އެންމެ ބޮޑު ގޮންޖެހުމަކީ ޖަލުތައް ފުރި، ޖާގައަށްވުރެ ޤައިދީން އިތުރުވުން: އިމްރާން
ޒިންމާދާރު ބައެއްގެ ގޮތުގައި ކުށްވެރިން އަނބުރާ މުޖުތަމައުއަށް ނެރުމަށް މުހިއްމު މަސައްކަތްތަކެއް ފެށިފައިވޭ
ޖަލުތަކުގެ ހާލަތު ރަނގަޅުކުރުމަށް ފެށި މަސައްކަތުގެ ތެރެއިން ޖަލުގެ ޔުނިޓެއް ތަޅާލުމުގެ މަސައްކަތް މިނިސްޓަރ އިމްރާން ފައްޓަވައިދެއްވަނީ
އެންމެ ބޮޑު ގޮންޖެހުމަކީ ޖަލުތައް ފުރި، ޖާގައަށް ވުރެ ޤައިދީން އިތުރުވުން ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ޔުނިވަރސަލް ޕީރިއޮޑިކް ރިވިއު (ޔޫޕީއާރު) ސެޝަންގައި ވާހަކަ ދައްކަވަމުން ހޯމް މިނިސްޓަރ އިމްރާން އަބްދުﷲ ވިދާޅުވީ ޖަލުތަކުގެ ހާލަތު ރަނގަޅުކޮށް، ޒިންމާދާރު ބައެއްގެ ގޮތުގައި ކުށްވެރިން އަނބުރާ މުޖުތަމައުއަށް ނެރުމަށް މުހިއްމު މަސައްކަތްތަކެއް ފެށިފައިވާކަމަށެވެ. ކަރެކްޝަނަލް ސަރވިސްގެ ހިންގުން ހަރުދަނާކުރުމަށް ޚާއްޞަ އިސްކަމެއް މިސަރުކާރުން ދެއްވާފައިވާކަން ފާހަގަކުރައްވަމުން މިނިސްޓަރ ޢިމްރާން ވިދާޅުވީ ސަރުކާރުގެ ފުރަތަމަ 100 ދުވަހުގެ ތެރޭގައި ޖަލުތަކުގެ އޮޑިޓެއްކޮށް، ޖަލުތަކުގެ ހާލަތުރަނގަޅުކުރަން ކުރަންހުރި ކަންކަން ދެނެގަނެވިފައިވާކަމަށެވެ.
އިންސްޕެކްޓަރ އޮފް ކަރެކްޝަންގެ މަޤާމްގެ މަސްޢޫލިއްޔަތު އަދާކުރުމަށްމަގުފަހިކުރުމަށް ފިޔަވަޅުތައް އަޅާފައިވާ ކަމަށާއި، ޖަލުގައި ތިބޭ ފަރާތްތަކާ ގުޅޭ ޝަކުވާ ހުށަހަޅާނެ ޚާއްޞަ ހޮޓްލައިނެއްޤާއިމްކުރެވިފައިވާކަންވެސް ފާހަގަކުރެއްވިއެވެ. ކަރެކްޝަން އޮފިސަރުން ޖަވާބުދާރީ ކުރުވުމާއެކު، އޮފިސަރުންގެ ސުލޫކީ މިންގަނޑުހިފަހެއްޓުމުގެ އުޞޫލް ޤާއިމްކުރެވި، އޮފިސަރުންގެ ފަރާތުން އަނިޔާވެރި އަމަލެއް ހިނގައިފިނަމަ ހިޔުމަންރައިޓްސް ކޮމިޝަނަށް މައްސަލަހުށަހެޅޭނެ ރެފަރަލް ނިޒާމެއް ޤާއިމުކުރުމުގެ މަސައްކަތް ކުރައްވަމުން ގެންދަވާކަމަށް ވިދާޅުވިއެވެ.
ނެލްސަން މަންޑޭލާ ރޫލްސް ދިވެހި ބަހަށް ތަރުޖަމާކުރެވި، ކަރެކްޝަން އޮފިސަރުން އެ ރޫލްސްއަށް އަހުލުވެރި ކުރުމުގެ ތަމްރީން ހިނގަމުންދާކަން ފާހަގަކުރައްވަމުން މިނިސްޓަރ ޢިމްރާން ވިދާޅުވީ ސަރުކާރުގެ އަމާޒަކީ 2021 ވަނަ އަހަރު ނިމޭއިރު ޖަލުތަކާއި، މީހުން ބަންދުކޮށްގެން ބައިތިއްބާ ތަންތަނުގައި ތިބޭ ހުރިހާ އޮފިސަރުންނަކީ ނެލްސަން މަންޑޭލާ ރޫލްސްއަށް އަހުލުވެރި އޮފިސަރުންނަށް ވެގެން ދިއުން ކަމަށެވެ.
މި މަސައްކަތް ހަރުދަނާ ނިޒާމެއްގެ ތެރެއިން ހިންގުމަށްޓަކައި ކަރެކްޝަނަލް ސަރވިސްގައި ރިހެބިލިޓޭޝަން އެންޑް ރީއިންޓަގްރޭޝަން ކޮމާންޑް އުފައްދާފައިވާކަން ވެސް މިނިސްޓަރ ފާހަގަކުރެއްވިއެވެ.
ދިވެހިރާއްޖޭގެ ޤާނޫނު އަސާސީގައި ބަޔާންކޮށްފައިވާ ހިޔާލުފާޅުކުރުމުގެ މިނިވަންކަމާއި، އެއްވެއުޅުމުގެ މިނިވަންކަން ދިވެހި ސަރުކާރުންއެންމެ މަތީ ދަރަޖައަށް ކަށަވަރުކޮށްދޭކަމަށް މިނިސްޓަރ ޢިމްރާންގެ ތަޤުރީރުގައި ވިދާޅުވިއެވެ. ޤާނޫނީ ވެރިކަން ނަގަހައްޓާ، ޖަވާބުދާރީކުރުވަނިވި ސިފަ ދައުލަތުގެ މުއައްސަސާތަކުގައި އަށަގަންނަވާ، ރައްޔިތުން ބާރުވެރިކުރުވުމަކީ ސަރުކާރުގެ ސިޔާސަތެއްކަން ފާހަގަކުރައްވާ މިނިސްޓަރ ވިދާޅުވި ޚިޔާލުފާޅުކުރުމުގެ މިނިވަންކަމަށް އޭގެ އެންމެ ފުރިހަމަގޮތުގައި ސަރުކާރުން ޖާގަދޭކަމަށެވެ. އޭގެ އެންމެ މުހިއްމު ފިޔަވަޅެއްގެ ގޮތުން ކުރީ ސަރުކާރުން 2016 ވަނަ އަހަރު ތަސްދީޤުކުރެއްވި އަބުރުގެ ޤާނޫނު ރައީސުލްޖުމްހޫރިއްޔާ އިބްރާހީމް މުޙައްމަދުޞާލިޙު މަޤާމާ ޙަވާލުވެވަޑައިގެންވުމަށްފަހު އުވާލައްވާފައިވާކަން މިނިސްޓަރ ފާހަގަކުރެއްވިއެވެ.
ނުފޫޒެއް ނެތި މީޑިޔާތައް މަސައްކަތްކުރުމަށް ޖާގަ ދިނުމަކީ ޚިޔާލުފާޅުކުރުމުގެ މިނިވަންކަން ކަށަވަރުކުކޮށްދިނުމުގެ އެންމެ މުހިއްމު އެއްއަސާސްކަމުގައި ސަރުކާރުން ޤަބޫލުކުރައްވާކަމަށާއި، ނޫސްވެރިކަމުގެ މިނިވަންކަން ކަށަވަރުކޮށް، ހަމަހަމަ ފުރުޞަތުތައް ރާއްޖޭގައި ވަނީފަހިކޮށްދީފައިކަމަށް ވިދާޅުވިއެވެ. ޚިޔާލުފާޅުކުރުމުގެ މިނިވަންކަމާއި މީޑިޔާގެ މިނިވަންކަމާ ގުޅޭ ބިލްތައް މަޖިލީހަށް ހުށަހެޅުމަށް ސަރުކާރުން މަސައްކަތްކުރައްވަމުން ގެންދަވާކަމަށް ވިދާޅުވިއެވެ.
