އޮކްޓޯބަރު މަހު އެކި މައްސަލަތަކާއި ގުޅިގެން ޖަލަށްލީ މީހުންގެ އަދަދު ދަށަށް
6 ނޮވެމްބަރު 2020 | ހުކުރު 08:23އޮކްޓޯބަރު މަހު ޖަލަށް ލާފައިވަނީ 46 މީހުން
ގައިދީއަކު ޖަލަށް ގެންދަނީ
ސެޕްޓެމްބަރު މަހާ އަޅާބަލާއިރު އޮކްޓޯބަރު މަހު އެކި މައްސަލަތަކާއި ގުޅިގެން ޖަލަށްލީ މީހުންގެ އަދަދު ދަށަށް ހިނގައްޖެ ކަމަށް މޯލްޑިވްސް ކަރެކްޝަނަލް ސަރވިސް ގެ ތަފާސް ހިސާބުތަކުން ދައްކައިފިއެވެ.
ކަރެކްޝަނަލް ސަރވިސް އިން ބުނީ ސެޕްޓެމްބަރު މަހު ޖަލަށް ލާފައިވަނީ 86 މީހުން ކަމަށާއި ނަމަވެސް މި އަދަދު އޮކްޓޯބަރު މަހު ވަނީ ދަށްވެފައި ކަމަށެވެ. އެގޮތުން ފާއިތުވި އޮކްޓޯބަރު މަހު ޖަލަށް ލާފައިވަނީ 46 މީހުންނެވެ.
ބުރާސްފަތި ދުވަހު ކަރެކްޝަނަލް ސަރވިސް އިން އާއްމު ކުރި ތަފާސް ހިސާބުތަކަށް ބަލާއިރު އެންމެ ގިނަ އަދަދެއްގެ މީހުންނަށް އޮކްޓޯބަރު މަހު ހުކުމް ކޮށްފައިވަނީ މަސްތުވާތަކެތީގެ މައްސަލަ ތަކުގައެވެ. އެ ގޮތުން މިފަދަ މައްސަަލަތަކަށް ހުކުމް ކޮށްފައިވަނީ 33.3 އިންސައްތަ މީހުންނަށެވެ. މީގެ އިތުރުންވެސް އިތުރު 33.3 އިންސައްތަ މީހުންނަށް ވަނީ ވައްކަމާއި ފޭރުމުގެ މައްސަލަތަކުގައި ހުކުމް ކޮށްފައެވެ.
މީގެ އިތުރުންވެސް އޮކްޓޯބަރު މަހު ވަނީ ކުޑަކުދިންނަށް ޖިންސީ ގޯނާ ކުރުމާއި، ހިޔާނާތްތެރިވުމާއި އޮޅުވާލުމާއި، އަމުރަށް ނުކިޔަމަންތެރިވުމުގެ އިތުރުން ކޮރަޕްޝަންގެ މައްސަލަ ތަކުގައި ވެސް މީހުންނަށް ހުކުމް ކޮށްފައެވެ. އެގޮތުން ޖުމްލަ 10 މައްސަލައެއްގައި މީހުންނަށް ވަނީ ހުކުމް ކޮށްފައެވެ.
ކަރެކްޝަނުން ބުނީ، މާފުށި ޖަލުން 2552 ފޯން ކޯލް އާއި، މާލެ ޖަލުން 268 ފޯންކޯލް އައްސޭރި ޖަލުން 330 މީހުންގެ އިތުރުން ހުޅުމާލެ ޖަލުން 120 ފޯން ކޯލް ގައިދީންނަށް ފޯރުކޮށްދީފައިވާ ކަމަށެވެ. އަދި މީގެ އިތުރުން ވެސް ޖަލުތަކުގައި ހިންގި އޮޕަރޭޝަންތަކުގައި މާފުށި ޖަލުން 30 ފޯނާ، މާލެ ޖަލުން 02 ފޯން އަދި އައްސޭރި ޖަލުން 06 ފޯނު ވަނީ އަތުލައިގަނެފައެވެ.
