދަރަޖައިގައި ވެސް އެކި ފަރާތްތަކުގެ މާކްސް އެއްވަރުވާނަމަ، ގޯތި ދޫކުރެވޭނީ މާކްސްގެ ގޮތުން އެއްވަރުވި ފަރާތްތައް ވެސް ހިމެނޭ ގޮތުން އެންމެ މަތިން މާކްސް ލިބޭ ޖުމުލަ 53 ފަރާތަށް ކަމަށެވެ.

އެންމެ ފަހު ޖާގައަށް މާކްސްގެ ގޮތުން އެއްވަރުވެގެން އެއް ފަރާތަށް ވުރެ ގިނަ ފަރާތް އަތުވެއްޖެނަމަ، އެ ގޯތި ނުވަތަ އެގޯތިތަކެއް ލިބޭ ފަރާތްތައް ކަނޑައަޅާނީ އެއްވަރުވާ ހުރިހާ ފަރާތްތަކުގެ މެދުގައި ގުރުއަތުލައިގެން ކަމަށް ކައުންސިލުން ބުންޏެވެ.