17 އަހަރުގެ ދިގު ކެރިއަރގައި އެންމެ ސަލާމެއް، ދުވަހަކުވެސް ގަޑިއެއް ނުޖެހޭ!
5 ނޮވެމްބަރު 2020 | ބުރާސްފަތި 04:23ޗުއްޓީ ނެންގެވީ 2 ފަހަރު
ކޮމިޝަނަރ އޮފް ޕޮލިސް (ސީޕީ) މުޙައްމަދު ހަމީދު
މިހާތަނަށް ދުވަހަކު ވެސް ވަޒީފާއަށް ގަޑިޖެހިފައި ނުވާނެ ކަމަށް ކޮމިޝަނަރ އޮފް ޕޮލިސް (ސީޕީ) މުޙައްމަދު ހަމީދު (ޢެމްސީ ހަމީދު) ވިދާޅުވެއްޖެއެވެ.
ބުރާސްފަތި ދުވަހު ރާއްޖެޓީވީގެ "ފަށާއިރު" ޕްރޮގްރާމަށް ވަޑައިގެން ވާހަކަ ދައްކަވަމުން ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ، 17 އަހަރުވީ ދިގު ކެރިއަރގައި ވެސް ސަލާމް ބުނެފައި ވާނީ އެންމެ ދުވަހަކު ކަމަށާއި، މިހާތަނަށް ޗުއްޓީއެއް ނަންގަވާފައި ވާނީ ވެސް ދެ ފަހަރު ކަމަށެވެ. އަދި މަސައްކަތުގައި އުޅުއްވާއިރު އަބަދުވެސް ވަރކް އެތިކްސްއަށް ސަމާލުކަން ދެއްވާކަން ހަމީދު ފާހަގަ ކުރެއްވިއެވެ.
ހަމީދު ވިދާޅުވީ، މިހާތަނަށް ދުވަހަކު ގަޑި ޖެހިފައި ނުވާނެ ކަމަށާއި، ފުލުހުންނަށް ވެސް އެ ގޮތަށް އަބަދު ވެސް އިރުޝާދު ދެއްވާ ކަމަށެވެ. އަދި އެއީ އެންމެ ކުރިން ފެށިގެން ވެސް ހިފަހައްޓަމުން ގެންދެވި އާދަތަކެއްކަން ސީޕީ ފާހަގަ ކުރެއްވިއެވެ.
ސީޕީ ވިދާޅުވީ، މަސައްކަތުގެ މާހައުލުގައި އަބަދު ވެސް މަސައްކަތުގެ އަޙުލާޤަށް ސަމާލުކަން ދެއްވާ ކަމަށެވެ. އެގޮތުން އަލަށް ފުލުހުންގެ ޚިދުމަތަށް ގުޅޭ ފުލުހުންނަށް ވެސް އެ ނަސޭހަތް ދެއްވާކަން ސީޕީ ފާހަގަ ކުރެއްވިއެވެ.
ޕްރޮގްރާމްގައި ސީޕީ ވަނީ ކެރިއަރގެ ބައެއް ވާހަކަތަކާއި، ޒާތީ ބައެއް ވާހަކަތައް ހިއްސާ ކުރައްވާފައެވެ. އެގޮތުން ކޮމިޝަނަރ ކަމުގެ މަޤާމަށް އައްޔަނު ކުރުމުގެ ކުރިން ކުރީގެ ސީނިއަރ ޑެޕިއުޓީ ކޮމިޝަނަރ އޮފް ޕޮލިސް އިބްރާހިމް ލަތީފް އެ މަޤާމަށް ގެނައުމަށް ހަމީދުވެސް ބާރު އެޅުއްވި ކަމަށާއި، އަދި އެއީ ވަރަށް ބޭނުންފުޅުވި ކަމެއް ކަމަށް ވިދާޅުވިއެވެ.
ކޮމިޝަނަރ އޮފް ޕޮލިސް ގެ މަޤާމަށް މުހައްމަދު ހަމީދު (އެމްސީ ހަމީދު) ރައީސް އިބްރާހިމް މުހައްމަދު ސާލިހް އައްޔަނު ކުރެއްވީ 2019 ވަނަ އަހަރުގެ މާރޗު މަހުގެ 26 ވަނަ ދުވަހުއެވެ.
